BJP has transformed UP: ’’وزیراعظم مودی کے ترقی یافتہ بھارت کے عزم کو حقیقت کا روپ دے گا اترپردیش‘‘ امت شاہ نے 2027 اسمبلی انتخابات کا بگل بجایا

لکھنؤ: اترپردیش دیوس کے موقع پر لکھنؤ میں منعقدہ ریاستی سطح کے پروگرام میں مرکزی وزیر داخلہ امت شاہ نے کہا کہ جو اتر پردیش کبھی ’’لیبر سورس اسٹیٹ‘‘ کے طور پر پہچانا جاتا تھا، آج وہ ملک کی چوتھی سب سے بڑی معیشت بن چکا ہے۔ انہوں نے کہا کہ کانگریس، سماج وادی پارٹی اور بہوجن سماج پارٹی کے دور حکومت میں اتر پردیش کو بیمارو ریاست بنا کر رکھا گیا، لیکن بی جے پی حکومت نے ترقی کی رفتار دے کر اسے بریک تھرو اسٹیٹ میں تبدیل کر دیا ہے۔ اب یہ ریاست ’’ترقی یافتہ بھارت‘‘ کے عزم کی مضبوط بنیاد بن رہی ہے۔ اس موقع پر انہوں نے سردار ولبھ بھائی پٹیل کے نام پر شروع کی گئی سردار پٹیل صنعتی اسکیم کا افتتاح کرتے ہوئے کہا کہ اتر پردیش کو ایک ٹریلین ڈالر کی معیشت بنانے کے لیے ایک منظم روڈ میپ تیار کیا گیا ہے۔ امت شاہ نے یقین ظاہر کیا کہ آنے والے برسوں میں ریاست کا ہر ضلع روزگار سے لیس ہوگا اور نوجوانوں کو اپنے ہی صوبے میں باعزت روزگار میسر آئے گا۔ انہوں نے کہا کہ ایک زمانے میں اتر پردیش کو لیبر سورس اسٹیٹ کہا جاتا تھا، لیکن آج وہی اتر پردیش ملک کی معیشت کی چوتھی سب سے بڑی ریاست بن چکا ہے، جو ہم سب کے لیے فخر اور مسرت کی بات ہے۔ انہوں نے کہا کہ بی جے پی حکومت نے اتر پردیش کو بیما رو ریاست سے نکال کر بریک تھرو ریاست بنایا اور ترقی کو ہر گاؤں تک پہنچانے کا کام کیا ہے۔

’’ایک ضلع ایک پروڈکٹ‘‘ اسکیم کی کامیابی

مرکزی وزیر داخلہ نے کہا کہ 2017 میں جب دہلی میں اتر پردیش کے لیے بی جے پی کا انتخابی منشور تیار کیا جا رہا تھا، تب ’’ایک ضلع ایک پروڈکٹ‘‘ کے تصور کو منشور میں شامل کیا گیا تھا۔ آج ڈبل انجن حکومت کی کامیابی سب کے سامنے ہے یہ اسکیم نہ صرف اتر پردیش میں کامیاب رہی بلکہ یہیں سے تحریک پا کر پورے ملک میں نافذ کی گئی۔ یہ اسکیم آج کاریگروں، نوجوانوں، خواتین اور ماؤں کے لیے روزگار کا مضبوط ذریعہ بن چکی ہے۔

قوم کی بیداری کا مرکز بنے گا پریرنا استھل

امت شاہ نے کہا کہ وہ پہلی بار پریرنا استھل آئے ہیں، جہاں تین عظیم رہنماؤں کے شاندار مجسمے اور جدید سہولیات موجود ہیں۔ انہوں نے اس مقام کی تعمیر پر وزیراعلیٰ یوگی آدتیہ ناتھ اور دونوں نائب وزرائے اعلیٰ کو مبارکباد دی۔ انہوں نے کہا کہ یہ پریرنا استھل آئندہ دنوں میں قومی شعور کی بیداری کا مرکز بنے گا۔ شیاما پرساد مکھرجی، دین دیال اُپادھیائے اور بھارت رتن اٹل بہاری واجپئی کی یاد میں قائم یہ مقام دہائیوں تک ملک کو سمت دیتا رہے گا۔ وزیراعظم نریندر مودی نے ترقی یافتہ بھارت کا عزم لیا ہے اور یوگی جی کی قیادت میں ڈبل انجن حکومت نے ترقی یافتہ اتر پردیش بنانے کا بھی عزم کیا ہے۔

