Vasundhara Raje emotional post: سیاست میں انسان کب بدل جائے کوئی بھروسہ نہیں،لوگ ایک چہرہ پر کئی چہرے لگالیتے ہیں، وسندھرا راجے نے کیا جذباتی پوسٹ

مودی حکومت کے پہلے دور میں آبی وسائل کے وزیر مملکت رہنے والے پروفیسر سنور لال جاٹ کے مجسمے کی اجمیر کے سروج گاؤں میں نقاب کشائی کی گئی۔ سنورلال جاٹ طویل علالت کے بعد 2017 میں 67 سال کی عمر میں انتقال کر گئے تھے۔ راجستھان کی سابق وزیر اعلی وسندھرا راجے نے بھی پروگرام میں شرکت کی۔ اس کے بعد وسندھرا راجے نے سوشل میڈیا پر سابق وزیر سنور لال جاٹ کے مجسمے کی نقاب کشائی کے پروگرام سے متعلق تصاویر شیئر کرتے ہوئے ایک جذباتی پوسٹ لکھا۔

ایکس پر ایک طویل پوسٹ میں وسندھرا راجے نے لکھا کہ موسم اور لوگ کب بدل جائیں اس کی کوئی گارنٹی نہیں ہے۔ آج کل سیاست میں لوگ نئی دنیا بسالیتے ہیں، ایک چہرے پر کئی چہرے لگا لیتے ہیں۔ لیکن پروفیسر سنور لال جاٹ ایسے نہیں تھے۔ وہ مرتے دم تک میرے ساتھ رہے۔وسندھرا راجے نے مزید لکھا، “وہ (سنور لال) ہمیشہ میری مدد کے لیے تیار رہتے تھے۔ میری طرح پروفیسر جاٹ بھی سابق نائب صدر آنجہانی بھیرن سنگھ شیخاوت کے اسکول کے طالب علم تھے۔ وہ اجمیر لوک سبھا الیکشن نہیں لڑنا چاہتے تھے، لیکن نظم و ضبط کے تحت لڑے اور جیت گئے۔

انہوں نے مزید لکھا کہ جب ہم نے 2018 میں کسانوں کے 50,000 روپے تک کے قرضے معاف کیے تو آنجہانی سنور لال جاٹ بہت خوش ہوئے ہوں گے۔ بسالپور کا پانی اجمیر تک لانے والا وہی تھے۔ وہ چاہتے تھے کہ چمبل بیسن کا پانی بسال پور ڈیم میں ذخیرہ کیا جائے۔ ہم نے 2018 میں ERCP شروع کیا، جو سنور جی کا خواب پورا کرے گا۔ وزیر اعظم نریندر مودی نے ان کی موت کو بی جے پی اور ملک کے لیے ایک بڑا نقصان قرار دیا تھا۔

آپ کو بتادیں کہ سنور لال جاٹ راجستھان حکومت میں (تین بار) 1993، 2003 اور 2013 میں وزیر رہے، اس کے بعد 2014 میں اجمیر سے لوک سبھا الیکشن جیتنے کے بعد انہیں مودی حکومت میں آبی وسائل کا وزیر مملکت بنایا گیا۔ تاہم کابینہ میں ردوبدل کے دوران انہیں وزیر کے عہدے سے ہٹا دیا گیا۔ دل کا دورہ پڑنے کے بعد، ان کا دہلی ایمس میں طویل عرصے تک علاج کیا گیا اور اگست 2017 میں ان کا انتقال ہوگیا۔

بھارت ایکسپریس۔