Priyanka Gandhi challenges BJP: وزیراعظم مودی اور امت شاہ پر نہیں رہا لوگوں کا بھروسہ، پرینکا گاندھی نے کیا بی جے پی کو منصفانہ الیکشن لڑنے کا چیلنج، ’ووٹ چوری‘ کا الزام دہرایا

نئی دہلی: کانگریس کی سینئر رہنما اور وائناڈ سے رکن پارلیمنٹ پرینکا گاندھی واڈرا نے اتوار کو بی جے پی پرعوام کا اعتماد کھو دینے کا الزام لگاتے ہوئے اسے منصفانہ طریقے سے الیکشن لڑنے کا چیلنج دیا۔ دہلی کے رام لیلا میدان میں منعقدہ کانگریس کی ریلی ’ووٹ چور، گدی چھوڑ‘ سے خطاب کرتے ہوئے انہوں نے ایک بار پھر ’ووٹ چوری‘ کے الزامات کو دوہرایا۔

منصفانہ الیکشن لڑ کر دکھائیں: پرینکا گاندھی

ریلی سے خطاب کرتے ہوئے پرینکا گاندھی نے کہا ’’اگر بی جے پی منصفانہ الیکشن لڑنا چاہتی ہے تو میں انہیں چیلنج دیتی ہوں، بیلٹ کے ذریعے الیکشن لڑ کر دکھائیں۔ وہ خود جانتے ہیں کہ اس صورت میں وہ جیت نہیں سکتے۔ بہار میں جو ہوا، پورا ملک دیکھ رہا ہے کہ یہ جیت چوری کے ذریعے حاصل کی گئی ہے۔‘‘

پارلیمنٹ میں بی جے پی کا اعتماد متزلزل

پرینکا گاندھی نے دعویٰ کیا کہ پارلیمنٹ کے اندر بھی بی جے پی رہنماؤں کا اعتماد کمزور پڑ چکا ہے۔ انہوں نے کہا ’’پارلیمنٹ میں ہم دیکھ سکتے ہیں کہ ان کا اعتماد ختم ہو چکا ہے۔ وہ ہماری آنکھوں میں آنکھیں ڈال کر بات نہیں کرسکتے۔ سر جھکا کر گزر جاتے ہیں، کیونکہ عوام اب بی جے پی، اس کی حکومت، وزیراعظم نریندر مودی اور امت شاہ پر بھروسہ نہیں کرتے۔‘‘

اہم عوامی مسائل سے بحث سے گریز کا الزام

کانگریس رہنما نے حکومت پر الزام لگایا کہ وہ عوام کے حقیقی مسائل پر بحث سے گھبراتی ہے۔ ان کا کہنا تھا کہ ’’راہل گاندھی کے دباؤ کے بعد ہی حکومت کو الیکشن اور اسپیشل انٹینسیو ریویژن (SIR) پر بحث پر آمادہ ہونا پڑا۔ لیکن آخر میں بحث کو وندے ماترم کی تاریخ تک محدود کر دیا گیا، جبکہ بے روزگاری، مہنگائی، پیپر لیک جیسے سنگین مسائل پر بات کرنے کی ہمت حکومت میں نہیں ہے۔‘‘

عدلیہ اور میڈیا پر دباؤ کا دعویٰ

پرینکا گاندھی نے مزید الزام لگایا کہ ملک میں عدالتی نظام پر دباؤ ہے اور میڈیا چند بڑے صنعت کاروں کے قبضے میں ہے۔ انہوں نے کہا ’’آج عدلیہ دباؤ میں ہے، میڈیا اڈانی یا امبانی کے قبضے میں ہے۔ پچھلے الیکشن میں کانگریس کے لیڈروں کو جیل میں ڈالا گیا، پارٹی کے بینک اکاؤنٹس منجمد کیے گئے اور ای ڈی، انکم ٹیکس اور سی بی آئی کو سیاسی ہتھیار کے طور پر استعمال کیا گیا۔‘‘

سیاسی جدوجہد کا اعلان

کانگریس کی اس ریلی کو پارٹی نے الیکشن میں مبینہ بے ضابطگیوں کے خلاف فیصلہ کن جدوجہد کا حصہ قرار دیا ہے۔ پارٹی قیادت کا کہنا ہے کہ ’ووٹ چوری‘ اور SIR کے معاملے پر یہ مہم مزید تیز کی جائے گی اور بی جے پی حکومت کو عوام کے سامنے جواب دہ بنایا جائے گا۔

بھارت ایکسپریس اردو۔