بھارت کی تعمیر میں فیصلہ کن کردار ادا کرے گا اترپردیش

امت شاہ نے کہا کہ وزیراعظم نریندر مودی کے ترقی یافتہ بھارت کے عزم کو حقیقت میں بدلنے میں اتر پردیش فیصلہ کن کردار ادا کرے گا۔ وزیر اعلیٰ یوگی آدتیہ ناتھ کی قیادت میں ریاست تیزی سے ترقی کی راہ پر گامزن ہے اور ڈبل انجن حکومت کی کوششوں سے اتر پردیش ملک کی ترقی کا انجن بنتا جا رہا ہے۔ انہوں نے کہا کہ سردار پٹیل صنعتی اسکیم کے ذریعے ریاست میں صنعتوں کو فروغ دیا جائے گا، جس سے نوجوانوں کو اپنے ہی اضلاع میں روزگار ملے گا اور انہیں روزگار کے لیے ہجرت نہیں کرنی پڑے گی۔ مقصد یہ ہے کہ نوجوان اپنے والدین کی خدمت کرتے ہوئے اپنے ہی صوبے میں خود کفیل بنیں۔

نوجوانوں کے لیے بلاسود قرض اسکیم

پروگرام کے دوران وزیرداخلہ نے بتایا کہ ریاستی حکومت کی پہل پر ہر سال ایک لاکھ نوجوانوں کو پانچ لاکھ روپے تک کا بلاسود اور بغیر گارنٹی قرض فراہم کیا جا رہا ہے، جس میں 10 فیصد سبسڈی کی بھی سہولت ہے۔ اب تک ایک لاکھ سے زائد نوجوان اس اسکیم سے فائدہ اٹھا چکے ہیں۔ انہوں نے کہا کہ اتر پردیش نہ صرف اس میدان میں پیش پیش ہے بلکہ نئی نئی اختراعات کے ساتھ اسے مزید وسعت دے رہا ہے۔

کوڑے کے پہاڑ سے شاندار مقام تک

پریرنا استھل کا ذکر کرتے ہوئے امت شاہ نے کہا کہ وزیراعلیٰ یوگی آدتیہ ناتھ نے بتایا کہ جہاں کبھی 65 ایکڑ پر کوڑے کا پہاڑ ہوا کرتا تھا، آج وہاں ایک شاندار اور متاثر کن مقام تعمیر کیا گیا ہے۔ یہ مقام شیاما پرساد مکھرجی، پنڈت دین دیال اُپادھیائے اور سابق وزیراعظم اٹل بہاری واجپئی جیسے عظیم رہنماؤں کی یاد میں قائم کیا گیا ہے، جو آنے والی نسلوں کو دہائیوں تک ترغیب دیتا رہے گا۔ آخر میں امت شاہ نے وزیر اعلیٰ یوگی آدتیہ ناتھ اور دونوں نائب وزرائے اعلیٰ کا شکریہ ادا کرتے ہوئے کہا کہ ریاستی حکومت نے جس دور اندیشی اور عزم کے ساتھ ترقیاتی کام کیے ہیں، وہ قابلِ ستائش ہیں۔ انہوں نے کہا کہ اتر پردیش صرف جغرافیائی ہی نہیں بلکہ ثقافتی اور روحانی اعتبار سے بھی ملک کی روح ہے۔ یہی وہ سرزمین ہے جہاں بھگوان رام، بھگوان کرشن، مہاویر اور گوتم بدھ جیسے عظیم رہنماؤں نے تاریخ کا دھارا موڑا۔ وزیر داخلہ نے دہرایا کہ جب 15 اگست 2047 کو ملک آزادی کی صد سالہ تقریبات منائے گا، تب اتر پردیش ایک مکمل ترقی یافتہ ریاست کے طور پر ترقی یافتہ بھارت کا مضبوط ستون ہوگا۔

بھارت ایکسپریس اردو۔