Dr. Majid Ahmad Talikote: معروف کینسر سرجن ڈاکٹر ماجد احمد تالیکوٹی کو انڈیا-جی سی سی ٹریڈ کونسل نے اعزازی ہیلتھ کمشنر مقرر کیا

انڈیا-جی سی سی ٹریڈ کونسل نیوز: نئی دہلی میں منعقدہ ایک شاندار تقریب میں انڈیا-گلف کوآپریشن کونسل (انڈیا-جی سی سی) نے معروف آنکولوجسٹ ڈاکٹر ماجد احمد تالیکوٹی کو اپنا پہلا اعزازی ہیلتھ کمشنر مقرر کیا۔ اس اہم موقع پر ڈاکٹر تالیکوٹی کو خصوصی تقرری کا ایک خط پیش کیا گیا جس میں اس عہدے سے متعلق تمام حقوق، مراعات اور اختیارات کی وضاحت ہے۔

سرحدی بندشوں سے بے نیاز صحت کی خدمات: ڈاکٹر تالیکوٹی نے ہندوستان اور خلیجی ممالک کے لیے مشترکہ حکمت عملی کا منصوبہ پیش کیا

اس عہدے کو قبول کرتے ہوئے ڈاکٹر تالیکوٹی نے کہا ’’یہ عہدہ نہ صرف ایک اعزاز ہے بلکہ ہندوستان اور خلیجی ممالک (یو اے ای، سعودی عرب، بحرین، عمان، کویت اور قطر) کے درمیان صحت کے شعبے میں تعاون کو مضبوط کرنے کا ایک سنہرا موقع بھی ہے۔ سرحدوں، خطّوں اور مذاہب سے بالاتر ہوکر صحت مند قوموں کی تعمیر ہی میرا مقصد ہے۔‘‘

ڈاکٹر تالیکوٹی پر انعامات کی بارش:’’100 سب سے زیادہ بااثر ہندوستانی مسلمان‘‘ سے لے کر عالمی صحت کے سفیر تک کا سفر

ڈاکٹر تالیکوٹی کو حال ہی میں مسلم مرِر کی ’’2024 کے 100 بااثر ہندوستانی مسلمان‘‘ فہرست میں شامل کیا گیا ہے۔ انڈیا-جی سی سی ٹریڈ کونسل کی طرف سے دیا جانے والا یہ اعزاز اس کے فوراً بعد ان کی کامیابیوں میں ایک اور اہم اضافہ ہے۔ اس سے قبل انھیں دبئی میں 2025 ہیلتھ کیئر ایکسی لینس ایشین عرب ایوارڈ سے بھی نوازا جا چکا ہے۔

سستے علاج کی ایک مثال: جھارکھنڈ کے بوکارو میں ڈاکٹر تالیکوٹی کا 600 بستروں کا ‘میڈیکنٹ ہاسپٹل‘

ڈاکٹر تالیکوٹی نہ صرف ایک مشہور سرجن ہیں بلکہ وہ جھارکھنڈ کے بوکارو میں 600 بستروں والے میڈیکنٹ ہاسپٹل کے چیئرمین بھی ہیں۔ یہ اسپتال علاقے کے مریضوں کو انتہائی مناسب قیمت پر اعلیٰ معیار کا علاج فراہم کرتا ہے۔ ڈاکٹر تالیکوٹی کا ایک نمایاں اصول یہ ہے کہ ’’صحت کی دیکھ بھال کا کام عیش و آرام کے لیے نہیں کرنا چاہیے‘‘۔ ان کے اس اصول نے ہزاروں غریب لوگوں کی زندگیوں میں امید کی کرنیں روشن کر رکھی ہیں۔

اس نئے کردار کے ساتھ ڈاکٹر تالیکوٹی کی پیش رفت سے صحت کی سفارت کاری کا ایک نیا باب شروع ہو رہا ہے، جس میں طب اور بین الاقوامی تعاون ایک صحت مند دنیا کی تعمیر کے لیے مل کر کام کریں گے۔

بھارت ایکسپریس اردو