SIT arrests Zafar Ali:  پوچھ گچھ کے بعد ایس آئی ٹی نے سنبھل شاہی جامع مسجد کے صدر ظفر علی کو کیا گرفتار، پولیس پر غیر آئینی طریقے سے کارروائی کرنے کا الزام

سنبھل: سنبھل کی شاہی جامع مسجد کے صدر ظفر علی کو ایس آئی ٹی نے پوچھ تاچھ کے بعد گرفتار کر لیا ہے۔ اس گرفتاری کے بعد پولیس ظفر علی کو گاڑی میں بٹھا کر لے گئی۔ ان کی گرفتاری کے بعد وکلاء نے احتجاج کیا۔

وکلا نے پولیس کی کارروائی کے خلاف نعرے لگائے اور اپنا احتجاج ریکارڈ درج کرایا۔ اس کے علاوہ سنبھل پولیس کے خلاف بھی نعرے لگائے گئے اور وکلاء نے گاڑی کے پیچھے بھاگتے ہوئے اپنا غصہ ظاہر کیا۔

اس معاملے پر ایڈووکیٹ شکیل احمد نے کہا کہ ظفر علی کا اب چالان ہو چکا ہے اور انہیں چندوسی لے جایا جا رہا ہے، جہاں ان کا طبی معائنہ کیا جائے گا۔ شکیل احمد نے یہ بھی کہا کہ وہ ظفر علی کی ضمانت کے لیے کوشش کریں گے کیونکہ پولیس انتظامیہ نے انہیں بے گناہ اور غلط طریقے سے گرفتار کیا ہے۔ ان کے مطابق پولیس کو ظفر علی کو گرفتار کرنے کا کوئی حق نہیں تھا اور یہ ساری کارروائی پولیس انتظامیہ کی دھاندلی اور غنڈہ گردی کا حصہ تھی۔ ایڈووکیٹ شکیل احمد نے واضح کیا کہ ظفر علی کی گرفتاری سراسر غلط ہے اور ان پر لگائے گئے الزامات بے بنیاد ہیں۔

آپ کو بتا دیں کہ اس سے پہلے کوتوالی پولیس نے انہیں پوچھ گچھ کے لیے اپنی تحویل میں لیا تھا۔ پولیس حکام ان سے پچھلے سال نومبر میں ہونے والے تشدد کے بارے میں پوچھ گچھ کر رہے تھے۔ امن و امان کے پیش نظر پولیس فورس کی بھاری نفری تعینات کی گئی اور انتظامیہ پوری طرح چوکس ہے۔

ظفر علی کے بڑے بھائی محمد طاہر نے الزام لگایا تھا کہ یہ ’غیر آئینی اقدام‘ صدر کو عدالتی کمیشن میں بیان دینے سے روکنے کے لیے کیا گیا۔ انہوں نے بتایا کہ پولیس ظفر علی کو جیل بھیجنا چاہتی ہے۔ پولیس چاہتی ہے کہ وہ کوئی بیان نہ دیں۔ لیکن وہ وہی بیان دیں گے جو انہوں نے کمیشن کے سامنے دیا ہے۔

محمد طاہر نے بتایا کہ ظفر علی کو ہفتے کے روز جوڈیشل کمیشن کی جانب سے سمن موصول ہوا تھا۔ انہیں جانا تھا۔ پولیس نے انہیں روکنے کے لیے ’’غیر آئینی کارروائی‘‘ کی ہے۔ ہم اپنی جنگ لڑتے رہیں گے۔ جوڈیشل کمیشن میں کہا ہے، وہی بیان دیں گے۔

بھارت ایکسپریس۔