PM Modi Wishes to Shivraj Singh Chohan: سادگی، سادہ مزاجی اور کسانوں کے ہمدرد: وزیر اعظم مودی کی جانب سے مرکزی وزیر شیوراج سنگھ چوہان کو یومِ پیدائش پر مبارکباد

بھارتی سیاست کے اُن منتخب چہروں میں سے ایک، جنہوں نے اپنی جڑوں کو کبھی نہیں چھوڑا، مرکزی وزیرِ زراعت شیوراج سنگھ چوہان اپنا 67واں یومِ پیدائش منا رہے ہیں۔ مدھیہ پردیش کی سیاست سے لے کر دہلی کے اقتدار کے ایوانوں تک، “ماما” کے نام سے مقبول شیوراج سنگھ چوہان اپنی انکساری اور عوامی خدمت کے لیے ایک مثال سمجھے جاتے ہیں۔ ان کے یومِ پیدائش کے موقع پر وزیر اعظم نریندر مودی نے نہ صرف انہیں مبارکباد دی بلکہ ان کے ساتھ اپنی دہائیوں پر محیط وابستگی اور ان کے کسان دوست اقدامات کو بھی یاد کیا۔

زرعی شعبے کی ترقی کے لیے مسلسل محنت کر رہے ہیں

وزیر اعظم نریندر مودی نے اپنے سرکاری سوشل میڈیا ہینڈل ‘ایکس’ پر شیوراج سنگھ چوہان کو مبارکباد دیتے ہوئے لکھا: مرکزی وزیر شیوراج سنگھ چوہان کو ان کے یومِ پیدائش پر دل کی گہرائیوں سے مبارکباد۔ وزیراعظم نریندر مودی نے مزید کہا کہ “وہ اپنے نرم مزاج اور عوام سے قریبی تعلق کے لیے بہت پسند کیے جاتے ہیں۔ وہ ہمارے کسانوں کی فلاح و بہبود اور زرعی شعبے کی ترقی کے لیے انتھک محنت کر رہے ہیں۔ ہم ان کی طویل عمر اور صحت مند زندگی کی دعا کرتے ہیں۔”

یومِ پیدائش پر شیوراج سنگھ کا پیغام

اپنے یومِ پیدائش کے موقع پر شیوراج سنگھ چوہان نے بھی ایک پیغام دیا۔ انہوں نے کہا کہ “یومِ پیدائش خوشی اور مسرت کے ساتھ منایا جاتا ہے۔ چاروں طرف خوشیاں ہوتی ہیں، لیکن جب میں اپنے یومِ پیدائش کے بارے میں سوچتا ہوں تو میرے ذہن میں ایک خیال آتا ہے کہ زندگی کا ایک اور سال گزر گیا، اور جو باقی زندگی ہے اس کا کس طرح بامعنی استعمال کیا جائے۔”ان کے مطابق یومِ پیدائش ہمیں اپنے آپ کو بہتر بنانے اور سماج کے لیے کچھ کرنے کا عہد لینے کا موقع فراہم کرتا ہے۔

‘تمام جاندار ہمارے جیسے ہیں’

شیوراج سنگھ چوہان نے مزید کہا کہ ہم سب میں ایک ہی شعور موجود ہے۔ صرف انسان ہی نہیں بلکہ جانور، پرندے، کیڑے مکوڑے اور درخت پودے بھی اسی شعور کا حصہ ہیں۔ اس لیے ہمیں ہر جاندار اور فطرت کے ساتھ محبت اور احترام کا رویہ رکھنا چاہیے۔ انہوں نے بتایا کہ ہماری  مذہبی کتابوں میں لکھا ہے “آتْمَوَتْ سَرْوَ بھوتیشُو” یعنی تمام مخلوقات کو اپنے جیسا سمجھنا چاہیے۔ اسی جذبے کے ساتھ ہمیں سب سے محبت کرنی چاہیے اور نفرت، تشدد یا لڑائی جھگڑے سے دور رہنا چاہیے۔ان کا ماننا ہے کہ محبت کی سب سے بڑی شکل خدمت میں ظاہر ہوتی ہے۔ جب ہم کسی کی مدد کرتے ہیں اور کسی کی خدمت کرتے ہیں تو ہمارا پیار حقیقی معنوں میں سامنے آتا ہے۔ انہوں نے کہا کہ اس یومِ پیدائش پر ان کا عزم یہی ہے کہ وہ ہمیشہ خدمت اور محبت کے جذبے کے ساتھ سماج کے لیے کام کرتے رہیں گے۔ اس کے ساتھ ہی انہوں نے ماحولیات کے تحفظ کو بھی اپنی ترجیحات میں شامل بتایا۔ انہوں نے کہا کہ درخت ہماری زندگی کے لیے کتنے ضروری ہیں، یہ بات عام آدمی بھی سمجھتا ہے کیونکہ آکسیجن، پھل اور سایہ سب کچھ ہمیں درختوں سے ہی ملتا ہے۔

بھارت ایکسپریس اردو۔