PM Modi Visit To Israel: وزیر اعظم مودی نے کہا- اسرائیل کا دو روزہ سرکاری دورہ بھارت-اسرائیل تعلقات کو مزید بنائے گا مضبوط

نئی دہلی: وزیر اعظم نریندر مودی نے اسرائیل کے اپنے دو روزہ سرکاری دورے پر روانگی سے قبل کہا ہے کہ یہ اہم دورہ بھارت اور اسرائیل کے درمیان دیرینہ اور مستحکم تعلقات کو مزید مضبوط بنانے کے ساتھ اسٹریٹجک شراکت داری کے لیے نئے اہداف طے کرنے میں معاون ثابت ہوگا۔ انہوں نے اسرائیلی وزیر اعظم بنیامین نتن یاہو کے ساتھ ہونے والی ملاقاتوں کو انتہائی اہم قرار دیتے ہوئے کہا کہ وہ باہمی مذاکرات کے منتظر ہیں۔ وزیر اعظم کے دفتر کی جانب سے جاری پریس بیان میں نریندر مودی نے کہا کہ وہ اپنے قریبی دوست وزیر اعظم بنیامین نتن یاہو کی دعوت پر 25 اور 26 فروری کو اسرائیل کے سرکاری دورے پر جا رہے ہیں۔ انہوں نے کہا کہ بھارت اور اسرائیل کے درمیان کثیر جہتی اسٹریٹجک شراکت داری قائم ہے، جس میں گزشتہ چند برسوں کے دوران غیر معمولی تیزی اور وسعت دیکھنے کو ملی ہے۔

انہوں نے اپنے بیان میں کہا کہ دونوں لیڈروں کے درمیان ہونے والی بات چیت کا مقصد سائنس و ٹیکنالوجی، اختراع، زراعت، آبی انتظام، جدید ٹیکنالوجی، دفاع و سلامتی، تجارت اور سرمایہ کاری سمیت مختلف شعبوں میں تعاون کو مزید فروغ دینا ہے۔ اس کے علاوہ علاقائی اور عالمی سطح کے اہم امور پر بھی تبادلہ خیال کیا جائے گا تاکہ مشترکہ مفادات کو آگے بڑھایا جا سکے۔

وزیر اعظم مودی نے بتایا کہ اپنے دورے کے دوران وہ اسرائیل کے صدر اسحاق ہرزوگ سے بھی ملاقات کریں گے۔ اس کے ساتھ انہیں اسرائیلی پارلیمنٹ ’کنیسٹ‘ سے خطاب کرنے کا موقع بھی ملے گا، جسے انہوں نے دونوں ممالک کے مضبوط جمہوری اور پارلیمانی تعلقات کے لیے ایک اہم لمحہ قرار دیا۔ ان کے مطابق یہ خطاب بھارت اور اسرائیل کے درمیان بڑھتے سیاسی اعتماد کی علامت ہوگا۔

انہوں نے کہا کہ وہ اسرائیل میں مقیم بھارتی نژاد افراد سے ملاقات کے لیے بھی بے حد پرجوش ہیں، کیونکہ بھارتی برادری دونوں ممالک کے درمیان دوستانہ تعلقات کو مضبوط بنانے میں اہم کردار ادا کرتی رہی ہے۔ وزیر اعظم نے یقین ظاہر کیا کہ ان کا یہ دورہ نہ صرف دوطرفہ تعلقات کو نئی بلندیوں تک لے جائے گا بلکہ مشترکہ ترقی، اختراع اور خوشحال مستقبل کے وژن کو بھی آگے بڑھائے گا۔ قابل ذکر ہے کہ تقریباً نو برس بعد وزیر اعظم نریندر مودی اسرائیل کا سرکاری دورہ کر رہے ہیں۔ وہ اسرائیلی پارلیمنٹ سے خطاب کرنے والے بھارت کے پہلے وزیر اعظم ہوں گے۔ طے شدہ پروگرام کے مطابق وزیر اعظم مودی بدھ کے روز مقامی وقت کے مطابق دوپہر 12 بج کر 45 منٹ پر اسرائیل پہنچیں گے جہاں وزیر اعظم بنیامین نتن یاہو ان کا استقبال کریں گے، جس کے بعد وہ مختلف سرکاری اور سفارتی پروگراموں میں شرکت کریں گے۔

بھارت ایکسپریس اردو۔