NEET PG Exam 2024: سپریم کورٹ نے نیٹ ۔پی جی امتحان ملتوی کرنے کا مطالبہ کیا مسترد ، کہا- آخری وقت پر ایسا حکم نہیں دیا جا سکتا

سپریم کورٹ نے 11 اگست کو ہونے والے نیٹ ۔پی جی امتحان کو ملتوی کرنے کے مطالبہ  کو مسترد کر دیا۔ عدالت نے کہا، لاکھوں طلبہ کو امتحان میں شریک ہونا ہے، ایسا حکم آخری وقت میں نہیں دیا جا سکتا۔ درخواست گزار نے کہا کہ بہت سے طلباء کے امتحانی مراکز ایسے شہروں میں ہیں جہاں تک پہنچنا مشکل ہے۔

درخواست میں کہا گیا کہ مراکز کی الاٹمنٹ بدانتظامی کو روکنے کے لیے کی گئی تھی لیکن وقت کی کمی کے باعث امیدواروں کے لیے مخصوص شہروں میں سفرسے متعلق انتظامات کرنا مشکل ہے۔ نیٹ ۔یو جی کا امتحان پہلے 23 جون کو ہونا تھا۔ بعض مسابقتی امتحانات میں مبینہ بے ضابطگیوں کے پیش نظر احتیاطی اقدام کے طور پر اسے ملتوی کیا گیا تھا۔

چیف جسٹس ڈی وائی چندر چوڑ، جسٹس جے بی پارڈی والا اور جسٹس منوج مشرا کی بنچ نے کہا کہ وہ پانچ طلبہ کی وجہ سے 2 لاکھ طلبہ کے کیریئر کو خطرے میں نہیں ڈال سکتے۔ اس پر سینئر ایڈوکیٹ سنجے ہیگڑے نے عرضی گزاروں کی طرف سے پیش ہوتے ہوئے کہا کہ 50  ہزارسے زیادہ طلباء نے انہیں اس حوالے سے میسیج کیا ہے۔

درخواست گزار کی جانب سے سپریم کورٹ میں ایک اور مسئلہ اٹھایا گیا۔ عدالت نے کہا، “یہ امتحان دو بیچوں میں منعقد کیا جانا ہے اور امیدواروں کو نارملائزیشن فارمولہ نہیں معلوم ہے جس سے من مانی کا خدشہ پیدا ہوتا ہے۔”

درخواست میں کہا گیا ہے کہ “اس امتحان میں دو لاکھ سے زیادہ طلباء بیٹھنے والے ہیں، یہ امتحان 185  شہروں میں منعقد ہونا ہے، جس کی وجہ سے ٹرین کے ٹکٹ دستیاب نہیں ہوں گے اور ہوائی کرایوں میں بھی اضافہ ہو جائے گا، جس کی وجہ سے طلبا کی ایک  بڑی تعداد  کے لیے اپنے امتحانی مراکز تک پہنچنا تقریباً ناممکن ہو جائے گا۔

درخواست گزاروں کی نمائندگی کرنے والے وکیل نے دلیل دی کہ شفافیت کی کمی اور دور دراز کے امتحانی مراکز سے درپیش چیلنجز بہت سے طلباء کو نقصان پہنچا سکتے ہیں۔ عرضی گزاروں میں سے ایک وشال سورین نے مشورہ دیا کہ ایک ہی بیچ میں امتحان کا انعقاد تمام امیدواروں کے لیے یکساں امتحانی ماحول کو یقینی بنائے گا۔

بھارت ایکسپریس۔