SOLDIERATHON 2026: سولجراتھون صرف فوجیوں کے لیے نہیں، بلکہ فوجیوں کے ساتھ ہے، جنرل وی کے سنگھ نے دیا پیغام

نئی دہلی: دہلی کے کریاپا پریڈ گراؤنڈ میں منعقد ہونے والے SOLDIERATHON 2026 میں سابق آرمی چیف اور سابق مرکزی وزیر جنرل وی کے سنگھ نے شرکت کرتے ہوئے کہا کہ یہ میراتھن صرف فوجیوں کے احترام کے لیے نہیں بلکہ فوج اور عام شہریوں کے درمیان مضبوط رشتہ قائم کرنے کی ایک اہم کوشش ہے۔ انہوں نے کہا کہ اس مہم کا مقصد شہریوں کو بھارتی فوجیوں کی زندگی، نظم و ضبط، قربانی اور خدمت کے جذبے سے روشناس کرانا اور انہیں صحت مند و فٹ رہنے کی ترغیب دینا ہے۔بھارت ایکسپریس سے خصوصی گفتگو کرتے ہوئے جنرل وی کے سنگھ نے کہا، “یہ دوڑ صرف فوجیوں کے لیے نہیں بلکہ فوجیوں کے ساتھ ہے۔ ہماری کوشش ہے کہ جو لوگ فوج کا حصہ نہیں ہیں، وہ بھی فوجیوں کی زندگی، ان کی قربانیوں اور ملک کے لیے ان کی خدمات کو سمجھیں، ان سے تحریک حاصل کریں اور اپنی صحت و فٹنس پر توجہ دیں۔”

انہوں نے بتایا کہ اس سال سولجراتھون میں تقریباً آٹھ ہزار افراد نے شرکت کی۔ اس مرتبہ یہ پروگرام صدرِ جمہوریہ کے باڈی گارڈز (President’s Bodyguard) رجمنٹ کے نام وقف کیا گیا، جو بھارتی فوج کی سب سے قدیم رجمنٹ مانی جاتی ہے۔ ان کے مطابق آئندہ برسوں میں اس مہم کو مزید وسیع پیمانے پر منعقد کرنے کی کوشش کی جائے گی تاکہ زیادہ سے زیادہ شہری اس قومی تحریک سے جڑ سکیں۔نوجوانوں کے کردار سے متعلق سوال پر جنرل وی کے سنگھ نے کہا کہ ملک کے حقیقی نوجوان وہ ہیں جو کھیل، سائنس، ریاضی، شطرنج اور دیگر شعبوں میں عالمی سطح پر بھارت کا نام روشن کر رہے ہیں۔ انہوں نے کہا، “جو نوجوان دولتِ مشترکہ کھیلوں اور دیگر بین الاقوامی مقابلوں میں سونے، چاندی اور کانسے کے تمغے جیت رہے ہیں، جو سائنس، ریاضی اور شطرنج میں ملک کو نئی بلندیوں تک لے جا رہے ہیں، وہی دراصل بھارت کے حقیقی نوجوان ہیں۔”بھارتی فوج کے خلاف بعض متنازع بیانات پر سخت ردِعمل دیتے ہوئے جنرل وی کے سنگھ نے کہا کہ جو لوگ فوج کے بارے میں مناسب معلومات رکھے بغیر عوامی پلیٹ فارمز پر توہین آمیز تبصرے کرتے ہیں، ان کے لیے لغت میں کوئی مناسب لفظ موجود نہیں۔

انہوں نے کہا، “اٹھائیس سال کا شخص صرف نوجوان نہیں بلکہ ایک بالغ اور سمجھدار انسان ہوتا ہے۔ اگر اسے اپنی فوج کے بارے میں معلومات ہی نہیں اور وہ فوجیوں کے خلاف توہین آمیز زبان استعمال کرتا ہے تو ایسے لوگوں کی وضاحت کے لیے لغت میں کوئی لفظ نہیں ملتا۔”ملک کی ترقی کے حوالے سے اظہارِ خیال کرتے ہوئے جنرل وی کے سنگھ نے کہا کہ بھارت مسلسل ترقی کی راہ پر گامزن ہے۔ انہوں نے کہا کہ ہر ترقی کے ساتھ چیلنجز اور مخالفت بھی سامنے آتی ہے، لیکن ملک ان تمام رکاوٹوں پر قابو پانے کی صلاحیت رکھتا ہے۔انہوں نے کہا، “بھارت آگے بڑھ رہا ہے اور آگے بھی بڑھتا رہے گا۔ جب کوئی ملک ترقی کرتا ہے تو اس سے حسد کرنے والے بھی سامنے آتے ہیں۔ مختلف طاقتیں اور ایجنڈے سرگرم ہوتے ہیں، لیکن آخرکار ملک ہی ان سب کا مؤثر جواب دے گا۔ بھارت مضبوط رہے گا اور ترقی کا سفر جاری رکھے گا۔”قابلِ ذکر ہے کہ امر شہداء، زخمی سابق فوجیوں اور بھارتی فوج کے بہادر جوانوں کے اعزاز میں منعقد SOLDIERATHON 2026 میں ہزاروں شہریوں، نوجوانوں، خواتین، بچوں اور سابق فوجیوں نے شرکت کر کے مسلح افواج کے ساتھ اپنی یکجہتی اور احترام کا اظہار کیا۔ اس موقع پر حب الوطنی، جسمانی فٹنس، قومی اتحاد اور سماجی ہم آہنگی کا پیغام نمایاں طور پر دیکھنے کو ملا۔

بھارت ایکسپریس اردو