Rajnath Singh’s Appeal: راج ناتھ سنگھ کی عوام سے اپیل، کہا- پٹرول-ڈیزل اور ایل پی جی سے متعلق افواہوں سے بچیں، گھبراہٹ میں نہ کریں خریداری

نئی دہلی کے کرتویہ بھون میں وزراء کے غیر رسمی اختیاراتی گروپ (IGOM) کی ایک اہم میٹنگ منعقد ہوئی، جس کی صدارت وزیر دفاع راج ناتھ سنگھ نے کی۔ اجلاس میں ملک کو درپیش موجودہ اور ممکنہ چیلنجز کے پیش نظر کئی اہم معاملات پر تفصیلی تبادلۂ خیال کیا گیا۔

عوام سے اہم اپیل

حکومت نے شہریوں سے اپیل کی ہے کہ وہ پٹرول، ڈیزل اور ایل پی جی جیسی ضروری اشیا کی خریداری میں کسی قسم کی گھبراہٹ کا مظاہرہ نہ کریں۔ حکام نے واضح کیا کہ ملک میں سپلائی کا نظام پوری طرح معمول کے مطابق ہے اور ایندھن کا وافر ذخیرہ موجود ہے۔ اس لیے افواہوں یا خدشات کی بنیاد پر اضافی خریداری کرنے کی کوئی ضرورت نہیں ہے۔

مغربی ایشیا کی صورتحال پر غور

اجلاس میں مغربی ایشیا کی بدلتی صورتحال اور سکیورٹی منظرنامے پر خصوصی توجہ دی گئی۔ گفتگو اس بات پر مرکوز رہی کہ اگر خطے میں کشیدگی بڑھتی ہے تو اس کا اثر بھارت کی توانائی سپلائی، سمندری تجارتی راستوں، نقل و حمل کے نظام اور دیگر ضروری خدمات پر کس طرح پڑ سکتا ہے۔ حکومت نے ممکنہ خطرات کا جائزہ لیتے ہوئے تیاریوں کا بھی تفصیلی معائنہ کیا۔اس کے ساتھ بیرونِ ملک مقیم بھارتی شہریوں کی سلامتی کے معاملے پر بھی غور کیا گیا۔ ضرورت پڑنے پر انہیں محفوظ طریقے سے واپس لانے اور ہنگامی انتظامات سے متعلق منصوبوں پر بھی بات چیت ہوئی۔

حکومت کی تیاریاں جاری

اجلاس کے بعد وزیر دفاع راج ناتھ سنگھ نے کہا کہ حکومت تمام ضروری اشیا کی دستیابی یقینی بنانے کے لیے مسلسل کام کر رہی ہے۔ انہوں نے بتایا کہ موجودہ حالات میں تمام وزارتوں اور متعلقہ ایجنسیوں کو چوکس رہنے اور باہمی تال میل کے ساتھ کام کرنے کی ہدایت دی گئی ہے۔ اس میٹنگ میں وزیر صحت جگت پرکاش نڈا، وزیر پیٹرولیم ہردیپ سنگھ پوری، وزیر ریلوے اشونی ویشنو، پارلیمانی امور کے وزیر کرن رجیجو سمیت کئی سینئر وزراء بھی شریک ہوئے۔

بھارت ایکسپریس اردو۔