Abbas Ansari News: عتیق احمد کے بعد مختار انصاری کے بیٹوں کی بلڈنگ پر چلا بلڈوزر، مئو میں عالیشان عمارت کو کردیا منہدم

یوپی میں ہوئے امیش پال قتل سانحہ کے بعد  ریاست کی یوگی حکومت مافیاؤں کے خلاف سخت کارروائی کر رہی ہے۔ اس بات سے متعلق اسمبلی انتخابات میں وزیراعلیٰ یوگی آدتیہ ناتھ نے وارننگ دیتے ہوئے کہا تھا ‘مافیا کو مٹی میں ملا ددوں گا۔’ اسی کے بعد سے ریاست میں مسلسل مجرمین اور مافیاؤں پر شکنجہ کسا جا رہا ہے۔

سابق رکن پارلیمنٹ عتیق احمد کے بعد اب بابا بلڈوزر کی نظر سابق رکن اسمبلی مختارانصاری کی غیرقانونی جائیداد پر بھی پڑ گئی ہے۔ اس کی چھان بین کے بعد مئو انتظامہ نے جمعہ کے روز دیر شام مختار انصاری کے رکن اسمبلی بیٹے عباس انصاری اورچھوٹے بیٹے عمرانصاری کے نام پر بنے دو منزلہ عمارت کو منہدم کردیا ہے۔ اس موقع پر سٹی مجسٹریٹ اور سی او سمیت کئی تھانوں کی فورس اور ایک کمپنی پی اے سی تعینات رہی۔ میڈیا ذرائع کے مطابق، عباس انصاری اورعمرانصاری نے ہائی کورٹ میں رٹ پٹیشن داخل کی تھی اور انہدامی کارروائی کے حکم کو چیلنج دیا تھا، لیکن عدالت نے اسے خارج کردیا تھا۔ اسی کے بعد مئوانتظامیہ نے بلڈوزر کارروائی کی اور عالیشان عمارت کو زمین میں ملا دیا۔

عمارت کے لئے نہیں لی گئی تھی اجازت

واضح رہے کہ یہ عالیشان عمارت یوپی کے مئو ضلع کے جہانگیرآباد میں واقع تھی اور اس کے مالک مختارانصاری کے دونوں بیٹے تھے۔ مئوانتظامیہ کے مطابق، اس عمارت کو بنوانے کے لئے عباس انصاری اورعمر انصاری نے مقامی انتظامیہ سے اجازت نہیں لی تھی۔ اس مکان کا نقشہ بھی پاس نہیں ہوا تھا۔ اس معاملے میں پوری پڑتال کے بعد سٹی مجسٹریٹ نوین سنگھ نے دو منزلہ مکان کو گرانے کا حکم جاری کیا تھا۔ اسی کے بعد جمعہ کی دیر شام پولیس اوردیگر متعلقہ افسران موقع پر پہنچے اور چند منٹ میں عالیشان مکان کو زمیں دوز کردیا۔ واضح رہے کہ مئو کے رکن اسمبلی عباس انصاری گزشتہ تین ماہ سے منی لانڈرنگ کے معاملے میں جیل میں بند چل رہے ہیں۔

مختارانصاری کے بیٹوں نے بنوائی تھی عمارت

میڈیا ذرائع کے مطابق، اس عمارت کو مختار انصاری کے دونوں بیٹوں نے تعمیرکرائی تھی۔ اس عمارت کو مشرق میں شمال مجسٹریٹ کورٹ کے ذریعہ غیرقانونی قرار دیتے ہوئے انہدام کا حکم دیا گیا تھا، جس کے بعد دونوں نے ڈسٹرکٹ مجسٹریٹ کے پاس بھی اپیل کی تھی۔