SC Issues Notice to Mamata Government in I-PAC Case: آئی-پیک معاملے میں سپریم کورٹ کا ممتا حکومت کو نوٹس، سی سی ٹی وی فوٹیج محفوظ رکھنے کی ہدایت، دو ہفتوں میں طلب کیا جواب

نئی دہلی: سپریم کورٹ نے پولیٹیکل کنسلٹنسی فرم آئی-پیک کے دفتر اور اس کے شریک بانی پرتیک جین کی رہائش گاہ پر چھاپے سے متعلق انفورسمنٹ ڈائریکٹوریٹ (ای ڈی) کے معاملے میں مغربی بنگال کی وزیرِ اعلیٰ ممتا بنرجی اور ریاست کے ڈائریکٹر جنرل آف پولیس (ڈی جی پی) راجیو کمار کو نوٹس جاری کیا ہے۔ عدالتِ عظمیٰ نے بنگال پولیس کو ہدایت دی ہے کہ وہ چھاپے سے متعلق سی سی ٹی وی فوٹیج کو محفوظ رکھے۔

انفورسمنٹ ڈائریکٹوریٹ نے وزیرِ اعلیٰ ممتا بنرجی اور ڈی جی پی راجیو کمار پر چھاپے کے دوران کارروائی میں رکاوٹ ڈالنے کا الزام عائد کیا ہے۔ ای ڈی کی جانب سے پیش ہونے والے ایڈیشنل سالیسٹر جنرل (اے ایس جی) ایس وی راجو نے سپریم کورٹ کو بتایا کہ اس معاملے میں وزیرِ اعلیٰ خود ملزم ہیں۔ انہوں نے الزام لگایا کہ وزیرِ اعلیٰ نے ڈی جی پی کی موجودگی میں ذاتی طور پر چوری کی، جبکہ ڈی جی پی کا کردار اس میں معاون کا تھا۔

ای ڈی کے افسران کے خلاف درج ایف آئی آر پر روک

دلائل سننے کے بعد جسٹس پرشانت کمار مشرا اور جسٹس وِپُل پنچولی پر مشتمل بنچ نے مغربی بنگال پولیس کی جانب سے ای ڈی کے افسران کے خلاف درج ایف آئی آر پر روک لگا دی۔ سپریم کورٹ نے کہا کہ ای ڈی کی طرف سے دائر درخواستوں میں سنگین سوالات اٹھائے گئے ہیں۔ عدالت نے مشاہدہ کیا کہ اگر ایسے معاملات کو حل نہ کیا گیا تو اس سے ایک یا ایک سے زائد ریاستوں میں ’’بدنظمی‘‘ کی صورتحال پیدا ہو سکتی ہے۔ اسی کو مدنظر رکھتے ہوئے جسٹس مشرا کی سربراہی والی بنچ نے وزیرِ اعلیٰ ممتا بنرجی، ڈی جی پی راجیو کمار، کولکتہ کے پولیس کمشنر اور دیگر کو نوٹس جاری کیا۔

فریقین کو دو ہفتوں کے اندر جواب داخل کرنے کی ہدایت

بنچ نے فریقین کو دو ہفتوں کے اندر جواب داخل کرنے کی ہدایت دی اور معاملے کی اگلی سماعت 3 فروری کو مقرر کی۔ اپنے عبوری حکم میں عدالتِ عظمیٰ نے اگلی سماعت تک تلاشی والے مقامات اور آس پاس کے علاقوں کی ریکارڈنگ سے متعلق تمام سی سی ٹی وی فوٹیج اور دیگر اسٹوریج ڈیوائسز کو محفوظ رکھنے کا بھی حکم دیا۔

کپل سبل اور منو سنگھوی کے دلائل بھی حکم میں درج

سپریم کورٹ نے کپل سبل اور ابھیشیک منو سنگھوی کے دلائل کو بھی اپنے حکم میں درج کیا۔ سبل اور سنگھوی نے کہا کہ یہ درخواستیں سماعت کے قابل نہیں ہیں۔ ان کا کہنا تھا کہ انتخابات سے عین قبل جانچ کے نام پر ای ڈی کی جانب سے مداخلت کا ایک خاص نمونہ دیکھنے کو ملتا ہے۔ انہوں نے یہ بھی کہا کہ جب معاملہ ہائی کورٹ میں زیرِ سماعت ہے تو اس مرحلے پر ان دلائل پر غور نہیں کیا جانا چاہیے۔

ای ڈی کی نئی عرضی پر بھی کورٹ نے طلب کیا جواب

سپریم کورٹ نے انفورسمنٹ ڈائریکٹوریٹ کی ایک نئی عرضی پر بھی ممتا حکومت سے جواب طلب کیا ہے۔ ای ڈی نے نئی درخواست دائر کرتے ہوئے ڈی جی پی راجیو کمار سمیت مغربی بنگال پولیس کے اعلیٰ افسران کو معطل کرنے کا مطالبہ کیا ہے۔

بھارت ایکسپریس۔