Storm wreaks havoc in Delhi-NCR: دہلی-این سی آر میں طوفان اور بارش سے تباہی، محکمہ موسمیات نے پھر جاری کی وارننگ

نئی دہلی: جمعہ کے روز دہلی، این سی آر اور شمالی ہندوستان کے کئی علاقوں میں بڑے پیمانے پر تباہی مچا دی۔ تیز ہواؤں اور گرج چمک کے ساتھ بارش سے نظام زندگی درہم برہم ہوگیا۔ اس شدید طوفان میں اب تک متعدد افراد کے ہلاک ہونے کی تصدیق ہو چکی ہے جب کہ متعدد زخمی ہو چکے ہیں۔

دارالحکومت دہلی میں سیکڑوں درخت اکھڑ گئے، بجلی کے کھمبے گر گئے اور سڑکوں پر ٹریفک جام ہوگیا۔ اس کے علاوہ اندرا گاندھی بین الاقوامی ہوائی اڈے پر 200 سے زیادہ پروازیں یا تو منسوخ کر دی گئیں یا گھنٹوں تاخیر کا شکار ہوئیں، جس سے مسافروں کو شدید پریشانی کا سامنا کرنا پڑا۔

محکمہ موسمیات کے مطابق موسم میں یہ تبدیلی ویسٹرن ڈسٹربنس کی وجہ سے آئی ہے جس کی وجہ سے تیز ہواؤں کے ساتھ گرج چمک اور بارش کی صورت حال ہے۔ آج، 3 مئی کو دہلی میں کم سے کم درجہ حرارت 19 ڈگری سیلسیس رہنے کا امکان ہے جبکہ زیادہ سے زیادہ درجہ حرارت 34 ڈگری سیلسیس رہنے کا امکان ہے۔

محکمہ نے خبردار کیا ہے کہ آج بھی دہلی اور آس پاس کے علاقوں میں گرج چمک کے ساتھ بارش اور تیز ہوا چلنے کا امکان ہے۔ آنے والے دنوں میں بھی موسم ایسا ہی رہنے کا امکان ہے۔ 4 مئی سے 6 مئی تک ہر روز درجہ حرارت 35 ڈگری سیلسیس تک پہنچنے کی توقع ہے اور ان دنوں بھی ’بارش کے ساتھ گرج چمک‘ کی وارننگ جاری کی گئی ہے۔ 7 اور 8 مئی کو بھی بادل چھائے رہیں گے اور ان دنوں بھی بارش متوقع ہے۔

آئی ایم ڈی کی رپورٹ کے مطابق آئندہ چند روز راحت کے نہیں ہوں گے اور عوام کو چوکنا رہنے کی ضرورت ہے۔ انتظامیہ نے لوگوں سے خراب موسم میں گھروں کے اندر رہنے، درختوں اور پرانی عمارتوں کے قریب نہ کھڑے ہونے اور موسم سے متعلق الرٹس پر توجہ دینے کی اپیل بھی کی ہے۔ ضلعی انتظامیہ اور ٹریفک پولیس کو بھی ہائی الرٹ کر دیا گیا ہے۔

بھارت ایکسپریس۔