Telangana Congress: کانگریس کے زیر اقتدار تلنگانہ میں بغاوت کی چنگاری، سی ایم ریڈی نے بلائی ایک ہنگامی میٹنگ

کانگریس کی حکومت والی ایک اور ریاست میں عدم اطمینان اور بغاوت کی اطلاعات ہیں۔ تلنگانہ کی سیاست سے خبر ہے کہ پارٹی کے 10 ایم ایل ایز نے ایک بند کمرے میں علیحدہ میٹنگ کی ہے۔ اس کے بعد  وزیراعلیٰ ریونت ریڈی کافی سرگرم ہوگئے ہیں اور ایم ایل ایز میں بڑھتی ہوئی بے اطمینانی کو ختم کرنے کے لئے اقدامات کئے ہیں۔تلنگانہ میں 2023 کے اسمبلی انتخابات میں کانگریس نے حکومت بنائی اور کے۔ چندر شیکھر راؤ کی حکومت کو اقتدار سے باہر کا راستہ دکھایا تھا۔

اب کہا جا رہا ہے کہ زیادہ تر باغی لیڈر گزشتہ سال بھارت راشٹرا سمیتی (بی آر ایس) سے کانگریس میں شامل ہوئے تھے۔ بی آر ایس سے آنے والے لیڈر کانگریس لیڈروں کے ساتھ تال میل نہیں کر پا رہے ہیں جس کی وجہ سے مقامی کانگریس لیڈروں میں ناراضگی دکھائی دے رہی ہے۔ اطلاعات کے مطابق کانگریس کے 10 ایم ایل ایز نے ایم ایل اے انیرودھ ریڈی سے ڈنر میٹنگ میں ملاقات کی ہے۔ تاہم، پارٹی رہنماؤں کا کہنا ہے کہ یہ صرف ایک عشائیہ ملاقات تھی اور اپوزیشن جماعتیں اسے غیر ضروری طور پر ہوا دینے کی کوشش کر رہی ہیں۔

ہماچل اور کرناٹک پر بھی بغاوت کے بادل منڈلا رہے ہیں

آپ کو بتادیں کہ ملک بھر میں صرف تین ریاستوں میں کانگریس اپنے بل بوتے پر حکومت چلا رہی ہے۔ ان ریاستوں میں کرناٹک، ہماچل پردیش اور تلنگانہ شامل ہیں۔ گزشتہ سال لوک سبھا انتخابات سے پہلے ہماچل پردیش کانگریس میں بھی بغاوت دیکھنے میں آئی تھی۔ سبکدوش ہونے والی ریاستی صدر پرتیبھا سنگھ اور وزیر اعلیٰ سکھوندر سنگھ سکھو کے کیمپوں کے درمیان مسلسل لڑائی ہوتی رہی۔ اس کے بعد کانگریس ہائی کمان نے گزشتہ سال نومبر میں کانگریس کی ریاست، ضلع اور بلاک اکائیوں کو تحلیل کر دیا تھا۔

اس کے علاوہ کرناٹک میں بھی وزیر اعلیٰ سدارامیا اور نائب وزیر اعلیٰ ڈی کے شیوا کمار کے سیاسی  گروپ کے درمیان تنازع کی خبریں سامنے آتی رہتی ہیں۔ کانگریس ہائی کمان کو سدارامیا کو کرناٹک کا وزیر اعلیٰ مقرر کرنے میں کافی دقت ہوئی  تھی کیونکہ شیوکمار کے حامی اپنے لیڈر کو وزیر اعلیٰ کے عہدے پر دیکھنا چاہتے تھے۔ دیکھنا یہ ہے کہ اگر تلنگانہ کانگریس میں عدم اطمینان بڑھتا ہے تو کیا وزیراعلیٰ ریونت ریڈی اور کانگریس ہائی کمان اسے حل کرنے میں کامیاب ہوں گے؟

بھارت ایکسپریس۔