Sandeshkhali Case: سندیشکھلی معاملہ میں نیا موڑ، ٹی ایم سی نے این سی ڈبلیو چیف ریکھا شرما کے خلاف الیکشن کمیشن سے کی شکایت

لوک سبھا انتخابات کے درمیان مغربی بنگال میں سندیشکھلی کے معاملے  سے متعلق تنازعہ رکنے کے آثار نظر نہیں آ رہے ہیں۔ سندیشکھلی کے اسٹنگ آپریشن کا مبینہ ویڈیو وائرل ہونے کے بعد، ٹی ایم سی نے قومی کمیشن برائے خواتین (این سی ڈبلیو) کی چیئرپرسن ریکھا شرما اور بی جے پی کے مقامی رہنماؤں کے خلاف الیکشن کمیشن میں شکایت درج کرائی اور مجرمانہ کارروائی کا مطالبہ کیا۔ اپنی شکایت میں ٹی ایم سی نے سندیشکھلی کی خواتین کے خلاف جعلسازی، دھوکہ دہی، مجرمانہ دھمکی اور مجرمانہ سازش کا الزام لگایا ہے۔

ٹی ایم سی نے الیکشن کمیشن کو اپنی شکایت میں کہا، “عصمت دری کی جھوٹی شکایت درج کرنے اور کورے کاغذ پر دستخط لینے کے لیے دباؤ ڈالنے کا یہ عمل نہ صرف قانون اور اختیارات کا غلط استعمال ہے، بلکہ جعلسازی اور دھوکہ دہی جیسے جرائم کے مترادف ہے۔”

ٹی ایم سی نے الیکشن کمیشن سے ریکھا شرما، پریالی داس اور دیگر بی جے پی لیڈروں کے خلاف مجرمانہ کارروائی کا مطالبہ کیا ہے۔ ٹی ایم سی نے الیکشن کمیشن سے گواہوں کو مزید دھمکانے اور جھوٹے الزامات کے پھیلاؤ کو روکنے کے لیے ہدایات جاری کرنے کا بھی مطالبہ کیا۔

این سی ڈبلیو نے دعویٰ کیا کہ خواتین کو اپنی شکایات واپس لینے پر مجبور کیا گیا اور اس معاملے کی الیکشن کمیشن سے تحقیقات کا مطالبہ کیا۔ الیکشن کمیشن کو لکھے ایک خط میں، قومی کمیشن برائے خواتین نے کہا، سندیشکھلی کی خواتین کو ٹی ایم سی کارکنان اپنی شکایات واپس لینے پر مجبور کر رہے ہیں کیونکہ وہ مغربی بنگال میں حکمراں پارٹی ہیں۔

ترنمول کانگریس نے جمعہ (10 مئی) کو قومی کمیشن برائے خواتین کی چیئرپرسن ریکھا شرما پر اپنے عہدے کا غلط استعمال کرنے کا الزام لگایا تھا۔ ٹی ایم سی کے مطابق، بہت سی خواتین نے الزام لگایا ہے کہ بی جے پی لیڈران نے انہیں دھوکہ دیا اور ترنمول کانگریس کے لیڈروں کے خلاف جنسی ہراسانی کی شکایت درج کروائی۔

بھارت ایکسپریس۔