Astronaut Sunita Williams Honoured: ہندوستانی نژاد امریکی خلا باز سنیتا ولیمز کو نیویارک ’ویٹرنز ڈے پریڈ‘ میں گرینڈ مارشل کے اعزاز سے نوازا گیا

نیویارک (امریکہ): ہندوستانی نژاد امریکی خلا باز سنیتا ولیمز کو سابق فوجیوں کو خراجِ عقیدت پیش کرنے والی ’ویٹرنز ڈے پریڈ‘ میں گرینڈ مارشل کے اعزاز سے نوازا گیا۔ بحریہ کی ریٹائرڈ کیپٹن سنیتا ولیمز نے بدھ کو مین ہٹن کے ففتھ ایونیو پر نکالی گئی اس عظیم الشان پریڈ کی قیادت کی، جس میں تقریباً 20 ہزار افراد نے شرکت کی۔ اس اعزاز پر اظہارِ خیال کرتے ہوئے سنیتا ولیمز نے اسے ’’ناقابلِ یقین اعزاز‘‘ قرار دیا۔ انہوں نے کہا، ’’بحریہ میں گزارے گئے میرے وقت نے میری شخصیت کو تشکیل دیا اور اس کے بعد آنے والے ہر چیلنج کا سامنا کرنے کے لیے مجھے تیار کیا۔‘‘ انہوں نے مزید کہا، ’’مجھے نیویارک کے شہریوں اور ملک بھر سے آئے امریکیوں کے ساتھ ہر نسل کے سابق فوجیوں کی خدمات، قربانیوں اور عزم کو خراجِ تحسین پیش کرنے پر فخر ہے۔‘‘

خواتین میں سب سے زیادہ اسپیس واک کا ریکارڈ

خلائی ادارے ناسا میں شمولیت سے قبل سنیتا ولیمز ٹیسٹ پائلٹ کے طور پر خدمات انجام دے چکی ہیں۔ بعد ازاں انہوں نے تین خلائی مشنوں میں حصہ لیا اور مجموعی طور پر 608 دن خلا میں گزارے۔ اپنے خلائی کیریئر کے دوران انہوں نے کسی بھی خاتون کی جانب سے سب سے زیادہ اسپیس واک کرنے کا ریکارڈ قائم کیا۔ انہوں نے مجموعی طور پر نو اسپیس واک کیں، جن کا دورانیہ 62 گھنٹے رہا۔ ویٹرنز ڈے پریڈ کے 107ویں سالانہ انعقاد کے موقع پر نکالی گئی اس تاریخی پریڈ میں ہزاروں سابق فوجیوں کے علاوہ مسلح افواج کی مختلف یونٹوں، بلدیاتی پولیس اہلکاروں، سماجی تنظیموں، تعلیمی اداروں اور میوزیکل بینڈز نے شرکت کی۔ تجارتی اداروں نے بھی اس پریڈ میں نمایاں حصہ لیا اور خصوصی جھانکیاں پیش کیں، جن کے ذریعے اپنی کمپنیوں میں کام کرنے والے سابق فوجیوں کو نمایاں کیا گیا۔ پریڈ سے ایک روز قبل سنیتا ولیمز نے یو ایس ایس سان انتونیو پر منعقدہ خصوصی تقریبات میں شرکت کی۔ ان تقریبات کا اہتمام امریکی میرین کور کے قیام کی 251ویں سالگرہ کے موقع پر کیا گیا تھا۔

بوئنگ اسٹارلائنر کا آٹھ روزہ مشن نو ماہ تک جاری رہا

سنیتا ولیمز نیورو اناٹومسٹ دیپک پانڈیا اور سلووینیائی النسل ارسولین پانڈیا کی صاحبزادی ہیں۔ وہ اس وقت عالمی سطح پر خبروں میں آئی تھیں جب بوئنگ کے اسٹارلائنر خلائی کیپسول کی پہلی انسانی پرواز کے دوران ان کا آٹھ روزہ طے شدہ خلائی مشن اچانک تقریباً نو ماہ طویل ہوگیا تھا۔ خلائی جہاز میں مسلسل تکنیکی مسائل کے باعث ان کا قیام طویل ہوگیا اور بالآخر انہیں اور ان کے ساتھی خلا باز بوچ ولمور کو واپس لانے کے لیے اسپیس ایکس کے کریو-9 مشن کے ذریعے ریسکیو آپریشن انجام دینا پڑا۔ سنیتا ولیمز اپنی ثقافتی جڑوں سے بھی گہرا تعلق رکھتی ہیں۔ انہوں نے 2006 میں بھگود گیتا کی ایک نقل اپنے ساتھ خلا میں لے گئی تھیں، جب کہ 2012 میں اپنشد بھی اپنے خلائی سفر کا حصہ بنائے تھے۔

بھارت ایکسپریس اردو۔