Siddaramaiah has made history: سدارامیا نے تاریخ رقم کر دی، دیوراج اُرس کا ریکارڈ ٹوٹ گیا، ڈی کے شیوکمار نے دی مبارکباد

بنگلورو: کرناٹک کی سیاست میں ایک تاریخی لمحہ اس وقت رقم ہوا جب وزیراعلیٰ سدارامیا نے 7 جنوری 2026 کو ریاست کے سب سے طویل عرصے تک وزیراعلیٰ رہنے کا ریکارڈ اپنے نام کر لیا۔ اس کے ساتھ ہی انہوں نے کانگریس کے سینئر رہنما اور سابق وزیراعلیٰ دیوراج اُرس کا دہائیوں پرانا ریکارڈ توڑ دیا۔

سدارامیا کے دونوں ادوار کی تفصیل

سدارامیا کا پہلا دور وزارت اعلیٰ 13 مئی 2013 سے 15 مئی 2018 تک رہا، جو مجموعی طور پر 1,829 دن پر مشتمل تھا۔ اس کے بعد وہ دوسری بار 20 مئی 2023 کو وزیر اعلیٰ بنے اور اب تک 964 دن مکمل کر چکے ہیں۔ یوں مجموعی طور پر سدارامیا نے کرناٹک کے وزیر اعلیٰ کی حیثیت سے 2,793 دن پورے کر لیے ہیں، جو اب تک کا سب سے طویل دورانیہ ہے۔

دیوراج اُرس کا ریکارڈ ٹوٹ گیا

اس طویل مدت کے ساتھ ہی سدارامیا نے سابق وزیر اعلیٰ دیوراج اُرس کا ریکارڈ بھی توڑ دیا۔ دیوراج اُرس نے 1972 تا 1977 اور 1978 تا 1980 کے درمیان دو ادوار میں وزیر اعلیٰ کی ذمہ داریاں نبھائی تھیں۔ انہیں کرناٹک میں سماجی انصاف اور زمین اصلاحات کی علامت کے طور پر یاد کیا جاتا ہے۔

ڈپٹی وزیر اعلیٰ ڈی کے شیوکمار کا ردعمل

اس موقع پر کرناٹک کے نائب وزیراعلیٰ ڈی کے شیوکمار نے وزیر اعلیٰ سدارامیا کو مبارکباد دیتے ہوئے کہا کہ یہ ریاست کے لیے فخر کا لمحہ ہے۔ انہوں نے کہا: ’’یہ ایک تاریخی کامیابی ہے، سدارامیا کا نام تاریخ میں درج ہو گیا ہے۔ میں انہیں دل سے مبارکباد پیش کرتا ہوں۔‘‘

ڈی کے شیوکمار کے مؤقف کے سیاسی معنی

حال ہی میں کرناٹک کانگریس میں وزیراعلیٰ کے عہدے کو لے کر جاری قیاس آرائیوں اور کھینچا تانی کے پس منظر میں ڈی کے شیوکمار کا یہ بیان خاصا معنی خیز سمجھا جا رہا ہے۔ قابل ذکر ہے کہ 2023 میں کانگریس کی حکومت بننے کے بعد ڈھائی سالہ فارمولا طے ہونے کی خبریں سامنے آئی تھیں، جس کے تحت پہلے ڈھائی سال سدارامیا اور بعد کے ڈھائی سال ڈی کے شیوکمار کے وزیراعلیٰ بننے کی بات کہی گئی تھی۔ سیاسی مبصرین کے مطابق، ڈی کے شیوکمار کی جانب سے سدارامیا کو دی گئی کھلی مبارکباد اس بات کا اشارہ ہو سکتی ہے کہ پارٹی قیادت نے فی الحال اندرونی اختلافات کو قابو میں کر لیا ہے۔ تاہم مستقبل میں سیاسی صورتحال کس رخ اختیار کرے گی، اس بارے میں کچھ کہنا قبل از وقت ہوگا۔

بھارت ایکسپریس اردو۔