Black Swan Summit Odisha: انڈیا اے آئی امپیکٹ سمٹ عالمی ٹیکنالوجی کے استعمال میں گیم چینجر ثابت ہوگا: صدر دروپدی مرمو

بھونیشور: صدرِ جمہوریہ دروپدی مرمو نے کہا ہے کہ مجوزہ انڈیا اے آئی امپیکٹ سمٹ بھارت کے لیے عالمی سطح پر مصنوعی ذہانت (اے آئی) کے مؤثر اور عوامی مفاد میں استعمال کا ایک طاقتور ذریعہ بن کر ابھرے گا اور یہ سمٹ ملک کو عالمی اے آئی قیادت کے صفِ اول میں کھڑا کرنے میں اہم کردار ادا کرے گا۔ وہ اڈیشہ کے دارالحکومت بھونیشور میں منعقدہ بلیک سوان سمٹ سے خطاب کر رہی تھیں۔ صدر مرمو نے کہا کہ انڈیا اے آئی امپیکٹ سمٹ محض ایک تکنیکی تقریب نہیں بلکہ اسے جامع اور ہمہ گیر ترقی کے ایک اسٹریٹجک پلیٹ فارم کے طور پر دیکھا جانا چاہیے۔ ان کے مطابق اس سمٹ کے ذریعے عالمی اے آئی مہارت، جدید ٹیکنالوجی اور اختراعی حل بھارت کے عوامی نظام سے جوڑے جائیں گے، جس کا براہِ راست فائدہ عام شہریوں، بالخصوص محروم طبقات کو پہنچے گا۔

صدر جمہوریہ نے بتایا کہ یہ عالمی سطح کا اے آئی سمٹ اسی ماہ نئی دہلی میں منعقد ہونے جا رہا ہے، جس میں تقریباً 100 ممالک کی شرکت متوقع ہے۔ انہوں نے کہا کہ اتنی بڑی بین الاقوامی شرکت اس بات کا ثبوت ہے کہ بھارت تیزی سے ایک ذمہ دار، قابلِ اعتماد اور مستقبل دوست ٹیکنالوجی لیڈر کے طور پر ابھر رہا ہے۔ ان کے مطابق یہ سمٹ عالمی تعاون، پالیسی سازی اور اختراعی شراکت داری کے نئے دروازے کھولے گا۔

انہوں نے اس بات پر زور دیا کہ مصنوعی ذہانت کو سماج کے ان طبقات تک مواقع پہنچانے کے لیے استعمال کیا جانا چاہیے جو تاریخی طور پر ترقی کے مرکزی دھارے سے دور رہے ہیں۔ صدر مرمو نے اڈیشہ حکومت کی تعریف کرتے ہوئے کہا کہ ریاست نے حکمرانی، صحت، تعلیم اور زراعت جیسے شعبوں میں اے آئی کو اپنانے کے لیے قابلِ ستائش اقدامات کیے ہیں، جو دیگر ریاستوں کے لیے مثال بن سکتے ہیں۔

تاہم صدر نے اے آئی کے ممکنہ خطرات سے بھی خبردار کیا۔ انہوں نے ڈیپ فیک، غلط معلومات، ڈیجیٹل فریب اور سائبر فراڈ جیسے چیلنجز کا ذکر کرتے ہوئے کہا کہ ٹیکنالوجی کے استعمال کے ساتھ اخلاقی اقدار، شفافیت اور مضبوط ضابطہ جاتی نظام ناگزیر ہے۔ واضح رہے کہ انڈیا اے آئی امپیکٹ سمٹ 2026 19 اور 20 فروری کو نئی دہلی کے بھارت منڈپم میں منعقد ہوگا، جبکہ اس سے منسلک نمائش اور دیگر سرگرمیاں 16 سے 20 فروری تک جاری رہیں گی۔ اس نمائش میں 300 سے زائد نمائش کنندگان اور 500 سے زیادہ اے آئی اسٹارٹ اپس کی شرکت متوقع ہے، جب کہ 18 فروری کو آئی آئی آئی ٹی حیدرآباد کے تعاون سے اے آئی تحقیق پر خصوصی مباحثہ بھی منعقد کیا جائے گا۔

بھارت ایکسپریس اردو۔