PM Modi Criticised TMC: وزیراعظم نریندر مودی کا ترنمول حکومت پر صدر دروپدی مرمو کی گستاخی کا الزام، تقریب کے بائیکاٹ پر سخت تنقید

نئی دہلی: وزیراعظم نریندر مودی نے اتوار کو مغربی بنگال کی حکومت پر شدید تنقید کرتے ہوئے الزام لگایا کہ آل انڈیا ترنمول کانگریس کی حکومت نے ریاست کے حالیہ دورے کے دوران بھارت کی صدر دروپدی مرمو کے ساتھ ’’سنگین بے احترامی‘‘ کا مظاہرہ کیا۔ ایک عوامی تقریب سے خطاب کرتے ہوئے وزیراعظم نے کہا کہ صدر دروپدی مرمو مغربی بنگال میں سنتھال قبائلی روایت کے اعزاز میں منعقد ہونے والی ایک اہم تقریب میں شرکت کے لیے گئی تھیں، مگر ترنمول کانگریس نے اس پروگرام کا بائیکاٹ کیا۔ انہوں نے کہا کہ یہ تقریب صدر اور قبائلی برادری دونوں کے لیے خاص اہمیت رکھتی تھی کیونکہ صدر مرمو خود بھی قبائلی پس منظر رکھتی ہیں اور سنتھال برادری کی فلاح و بہبود کے لیے ہمیشہ فکر مند رہی ہیں۔ نریندر مودی نے کہا کہ ترنمول حکومت کے اس رویے سے نہ صرف تقریب کے انتظامات متاثر ہوئے بلکہ یہ صدرِ جمہوریہ، آئین اور ملک کی جمہوری روایات کی بھی توہین کے مترادف ہے۔

’لکھ پتی دیدی‘ اسکیم کا ہدف حاصل

وزیراعظم نے عالمی یوم خواتین کے موقع پر خواتین کو بااختیار بنانے کے حوالے سے ایک اہم اعلان بھی کیا۔ انہوں نے کہا کہ حکومت کی ’’لکھ پتی دیدی‘‘ اسکیم کے تحت تین کروڑ خواتین کو معاشی طور پر مضبوط بنانے کا ہدف پورا کر لیا گیا ہے۔ ان کے مطابق جب یہ منصوبہ شروع کیا گیا تھا تو بعض لوگوں نے اسے محض سیاسی اعلان قرار دیا تھا، لیکن اب تین کروڑ سے زیادہ خواتین اس پروگرام کے ذریعے مالی طور پر مستحکم ہو چکی ہیں۔

دارجلنگ میں تقریب کے دوران ناراضی

اس سے قبل ہفتے کے روز صدر دروپدی مرمو نے مغربی بنگال کے شہر دارجلنگ میں ایک تقریب کے دوران اس بات پر ناراضگی ظاہر کی کہ ریاستی حکومت کے نمائندے ان کے استقبال کے لیے موجود نہیں تھے اور نہ ہی پروگرام میں شریک ہوئے۔ انہوں نے کہا کہ جب صدر کسی مقام کا دورہ کریں تو وزیراعلیٰ اور وزراء کو بھی وہاں موجود ہونا چاہیے۔ یہ بیان انہوں نے مغربی بنگال کی وزیراعلیٰ ممتا بنرجی کی عدم موجودگی کے حوالے سے دیا۔

بھارت ایکسپریس اردو۔