Gujarat Earthquake Today: گجرات کے ان شہروں میں ایک کے بعد ایک 7 زلزلے کے جھٹکے، رات بھر خوف میں مبتلا رہے لوگ،انتظامیہ الرٹ

گجرات کے جیت پور، دھوراجی اور اُپلیٹا پنتھک علاقوں میں جمعہ 9 جنوری کی صبح مسلسل زلزلے کے جھٹکوں سے خوف و ہراس کی فضا قائم ہو گئی۔ انسٹی ٹیوٹ آف سیسمولوجیکل ریسرچ کے مطابق گزشتہ 12 گھنٹوں کے دوران اس خطے میں مجموعی طور پر 7 زلزلے کے جھٹکے ریکارڈ کیے گئے ہیں، جس کے باعث لوگ رات بھر دہمے میں مبتلا رہے اور گھروں سے باہر نکل آئے۔آئی ایس آر کے اعداد و شمار کے مطابق سب سے پہلا زلزلہ گزشتہ رات 8 بج کر 43 منٹ پر محسوس کیا گیا، جس کی شدت ریکٹر اسکیل پر 3.3 درج کی گئی۔ اس زلزلے کا مرکز اُپلیٹا سے تقریباً 30 کلومیٹر دور تھا۔ اس کے بعد جمعہ کی علی الصبح سب سے شدید جھٹکا صبح 6 بج کر 19 منٹ پر آیا، جس کی شدت 3.8 ریکارڈ کی گئی۔

ذرائع کے مطابق ان تمام زلزلوں کا مرکز بنیادی طور پر اُپلیٹا سے 27 سے 30 کلومیٹر مشرق-شمال مشرقی سمت میں واقع رہا۔ زلزلوں کی گہرائی زمین کی سطح سے 6.1 کلومیٹر سے لے کر 13.6 کلومیٹر کے درمیان ماپی گئی ہے۔ اگرچہ زلزلوں کی شدت کم سے درمیانی سطح کی تھی، لیکن بار بار جھٹکوں کی وجہ سے عوام میں شدید خوف پیدا ہو گیا۔اطمینان کی بات یہ رہی کہ اب تک کسی بھی قسم کے جانی یا مالی نقصان کی کوئی اطلاع موصول نہیں ہوئی ہے۔ تاہم مسلسل جھٹکوں کے باعث کئی علاقوں میں لوگ احتیاطاً گھروں سے باہر نکل آئے اور رات بھر کھلے مقامات پر رہے۔ انتظامیہ نے صورتحال پر گہری نظر رکھی ہوئی ہے اور لوگوں کو افواہوں سے دور رہنے کی ہدایت دی گئی ہے۔

زلزلوں کے پیش نظر راجکوٹ ضلع کے دھوراجی شہر میں کئی نجی اسکولوں کے منتظمین نے احتیاطی طور پر آج اسکول بند رکھنے کا فیصلہ کیا۔ طلبہ کی سلامتی کو مدنظر رکھتے ہوئے یہ قدم اٹھایا گیا۔ جو بچے صبح اسکول پہنچ چکے تھے، انہیں بھی واپس گھروں کو بھیج دیا گیا۔ماہرین کے مطابق گجرات زلزلے کے لحاظ سے ایک حساس ریاست ہے۔ یہاں کَچھ فالٹ، کٹرول ہلز فالٹ اور نالیا فالٹ جیسی کئی اہم فالٹ لائنیں موجود ہیں، جہاں زمینی پلیٹوں میں مسلسل دباؤ بنتا رہتا ہے۔ جب یہ دباؤ خارج ہوتا ہے تو زلزلے کی صورت میں جھٹکے محسوس ہوتے ہیں۔

اس کے علاوہ بھارتی ٹیکٹانک پلیٹ کا شمال کی جانب سرکنا اور یوریشین پلیٹ سے ٹکراؤ بھی زلزلوں کی ایک بڑی وجہ ہے۔ اس کا اثر صرف ہمالیہ تک محدود نہیں بلکہ کَچھ اور گجرات کے علاقوں تک پھیلا ہوا ہے۔ ماہرین کا کہنا ہے کہ کَچھ کا علاقہ ایک قدیم رفٹ زون بھی ہے، جہاں زمین پہلے سے کمزور ہونے کی وجہ سے بار بار ہلکے سے درمیانی درجے کے زلزلے آتے رہتے ہیں۔

بھار ت ایکسپریس اردو