Ram Mandir Inauguration: پران پر تیشٹھا تقریب میں چاروں شنکراچاریہ کے نہ جانے کی خبر غلط،کچھ شنکراچاریہ جائیں گے ایودھیا،بابا رام دیوکادعوی

یوگا گرو بابا رام دیو نے ایودھیا میں 22 جنوری کو ہونے والے رام مندر کے افتتاحی پروگرام میں چار شنکراچاریوں کے شرکت نہ کرنے کے حوالے سے متعلق بڑا دعوی کیا ہے۔ انہوں نے کہا کہ الگ الگ شنکراچاریوں کی مختلف رائے ہو سکتی ہے لیکن یہ بیان کہ چاروں شنکراچاریہ نہیں جا رہے ہیں غلط ہے۔

خبر رساں ایجنسی پی ٹی آئی سے بات کرتے ہوئے رام دیو نے کہا، “ان کی مختلف رائے ہو سکتی ہے لیکن یہ سچ نہیں ہے کہ چاروں شنکراچاریہ رام مندر پران پرتیشتھا پروگرام میں نہیں جائیں گے۔ کچھ شنکراچاریہ ایودھیا جا رہے ہیں اور چند نہیں جا رہے ہیں۔”

وزیر اعظم نریندر مودی 22 جنوری کو ایودھیا میں بنے رام مندرکا افتتاح  کریں گے۔ اس تقریب کے لیے ہندوستان اور بیرون ملک سے بہت سے مہمانوں کو دعوت نامے بھیجے گئے تھے۔ اس کے تحت چاروں شنکراچاریوں کو بھی مدعو کیا گیا تھا۔

میڈیا رپورٹس میں بتایا گیا کہ چاروں شنکر اچاریہ نے یہ کہتے ہوئے دعوت نامہ مسترد کر دیا کہ مندر کا تعمیری کام ابھی مکمل نہیں ہوا ہے اور ایسی صورت حال میں افتتاح کرنا نا مناسب ہے، لیکن اب کہا جا رہا ہے  سرینگری مٹھ کے شنکراچاریہ پروگرام کی حمایت کرتے نظر آ رہے ہیں۔

کامکوٹی مٹھ کے شنکراچاریہ نے بھی تائید کی ہے۔

ہفتہ (13 جنوری) کو، تمل ناڈو میں کانچی پورم کانچی کما کوٹی مٹھ کے شنکراچاریہ وجےندر سرسوتی سوامیگل نے افتتاحی تقریب کی حمایت کی ہے۔ انہوں نے کہا کہ اس خاص موقع پر 22 جنوری کو کاشی کے یگی شالا مندر میں کامکوٹی پیٹھ کی طرف سے 40 روزہ پوجا پروگرام کا انعقاد کیا جائے گا۔ یہ ہون 40 دن تک جاری رہے گا۔

شنکراچاریہ وجےندر سرسوتی سوامیگل نے مودی کی تعریف کی۔

شنکراچاریہ وجےندر سرسوتی سوامیگل نے وزیر اعظم نریندر مودی کی تعریف کی اور کہا کہ وزیر اعظم پورے ملک میں یاتری مقامات اور کمپلیکس کی ترقی پر زور دے رہے ہیں۔ ان کی قیادت میں کیدارناتھ اور کاشی وشوناتھ مندروں کو وسعت دی گئی ہے۔