Priyanka Gandhi’s road show in Varanasi: پرینکا گاندھی 25 مئی کو وزیر اعظم کے پارلیمانی حلقے میں کریں گی روڈ شو، وارانسی میں یکم جون کو ساتویں اور آخری مرحلے کی ہوگی ووٹنگ

وارانسی: کانگریس جنرل سکریٹری پرینکا گاندھی واڈرا پارٹی کے لوک سبھا امیدوار اور ریاستی کانگریس صدر اجے رائے کی حمایت میں 25 مئی کو وارانسی میں روڈ شو کریں گی۔ وزیر اعظم نریندر مودی ہائی پروفائل سیٹ وارانسی سے مسلسل تیسری بار رکن پارلیمنٹ بننے کا دعویٰ کر رہے ہیں۔

اجے رائے نے بدھ کے روز کہا، “ہاں، پرینکا گاندھی 25 مئی کو وارانسی میں انتخابی مہم چلائیں گی اور روڈ شو کریں گی۔” اجے رائے گزشتہ چند دنوں سے یہاں پر بھرپور طریقے سے انتخابی مہم چلا رہے ہیں۔

پرینکا گاندھی واڈرا کانگریس کے اسٹار پرچارکوں میں شامل ہیں۔ اپنے بھائی راہل اور پارٹی کے دیگر سینئر لیڈروں کی طرح وہ بھی مختلف ریاستوں میں انتخابی مہم چلا رہی ہیں۔

انہوں نے حال ہی میں رائے بریلی میں بھی انتخابی مہم چلائی تھی جہاں سے راہل گاندھی امیدوار ہیں۔ امیٹھی میں انہوں نے کے ایل شرما کے لیے انتخابی تشہیر کی۔ وارانسی میں یکم جون کو ساتویں اور آخری مرحلے کی ووٹنگ ہونی ہے۔

کانگریس کے شہر صدر راگھویندر چوبے نے کہا کہ 25 تاریخ کی شام کو روڈ شو منعقد کیا جائے گا۔ پرینکا گاندھی اپنے روڈ شو کا آغاز بی ایچ یو سنگھ گیٹ پر واقع پنڈت مدن موہن مالویہ کے مجسمے پر پھول چڑھا کر کریں گے۔ یہ روڈ شو لنکا سے شروع ہو کر درگا کنڈ، بھیلو پور، ریواڑی تالاب، چرچ اسکوائر، نئی سڑک، بینیا باغ، چیت گنج، لہورابیر سے ہوتے ہوئے مالدہیہ کے پٹیل چوراہے پر پہنچے گا۔ یہاں پرینکا اور ریاستی کانگریس صدر اور وارانسی سیٹ سے کانگریس کے امیدوار اجے رائے سردار ولبھ بھائی پٹیل کے مجسمے پر پھول چڑھا کر روڈ شو کا اختتام کریں گے۔

چوبے نے کہا کہ کانگریس کے علاوہ اس کی ذیلی تنظیموں کانگریس سیوا دل، یوتھ کانگریس، مہیلا کانگریس، اقلیتی کانگریس، آئی این ٹی یو سی کے کارکنان کی ایک بڑی تعداد سات کلومیٹر طویل روڈ شو میں شرکت کرے گی۔ ان کے علاوہ سماج وادی پارٹی کے ساتھ ساتھ انڈیا اتحاد میں شامل دیگر پارٹیوں کے عہدیدار اور کارکن بھی اس روڈ شو کا حصہ ہوں گے۔ روڈ شو کے راستے میں مختلف مقامات پر مختلف تنظیموں کی جانب سے سبھی لیڈران کا استقبال کیا جائے گا۔

بھارت ایکسپریس۔