Hamirpur Bridge Collapse: اتر پردیش کے ہمیرپور میں پل گر نےسے6 مزدور ہلاک، کئی کے ملبے تلے دبے ہونے کا خدشہ

نئی دہلی : اتر پردیش کے ضلع ہمیرپور میں جمعہ کی علی الصبح ایک بڑا حادثہ پیش آیا، جہاں شدید آندھی، طوفان اور بارش کے دوران زیرِ تعمیر پل اچانک منہدم ہوگیا۔ اس افسوسناک حادثے میں ملبے تلے دب کر 6 مزدور ہلاک ہوگئے، جبکہ کئی دیگر مزدوروں کے اب بھی پھنسے ہونے کا خدشہ ظاہر کیا جا رہا ہے۔ پولیس، انتظامیہ اور مقامی لوگ موقع پر راحت اور بچاؤ کاموں میں مصروف ہیں۔حادثہ جمعرات اور جمعہ کی درمیانی شب تقریباً تین بجے پیش آیا، جب پل کا ایک بڑا حصہ اچانک گر پڑا۔ اس وقت کئی مزدور پل کے نیچے سو رہے تھے، جو روزانہ تعمیراتی کام مکمل کرنے کے بعد وہیں آرام کرتے تھے۔

حادثے کے فوراً بعد علاقے میں افرا تفری مچ گئی۔ مقامی افراد سب سے پہلے جائے وقوعہ پر پہنچے اور ملبے میں دبے مزدوروں کو نکالنے کی کوششیں شروع کیں۔ بعد ازاں متعدد تھانوں کی پولیس، انتظامی افسران اور ریسکیو ٹیمیں بھی موقع پر پہنچ گئیں۔ جے سی بی مشینوں اور دیگر آلات کی مدد سے ملبہ ہٹانے کا کام مسلسل جاری ہے۔ابتدائی اطلاعات کے مطابق شدید بارش، آندھی اور طوفان کو حادثے کی بنیادی وجہ قرار دیا جا رہا ہے، تاہم مقامی لوگوں اور مزدوروں نے تعمیراتی مقام پر حفاظتی انتظامات کی کمی کا الزام بھی لگایا ہے۔ ان کا کہنا ہے کہ مزدوروں کی حفاظت کے لیے مناسب انتظامات نہیں کیے گئے تھے، جس کی وجہ سے اتنا بڑا حادثہ پیش آیا۔

انتظامیہ کو خدشہ ہے کہ ملبے کے نیچے اب بھی کئی افراد دبے ہو سکتے ہیں، اسی لیے ہلاکتوں کی تعداد میں اضافے کا امکان ظاہر کیا جا رہا ہے۔ حکام کے مطابق ریسکیو آپریشن پوری احتیاط کے ساتھ جاری ہے تاکہ پھنسے ہوئے مزدوروں کو بحفاظت نکالا جا سکے۔اطلاعات کے مطابق اس پل کی تعمیراتی منصوبے کو راجیہ سبھا رکن بابورام نشاد کی کوششوں کے بعد منظوری ملی تھی۔ یہ پل ان کے آبائی گاؤں موراکندر پرسنی کے قریب تعمیر کیا جا رہا تھا اور علاقے کے کئی دیہات کو آپس میں جوڑنے کے لحاظ سے انتہائی اہم مانا جا رہا تھا۔فی الحال ضلع انتظامیہ نے حادثے کی جانچ کے احکامات جاری کر دیے ہیں۔ حکام کا کہنا ہے کہ واقعے کے تمام پہلوؤں کی باریک بینی سے تحقیقات کی جائیں گی اور اگر کسی قسم کی لاپرواہی سامنے آئی تو ذمہ دار افراد کے خلاف سخت کارروائی کی جائے گی۔

بھارت ایکسپریس اردو