Tejashwi Questions EC’s Impartiality: تیجسوی نے الیکشن کمیشن کی غیر جانبداری پر اٹھائے سوال، فیصلوں میں تبدیلی پر مانگا جواب

پٹنہ: بہار اسمبلی میں قائد حزب اختلاف اور آر جے ڈی لیڈر تیجسوی یادو نے منگل کے روز الیکشن کمیشن پر سخت حملہ کرتے ہوئے انتخابات میں مبینہ دھاندلی اور بے ایمانی کے حوالے سے سوالات اٹھائے۔ انہوں نے پوچھا کہ الیکشن کمیشن نے کس کے کہنے پر انتخابات میں دھاندلی کی اور جمہوریت کو نقصان پہنچایا؟

CEC گیانیش کمار کو بھی بنایا نشانہ

تیجسوی یادو نے چیف الیکشن کمشنر گیانیش کمار کو بھی نشانہ بناتے ہوئے سوال کیا کہ اگر ان کے سابقہ فیصلے درست تھے تو اب انہی ضابطوں اور فیصلوں میں تبدیلی کیوں کی جا رہی ہے؟ تیجسوی یادو نے سوشل میڈیا پلیٹ فارم ایکس پر ایک پوسٹ کے ذریعے الیکشن کمیشن کے کام کرنے کے طریقۂ کار پر سوالات اٹھائے۔

کس کے کہنے پر انتخابات میں دھاندلی؟

آر جے ڈی لیڈر تیجسوی یادو نے اپنی پوسٹ میں لکھا، ’’الیکشن کمیشن نے کس کے کہنے پر انتخابات میں دھاندلی کی، بے ایمانی کی اور ڈاکہ ڈالا؟‘‘ انہوں نے مزید سوال کیا کہ الیکشن کمیشن اب خوف کے مارے اپنے ہی سابقہ ضابطوں اور فیصلوں میں تبدیلی کیوں کر رہا ہے؟

تیجسوی نے چیف الیکشن کمشنر گیانیش کمار کو نشانہ بناتے ہوئے انہیں ’چور‘ قرار دیا اور سوال کیا کہ اگر اس وقت ان کے فیصلے درست تھے تو اب وہ اپنے ہی فیصلوں سے پیچھے کیوں ہٹ رہے ہیں؟ انہوں نے کہا کہ یا تو اس وقت کے فیصلے درست تھے یا پھر اب لیے جا رہے فیصلے صحیح ہیں۔

عوامی مینڈیٹ سے چھیڑ چھاڑ کا الزام

آر جے ڈی لیڈر نے اپنی پوسٹ میں انتخابی عمل پر سخت تبصرہ کرتے ہوئے الزام لگایا کہ انتخابات میں عوامی مینڈیٹ کے ساتھ کھلواڑ کیا گیا ہے۔ انہوں نے لکھا کہ ان لوگوں نے انتخابات کو لوٹا ہے، عوام کے اعتماد کا قتل کیا ہے اور جمہوریت کا گلا گھونٹا ہے۔

تیجسوی یادو کے اس بیان کو الیکشن کمیشن کی غیر جانبداری اور انتخابی عمل میں شفافیت کے حوالے سے اپوزیشن کی جانب سے اٹھائے جانے والے سوالات کے تناظر میں دیکھا جا رہا ہے۔ ان کے بیان کے بعد ایک بار پھر الیکشن کمیشن کے کردار اور اس کے فیصلوں پر سیاسی بحث تیز ہونے کے امکانات ہیں۔

آر جے ڈی لیڈر تیجسوی یادو ایس آئی آر کے معاملے پر مسلسل حکومت اور الیکشن کمیشن کو نشانہ بناتے رہے ہیں۔ وہ گزشتہ پیر کو دہلی میں اپوزیشن کی جانب سے سپریم کورٹ تک نکالے گئے مارچ میں بھی شامل ہوئے تھے۔

بھارت ایکسپریس۔