Belonging: A Journey of Love: سونیا گاندھی کی یادداشتوں پر مشتمل کتاب ’’بیلانگنگ: اے جرنی آف لو‘‘ منظر عام پر، ملک کے سبھی بُک اسٹور پر دستیاب

نئی دہلی: کانگریس پارلیمانی پارٹی (سی پی پی) کی چیئرپرسن سونیا گاندھی کی یادداشتوں پر مشتمل کتاب ’’بیلانگنگ: اے جرنی آف لو‘‘ (Belonging: A Journey of Love) منگل کے روز ملک بھر کی کتابوں کی دکانوں پر دستیاب ہوگئی۔ ناشر ہارپر کولنز انڈیا کے مطابق یہ کتاب ملک کے مختلف شہروں کی کئی معروف کتابوں کی دکانوں پر جاری کی گئی ہے۔ ان میں چنئی کا ہگنبوتھم، دہلی کے بہری سنز اور مڈلینڈ، ممبئی کے دی وائٹ کرو اور ٹائٹل ویوز، کیرالہ کا ماتروبھومی بکس، کرناٹک کے بلوسمس اور دی بک ورم شامل ہیں۔ اس کے علاوہ مہاراشٹر، کرناٹک، دہلی-این سی آر، تلنگانہ، تمل ناڈو، مغربی بنگال، گجرات اور کیرالہ میں کراس ورڈ کی دکانوں پر بھی یہ کتاب دستیاب ہے۔

2004 میں وزارتِ عظمیٰ قبول نہ کرنے کے فیصلے کا ذکر

منگل کے روز سونیا گاندھی نے اپنی نئی کتاب کے کچھ اقتباسات بھی شیئر کیے۔ انڈین ایکسپریس میں شائع ہونے والے ایک مضمون کو سوشل میڈیا پلیٹ فارم ایکس پر شیئر کرتے ہوئے انہوں نے 2004 میں یو پی اے حکومت کے اقتدار میں آنے کے بعد وزارتِ عظمیٰ کا عہدہ قبول نہ کرنے کے اپنے فیصلے کا ذکر کیا۔ اپنی پوسٹ میں سونیا گاندھی نے لکھا، ’’اچانک میرے ذہن سے شک و شبہات کی آخری پرت بھی ختم ہوگئی۔ میں نے خود کو کہتے ہوئے سنا، ’سونیا، اپنے آپ سے سچی رہو۔ تم ہمیشہ سے یہ جانتی رہی ہو۔ بس اسے چھوڑ دو!‘ یہ اقتباس میری کتاب ’بیلانگنگ‘ سے ہے، جس میں وزیر اعظم نہ بننے کے فیصلے کا ذکر کیا گیا ہے۔‘‘

راہل گاندھی سے فیصلے کا ذکر، بیٹے نے بھی حمایت کی

انڈین ایکسپریس میں شائع کتاب کے اقتباسات میں سونیا گاندھی نے اس وقت کی صورت حال بیان کرتے ہوئے لکھا ہے، ’’میں نے خود کو کہتے ہوئے سنا، ’سونیا، اپنے آپ سے سچی رہو۔ تم ہمیشہ سے یہ جانتی رہی ہو۔ بس اسے چھوڑ دو!‘ چند گھنٹوں بعد میری آنکھ کھلی تو میں سیدھی اپنے بیٹے کے کمرے میں گئی اور دروازہ کھٹکھٹایا۔ میں نے اس سے کہا، ’میں نے اپنا ذہن بنا لیا ہے۔ میں اپنے فیصلے پر قائم رہوں گی۔‘ وہ میرے پاس آیا اور مجھے بانہوں میں لے کر کہا، ’یہی صحیح فیصلہ ہے۔‘ انہوں نے مزید لکھا، ’’میں زبردست تالیوں کی گونج میں ہال میں داخل ہوئی۔ ارکان پارلیمنٹ اپنی نشستوں پر کھڑے ہوگئے اور اپنے سامنے لکڑی کی میزوں پر ہاتھ مار کر تالیاں بجانے لگے۔ میں پارٹی رہنماؤں کے لیے رکھی گئی طویل میز کے درمیان اپنی جگہ پر پہنچی اور اس وقت تک کھڑی رہی جب تک کسی نے انہیں بیٹھنے کا اشارہ نہیں کیا، جس کے بعد ہم سب اپنی نشستوں پر بیٹھ گئے۔‘‘

اٹلی میں بچپن سے راجیو گاندھی سے ملاقات تک کا سفر

سونیا گاندھی کی یہ یادداشتیں ان کی زندگی کے مختلف ادوار کا احاطہ کرتی ہیں۔ کتاب میں جنگ کے بعد کے اٹلی میں ان کے بچپن، راجیو گاندھی سے محبت اور شادی، ہندوستان میں ان کی زندگی اور ان ذاتی صدمات کا ذکر کیا گیا ہے جنہوں نے ان کے اپنے اختیار کردہ ملک کے ساتھ تعلق کو نئی شکل دی۔ کتاب میں اٹلی میں گزرے ان کے بچپن، کیمبرج میں تعلیم کے دوران راجیو گاندھی سے ان کے تعلقات اور ان کی ساس و سابق وزیر اعظم اندرا گاندھی اور شوہر راجیو گاندھی کے قتل جیسے المناک واقعات کا بھی تذکرہ ہے۔ ناشر الفریڈ اے نوف نے 18 اگست کو اعلان کیا تھا کہ ’’بیلانگنگ: اے جرنی آف لو‘‘ 10 نومبر کو شائع کی جائے گی۔ واضح رہے کہ اٹلی میں پیدا ہونے والی سونیا گاندھی کی ملاقات 1965 میں انگلینڈ کے شہر کیمبرج میں راجیو گاندھی سے ہوئی تھی۔ اس وقت وہ 19 سال کی طالبہ تھیں۔ دونوں کی شادی 25 فروری 1968 کو ہوئی تھی۔

بھارت ایکسپریس اردو۔