Sharad Pawar criticized the foreign policy: ’’پڑوسی ممالک کے ساتھ بامعنی بات چیت میں ناکام ہے یہ حکومت‘‘، شرد پوار نے ملک کی خارجہ پالیسی پر کی تنقید

این سی پی کے سربراہ شرد پوار نے منگل کے روز بی جے پی کی قیادت والی مرکزی حکومت کی خارجہ پالیسی پر تنقید کرتے ہوئے کہا کہ وہ پڑوسی ممالک کے ساتھ ’’بامعنی بات چیت‘‘ کے لیے سازگار ماحول پیدا کرنے میں ناکام رہی ہے۔ پونے میں اپنی پارٹی کے 26ویں یوم تاسیس کے موقع پر منعقدہ پارٹی کنونشن سے خطاب کرتے ہوئے پوار نے کہا کہ ملک کے پہلے وزیر اعظم جواہر لال نہرو کے دور میں ہندوستان کے اپنے پڑوسیوں کے ساتھ اچھے تعلقات تھے۔

شرد پوار نے کہا کہ ’’(ہماری) پارٹی نے کبھی بھی قومی مفاد سے متعلق مسائل پر سیاست نہیں کی۔ پہلگام دہشت گردانہ حملے کے بعد ہم نے حکومت پر تنقید نہ کرنے کا انتخاب کیا۔ اس کے بجائے ہم نے زور دے کر کہا کہ ہم حملے کے جواب میں مرکز کی طرف سے کی جانے والی کسی بھی طرح کی کارروائی کی حمایت کریں گے۔‘‘

اپنے کسی بھی پڑوسی سے ہندوستان کے تعلقات بہت اچھے نہیں: شرد پوار

سینئر لیڈر نے مزید کہا ’’تاہم آج پاکستان اور چین کے ساتھ ہمارے تعلقات خراب ہو چکے ہیں۔ بنگلہ دیش، جو بھارت کی حمایت سے بنا تھا، ہمارے ساتھ کھڑا نہیں ہے۔ جہاں تک سری لنکا کا تعلق ہے، چین کے بڑھتے ہوئے اثر و رسوخ کی وجہ سے بھارت کے ساتھ اس کے تعلقات بھی مشکوک معلوم ہوتے ہیں۔ لہٰذا ہم اعتماد کے ساتھ یہ نہیں کہہ سکتے کہ ہندوستان کی اس وقت اپنے کسی پڑوسی کے ساتھ بامعنی بات چیت ہے۔ یہ بامقصد بات چیت کے لیے سازگار ماحول پیدا کرنے میں قیادت کی ناکامی کی عکاسی کرتا ہے۔ ملک کو اس کی قیمت چکانی پڑے گی۔‘‘

پوار نے زور دیا کہ این سی پی (ایس پی) پہلگام دہشت گردانہ حملے پر سیاست نہیں کرے گی، لیکن اس بات کی تصدیق کی کہ ان کی پارٹی، کانگریس اور بائیں بازو کے ساتھ ملک کی بہتری کے لیے قومی سطح پر کام کرتی رہے گی۔ دریں اثنا پارٹی کی ورکنگ صدر سپریا سولے نے، جنھوں نے حال ہی میں آپریشن سندور کے بعد مصر، قطر، ایتھوپیا اور جنوبی افریقہ جانے ہندوستانی پارلیمانی وفد کی قیادت کی تھی، کہا کہ ان ممالک کے رہنماؤں نے مہاتما گاندھی کو پیار سے یاد کیا اور نہرو کے دوروں اور تقاریر کا ذکر کیا۔ انھوں نے کہا ’’آج بھی جب ہم دوسرے ممالک کا دورہ کرتے ہیں تو وہ مودی جی کی بہت زیادہ بات کرتے ہیں۔ لیکن ساتھ ہی وہ مہاتما گاندھی، جواہر لعل نہرو اور اندرا گاندھی کے بارے میں بھی بات کرتے ہیں۔‘‘

بھارت ایکسپریس اردو