Retd Justice B.R. Gavai sets up a new precedent: ریٹائر چیف جسٹس بی آر گوی نے قائم کی مثال— عہدہ چھوڑتے ہی سرکاری گاڑی واپس کر دی، جانشین کے لیے راستہ ہموار

بھارت کے سبکدوش ہونے والے چیف جسٹس، جسٹس بی آر گوی نے عدالتی تاریخ میں ایک بے مثال اور قابل تقلید قدم اٹھاتے ہوئے اعلیٰ منصب کے وقار اور اخلاقی اقدار کی شاندار مثال پیش کی ہے۔ شایانِ شان الوداعی تقریب کے اختتام پر انہوں نے وہ سرکاری گاڑی چھوڑ دی جو دستوراً چیف جسٹس آف انڈیا کے لیے مختص ہوتی ہے اور وہ خود ایک متبادل گاڑی میں واپس روانہ ہوئے، تاکہ یہ یقینی بنایا جا سکے کہ ان کے جانشین کے لیے سرکاری گاڑی دستیاب رہے اور انہیں کسی قسم کی رسمی یا عملی دشواری کا سامنا نہ کرنا پڑے۔

سرکاری اور  عوامی حلقوں میں ستائش

یہ واقعہ راشٹرپتی بھون میں اس وقت پیش آیا جب جسٹس بی آر گوی نے سبکدوشی کے بعد سرکاری پروٹوکول جاری رکھنے کے بجائے اعلیٰ اخلاقی مثال قائم کرتے ہوئے عہدے کے احترام کو ذاتی سہولت پر ترجیح دی۔ ان کے اس فیصلے کو نہ صرف عدالتی اور سرکاری حلقوں میں سراہا جا رہا ہے بلکہ عوامی سطح پر بھی انہیں ایک اصول پسند اور منکسر المزاج شخصیت کے طور پر خراجِ تحسین پیش کیا جا رہا ہے۔

’ریٹائرمنٹ کے بعد کوئی سرکاری منصب قبول نہیں کریں گے‘

واضح رہے کہ جسٹس بی آر گوی نے اتوار کے روز اپنے عہدے کی مدت مکمل کی۔ وہ بھارت کے 52ویں چیف جسٹس رہے اور اپنے عہدے کے دوران کئی اہم اور تاریخی فیصلے سنائے۔ سبکدوشی سے قبل انہوں نے کہا تھا کہ وہ ریٹائرمنٹ کے بعد کوئی سرکاری منصب قبول نہیں کریں گے اور اپنی زندگی سادگی، خدمت اور قانونی تحقیق کے لیے وقف کریں گے۔ مانا جا رہا ہے کہ ان کا یہ عمل آنے والی نسلوں کے لیے ایک مثبت پیغام ہے کہ عزت و منصب کا اصل وقار اصولوں، سادگی اور ذمہ داری میں پوشیدہ ہے۔ قانونی ماہرین کے مطابق یہ قدم حکومتی عہدوں پر فائز شخصیات کے لیے شفافیت اور اخلاقی اقدار کا نیا معیار ثابت ہو گا۔جسٹس گوی کے اس عمل نے اداروں کی حرمت کے احترام اور مضبوط جمہوری روایت کے تصور کو بھی تقویت دی ہے۔ عوامی حلقوں کا کہنا ہے کہ اگر تمام اعلیٰ عہدوں پر فائز رہنے والی شخصیات اسی جذبے کے ساتھ بروکار رہیں تو ملک کی جمہوریت اور نظام عدل مزید بہتر ہو سکتا ہے۔یہ مثال آنے والے چیف جسٹس اور دیگر اعلیٰ افسران کے لیے ایک روشن رہنما اصول ثابت ہو سکتی ہے، جو اقتدار سے زیادہ اخلاق اور ذمہ داری کو اہمیت دینے کی ترغیب فراہم کرتی ہے۔

بھارت ایکسپریس اردو۔