الیکشن کمیشن نے راجیہ سبھا کی 37 نشستوں کے لیے انتخابی پروگرام کا اعلان کر دیا ہے۔ یہ نشستیں اپریل 2026 میں ریٹائر ہونے والے اراکین کی وجہ سے خالی ہو رہی ہیں اور ان کا تعلق 10 ریاستوں سے ہے۔ اس سلسلے میں نوٹیفکیشن 26 فروری 2026 کو جاری کیا جائے گا۔ کاغذاتِ نامزدگی داخل کرنے کی آخری تاریخ 5 مارچ مقرر کی گئی ہے۔ نامزدگی فارموں کی جانچ 6 مارچ کو ہوگی، جبکہ کاغذات واپس لینے کی آخری تاریخ 9 مارچ 2026 ہے۔ ووٹنگ 16 مارچ 2026 کو صبح 9 بجے سے شام 4 بجے تک ہوگی۔ ووٹوں کی گنتی اسی دن شام 5 بجے شروع کی جائے گی۔ انتخابی عمل مکمل کرنے کی آخری تاریخ 20 مارچ 2026 مقرر کی گئی ہے۔

کن ریاستوں کی کتنی نشستیں خالی؟

جاری نوٹیفکیشن کے مطابق راجیہ سبھا کی کل 37 نشستیں 10 ریاستوں سے خالی ہو رہی ہیں۔ ان میں مہاراشٹر سے سب سے زیادہ 7 نشستیں، تمل ناڈو اور بہار سے 6-6، مغربی بنگال سے 5، اڈیشہ سے 4، آسام سے 3، تلنگانہ، چھتیس گڑھ اور ہریانہ سے 2-2 جبکہ ہماچل پردیش سے 1 نشست خالی ہو رہی ہے۔ یہ نشستیں اپریل میں ریٹائر ہونے والے اراکین کی وجہ سے خالی ہوں گی۔ بتایا جا رہا ہے کہ مہاراشٹر میں شرد پوار جیسے سرکردہ رہنماؤں کی نشستیں بھی شامل ہو سکتی ہیں، جہاں انہوں نے دوبارہ انتخاب لڑنے کی خواہش ظاہر کی ہے۔ 288 رکنی مہاراشٹر اسمبلی میں ایک راجیہ سبھا نشست کے لیے 37 ووٹ درکار ہوتے ہیں، جس کے باعث وہاں سخت مقابلے کا امکان ہے۔

ریاست	خالی نشستیں
مہاراشٹر	7
اوڈیشہ	4
تمل ناڈو	6
مغربی بنگال	5
آسام	3
بہار	5
چھتیس گڑھ	2
ہماچل	1
تلنگانہ	2
ہریانہ	2

کیا ہوگی انتخابی عمل کی صورت؟

یہ انتخابات ریاستی اسمبلیوں کے اراکین کے ذریعے کرائے جاتے ہیں، اس لیے نتائج کا انحصار اراکین اسمبلی کی تعداد اور سیاسی جماعتوں کی طاقت پر ہوگا۔ الیکشن کمیشن پہلے ہی متعلقہ ریاستوں کے چیف الیکٹورل آفیسرز کو ریٹرننگ آفیسرز کی تقرری کے لیے خطوط ارسال کر چکا ہے۔ واضح رہے کہ راجیہ سبھا میں کل 245 ارکان ہوتے ہیں، جن میں سے 233 منتخب کیے جاتے ہیں جبکہ 12 ارکان صدر جمہوریہ کی جانب سے نامزد کیے جاتے ہیں۔ یہ انتخابات چھ سالہ دورانیے کے چکر کا حصہ ہوتے ہیں۔ ووٹنگ خفیہ رائے دہی کے ذریعے ہوگی اور ہر رکن اسمبلی کو ایک نشست کے لیے ایک ووٹ دینے کا حق حاصل ہوگا۔

اہم تاریخیں ایک نظر میں

نوٹیفکیشن جاری ہونا: 26 فروری 2026

کاغذات نامزدگی داخل کرنے کی آخری تاریخ: 5 مارچ 2026

نامزدگیوں کی جانچ: 6 مارچ 2026

نام واپس لینے کی آخری تاریخ: 9 مارچ 2026

ووٹنگ: 16 مارچ 2026 (صبح 9 بجے سے شام 4 بجے تک)

ووٹوں کی گنتی: 16 مارچ 2026 شام 5 بجے سے

انتخابی عمل مکمل کرنے کی آخری تاریخ: 20 مارچ 2026

بھارت ایکسپریس اردو۔