Threatening call to Kejriwal turns out to be fake: کیجریوال کو جان سے مارنے کی دھمکی دینے والا فون فرضی نکلا، پولیس کی جانچ میں بڑا انکشاف

چنڈی گڑھ:  دہلی کے سابق وزیر اعلیٰ اور عام آدمی پارٹی کے قومی کنوینر اروند کیجریوال کو جان سے مارنے کی دھمکی ملنے کے معاملے میں پولیس کی تفتیش کے دوران بڑا انکشاف ہوا ہے۔ جانچ میں دھمکی آمیز فون کال فرضی پائی گئی ہے۔ فون کرنے والے شخص کا تعلق ہریانہ کے روہتک سے بتایا جا رہا ہے۔ اس معاملے میں تلک نگر کے رکن اسمبلی جرنیل سنگھ کو دھمکی آمیز فون کال اور واٹس ایپ پیغام موصول ہوا تھا۔ رکن اسمبلی نے 6 نومبر کو موہالی کے ایس ایس پی سے اس سلسلے میں شکایت درج کرائی تھی۔

لارنس بشنوئی گینگ کا رکن ہونے کا دعویٰ

شکایت میں بتایا گیا تھا کہ ملزم نے خود کو لارنس بشنوئی گینگ کا رکن ظاہر کرتے ہوئے کیجریوال سے 7 کروڑ روپے دلوانے کا مطالبہ کیا تھا۔ رقم نہ ملنے کی صورت میں اروند کیجریوال اور ان کی بیٹی ہرشیتا کیجریوال کو جان سے مارنے کی دھمکی بھی دی گئی تھی۔ شکایت کی بنیاد پر موہالی پولیس نے بھارتیہ نیائے سنہیتا (بی این ایس) اور انفارمیشن ٹیکنالوجی ایکٹ کی مختلف دفعات کے تحت مقدمہ درج کیا تھا۔ معاملے کی تفتیش سائبر کرائم تھانے کے انسپکٹر سنیل کمار کو سونپی گئی تھی۔

سیاسی زاویے سے پولیس کر رہی ہے جانچ

پولیس ملزم کے موبائل نمبر کی کال ڈیٹیل، آئی پی لاگز اور لوکیشن کی جانچ کر رہی تھی۔ رکن اسمبلی نے کیجریوال اور ان کے اہل خانہ کی سلامتی یقینی بنانے کا مطالبہ بھی کیا تھا۔ پولیس کی تفتیش میں اب دھمکی آمیز کال فرضی ثابت ہوئی ہے اور کال کرنے والے شخص کا تعلق روہتک سے بتایا جا رہا ہے۔ ذرائع کے مطابق، کال کرنے والا ایک سیاسی جماعت کا کارکن ہے۔ پولیس اس پہلو سے بھی تفتیش کر رہی ہے کہ فرضی کال کرنے کے پیچھے کیا وجہ اور مقصد تھا۔

ادھر، عام آدمی پارٹی نے اس پورے معاملے کو پنجاب کو بدنام کرنے کی سازش قرار دیا ہے۔ پارٹی کا الزام ہے کہ اس طرح کی فرضی کالوں کے ذریعے پنجاب کی شبیہ خراب کرنے کی کوشش کی جا رہی ہے۔

بھارت ایکسپریس۔