Shahi Eidgah Mathura dispute :شاہی عید گاہ تنازعہ میں مسلم فریق کی درخواست پر سپریم کورٹ میں سماعت آج

سپریم کورٹ آج متھرا میں کرشن جنم بھومی-شاہی عیدگاہ تنازعہ میں مسلم فریق کی درخواست پر سماعت کرے گا۔ مسلم فریق نے الہ آباد ہائی کورٹ کے اس حکم کے خلاف عرضی دائر کی ہے جس میں کرشن جنم بھومی-شاہی عیدگاہ تنازعہ سے متعلق 18 مقدمات کی قبولیت  کو چیلنج کرنے والی ان کی عرضی کو مسترد کر دیا گیا تھا۔ یہ 18 درخواستیں ہندو فریق نے دائر کی ہیں۔جسٹس سنجیو کھنہ اور جسٹس سنجے کمار کی بنچ ہائی کورٹ کے یکم اگست کے حکم کے خلاف شاہی مسجد عیدگاہ کی مینجمنٹ ٹرسٹ کمیٹی کی طرف سے دائر درخواست کی سماعت کرے گی۔ مسجد مینجمنٹ کمیٹی کی درخواست ایڈووکیٹ آر ایچ اے سکندر کے ذریعے دائر کی گئی ہے۔

یکم اگست کو ہائی کورٹ نے متھرا میں مندر-مسجد تنازعہ سے متعلق 18 مقدمات کی  قبولیت کو چیلنج کرنے والی درخواست کو مسترد کر دیا تھا اور فیصلہ دیا تھا کہ شاہی عیدگاہ کے مذہبی کردار کا تعین کرنے کی ضرورت ہے۔ ہائی کورٹ نے مسلم فریق کے اس استدلال کو مسترد کر دیا تھا کہ کرشن جنم بھومی مندر سے متصل شاہی عیدگاہ مسجد کمپلیکس کے تنازعہ سے متعلق ہندو وکیلوں کے دائر کردہ مقدمے ورشپ (خصوصی دفعات) ایکٹ کی خلاف ورزی کرتے ہیں اور اس لیے وہ قابل قبول نہیں ہیں۔ 1991کا یہ قانون ملک کی آزادی کے دن موجود کسی بھی مذہبی مقام کے مذہبی کردار کو تبدیل کرنے سے منع کرتا ہے۔ صرف رام جنم بھومی بابری مسجد تنازع کو اس کے دائرہ سے باہر رکھا گیا۔

 ہندو فریق کی جانب سے درج مقدمات میں اورنگ زیب دور کی شاہی عیدگاہ مسجد کو ہٹانے کا مطالبہ کیا گیا ہے۔ ان کا دعویٰ ہے کہ یہ ایک مندر کو گرانے کے بعد بنایا گیا تھا جو کبھی وہاں موجود تھا۔ہندو فریق کا دعویٰ ہے کہ یہ مسجد ایک مندر کو گرانے کے بعد بنائی گئی تھی۔ ہائی کورٹ نے کہا تھا کہ متنازعہ مقام پر مندر اور مسجد دو دو مذہبی کردار نہیں رکھ سکتے، جو ایک ہی وقت میں ایک دوسرے سے متصادم ہیں۔ ہائی کورٹ کے جج نے کہا تھا، ‘یا تو متنازعہ جگہ مسجد ہے یا مندر۔ میرا خیال ہے کہ متنازعہ جگہ کے مذہبی کردار، جیسا کہ یہ 15 اگست 1947 کو موجود تھا، کا تعین دونوں فریقین کی قیادت میں دستاویزی اور زبانی شواہد سے کیا جانا چاہیے۔

بھارت ایکسپریس۔