Odisha Rath Yatra stampede: رتھ یاترا کے دوران بھگدڑ سے 3 ہلاکتوں کے بعد ریاستی حکومت کی کارروائی، ڈی ایم اور ایس پی کا تبادلہ، 2 افسران معطل

اوڈیشہ کے پوری ضلع میں اتوار کی صبح رَتھ یاترا کے دوران بھگدڑ مچنے کے بعد ریاستی حکومت نے فوری کارروائی کرتے ہوئے ضلع مجسٹریٹ اور سپرنٹنڈنٹ آف پولیس کا تبادلہ کر دیا ہے، جبکہ دو دیگر اعلیٰ پولیس افسران کو معطل کر دیا گیا ہے۔ یہ افسوسناک واقعہ اتوار کو صبح تقریباً ساڑھے چار بجے پیش آیا جب ہزاروں عقیدت مند پوری کے شری گنڈیچا مندر کے سامنے رتھ پر سوار بھگوان جگن ناتھ کے درشن کے لیے جمع ہوئے۔ اس دوران اچانک بھیڑ بے قابو ہو گئی اور دھکم پیل کے نتیجے میں بھگدڑ مچ گئی، جس میں تین افراد جاں بحق اور 50 سے زائد زخمی ہو گئے۔

موہن چرن ماجھی نے حادثے کو ناقابل معافی لاپروائی قرار دیا

واقعے کے فوراً بعد اوڈیشہ کے وزیر اعلیٰ موہن چرن ماجھی نے دونوں نائب وزرائے اعلیٰ کے ساتھ ہنگامی اجلاس طلب کیا اور حادثے کو ناقابلِ معافی لاپروائی قرار دیا۔ انہوں نے جگن ناتھ بھکتوں سے معافی مانگتے ہوئے کہا کہ ذمہ داروں کے خلاف سخت کارروائی کی جائے گی۔ اس کارروائی کے تحت پوری کے ایس پی ونیت اگروال اور ڈی ایم سدھارتھ شنکر سوین کا تبادلہ کر دیا گیا ہے۔ اب پنک مشرا، جو فی الحال اے ڈی جی کرائم کے عہدے پر فائز تھے اور ماضی میں پوری کے ایس پی بھی رہ چکے ہیں، نئے سپرنٹنڈنٹ ہوں گے۔ اس کے علاوہ، ضلع کھوردہ کے کلکٹر چنچل رانا کو پوری کا نیا ڈی ایم مقرر کیا گیا ہے۔

اعلیٰ سطحی انتظامی تحقیقات کا بھی حکم

وزیر اعلیٰ نے مزید دو افسران ڈپٹی کمشنر آف پولیس وشنو پتی اور کمانڈنٹ اجے پادھی کو فوری طور پر معطل کرنے کا حکم دیا ہے۔ حادثے کی وجوہات کا جائزہ لینے کے لیے ایک اعلیٰ سطحی انتظامی تحقیقات کا بھی حکم دیا گیا ہے، جس کی نگرانی ریاست کے ترقیاتی کمشنر کریں گے۔ حکومت نے حادثے میں جاں بحق ہونے والوں کے لواحقین کو 25 لاکھ روپے کی مالی امداد دینے کا اعلان کیا ہے، جبکہ زخمیوں کے علاج کا مکمل خرچ ریاستی حکومت برداشت کرے گی۔

عقیدت مندوں کے رَتھ کے قریب آنے کی کوشش سے ہوا حادثہ

رتھ یاترا کے دوران سیکورٹی اور بھیڑ پر قابو پانے کے لیے بڑے پیمانے پر انتظامات کیے گئے تھے، لیکن اتنی بڑی تعداد میں عقیدت مندوں کے اچانک جمع ہو جانے سے صورتحال بگڑ گئی۔ ذرائع کے مطابق حادثہ اس وقت پیش آیا جب عقیدت مندوں نے رَتھ کے قریب آنے کی کوشش میں آگے بڑھنا شروع کیا اور اسی دوران دھکا مکی سے کئی لوگ گر گئے، جنہیں روند دیا گیا۔

بھارت ایکسپریس اردو۔