Sharad Pawar on Rahul Gandhi & Sanjay Singh: راہل گاندھی ایک دن ملک کی قیادت کریں گے،سنجے سنگھ کی گرفتاری سے انڈیا اتحاد کو ہوگا فائدہ:شرد پوار

این سی پی کے سربراہ شرد پوار نے بدھ کو کہا کہ ‘بھارت جوڑو یاترا’ کے بعد راہل گاندھی کو سنجیدگی سے لیا جا رہا ہے۔ وہ ایک دن ملک کی قیادت کریں گے۔ آپ کو بتاتے چلیں کہ راہل گاندھی کی بھارت جوڑو یاترا کو ایک سال ہو چکا ہے۔ یہ یاترا 7 ستمبر 2022 کو نکالی گئی تھی،اور ملک کی کئی ریاستوں سے ہوتی ہوئی 30 جنوری 2023 کو سری نگر میں اختتام پذیر ہوئی۔ شرد پوار نے ایک پروگرام کے دوران کہا، ’’بھارت جوڑو یاترا کے بعد راہل گاندھی کو سنجیدگی سے لیا جا رہا ہے اور ایک دن وہ ملک کی قیادت کریں گے۔‘‘ این سی پی کے باغیوں کا ذکر کرتے ہوئے انہوں نے کہا کہ جو لوگ بی جے پی کے ساتھ چلے گئے ، ان کا این سی پی سے کوئی لینا دینا نہیں ہے اور انہوں نے تفتیشی ایجنسیوں کے خوف سےخیمہ بدل لیا ہے۔ شرد پوار نے یہ بھی کہا کہ ان کی پارٹی کے بی جے پی سے ہاتھ ملانے کا سوال ہی پیدا نہیں ہوتا۔

سنجے سنگھ کی گرفتاری سے انڈیا اتحاد مضبوط ہو گا

دوسری جانب عام آدمی پارٹی کے راجیہ سبھا ممبر پارلیمنٹ سنجے سنگھ کی گرفتاری پر این سی پی کے سربراہ شرد پوار نے کہا کہ مرکزی تفتیشی ایجنسی کی کارروائی سے انڈیا اتحاد مزید مضبوط ہوگا۔ ساتھ ہی شرد پوار نے دہلی کی لوک سبھا سیٹوں کے حوالے سے بھی اپنی رائے ظاہر کی۔ پوار نے کہا کہ دہلی کے وزیر اعلی اروند کجریوال نے حال ہی میں ان سے کہا تھا کہ عام آدمی پارٹی قومی راجدھانی میں سات میں سے تین سیٹیں کانگریس کو دینے کے لیے تیار ہے۔ پوار نے یہ بھی یقین ظاہر کیا کہ اتر پردیش میں کانگریس دوبارہ ابھرے گی۔

مہاراشٹر میں 50 فیصد لوک سبھا سیٹیں جیتیں گے – پوار

سابق مرکزی وزیر شرد پوار نے یہ بھی دعویٰ کیا کہ مہاراشٹرا میں مہا وکاس اگھاڑی دوبارہ حکومت بنائے گی۔ پوار نے کہا، ”یقینی طور پر، ہم مہاراشٹر میں حکومت بنائیں گے۔ ہم یہ خلوص دل سے محسوس کرتے ہیں۔ گزشتہ لوک سبھا انتخابات میں ہم نے یہاں صرف چار سیٹیں جیتی تھیں۔ لیکن اس بار اگر ہمیں 50 فیصد سیٹیں ملیں تو مجھے حیرانی نہیں ہوگی۔

بھارت ایکسپریس۔