PM Modi’s advice on yield concerns: پیداوار کی فکر پر پی ایم مودی کا مشورہ، چھوٹے حصے سے شروع کریں قدرتی کھیتی، نتائج دیکھیں پھر اسے دیں وسعت

نئی دہلی: کسان دِوس کے موقع پر منگل کے روز وزیر اعظم نریندر مودی کے سرکاری ایکس اکاؤنٹ سے ایک ویڈیو شیئر کی گئی، جس میں وزیر اعظم نے کسانوں کو قدرتی کھیتی اختیار کرنے کا مشورہ دیا اور دالوں کی کاشت کو فروغ دینے پر زور دیا۔2.41 منٹ کے اس ویڈیو میں دالوں کی کاشت کرنے والے کسان کرشن کمار وزیر اعظم مودی کے ساتھ اپنی حالیہ گفتگو کا حوالہ دیتے ہوئے مرکزی حکومت کی اسکیموں کی بھرپور تعریف کرتے نظر آتے ہیں۔

ایکس پر شیئر کی گئی مودی اسٹوری میں بتایا گیا ہے کہ کسان دِوس کسانوں کو صرف اناج دینے والے کے طور پر نہیں بلکہ قوم کے معمار کے طور پر مناتا ہے۔ دھن-دھانیا یوجنا اور دالوں میں خود کفالت مشن کے آغاز کے موقع پر دال کے کاشتکاروں کو وزیر اعظم سے گفتگو کے لیے مدعو کیا گیا تھا، جن میں کسان کرشن کمار بھی شامل تھے۔ شیئر کیے گئے ویڈیو میں کسان کی سادگی اور وزیر اعظم کی کسانوں کے تئیں حساسیت واضح طور پر نظر آتی ہے۔

ویڈیو میں وزیر اعظم مودی نے سوال کیا، ’’آپ نے دالوں کی کھیتی شروع کی، یہ کیسے ممکن ہوا؟‘‘ اس پر کرشن کمار نے بتایا کہ قدرتی کھیتی نے ان کے کھیتوں کی حالت بدل دی ہے۔ وزیر اعظم نے کہا کہ بھارت کو دالوں کی پیداوار میں خود کفیل بننا چاہیے اور کیمیائی مادّوں کے استعمال کو کم یا مکمل طور پر ختم کرنا چاہیے۔

کسانوں کی پیداوار سے متعلق تشویش کو سمجھتے ہوئے وزیر اعظم نے مشورہ دیا، ’’قدرتی کھیتی کی شروعات کھیت کے ایک چھوٹے حصے سے کریں، نتائج دیکھیں اور پھر آہستہ آہستہ اسے پورے کھیت میں نافذ کریں۔”

ویڈیو میں فصل بیمہ یوجنا، کسان سمان ندھی اور اب دھن-دھانیا یوجنا کا بھی ذکر کیا گیا ہے۔ پوسٹ میں کہا گیا ہے کہ وزیر اعظم مودی کا طریقۂ کار کسانوں کو عزت، تحفظ اور اعتماد فراہم کرتا ہے۔ کسان دِوس پر کرشن کمار جیسی کہانیاں یہ یاد دلاتی ہیں کہ بااختیار کسان ہی مضبوط ملک کی بنیاد ہوتے ہیں۔

یہ ویڈیو سوشل میڈیا پر تیزی سے وائرل ہو رہی ہے اور لوگ وزیر اعظم کی کسان مرکوز پالیسیوں اور قدرتی کھیتی کو فروغ دینے کے اقدامات کی ستائش کر رہے ہیں۔ واضح رہے کہ کسان دِوس سابق وزیر اعظم چودھری چرن سنگھ کی جینتی کے موقع پر منایا جاتا ہے، جو کسانوں کے بڑے ہمدرد مانے جاتے تھے۔

بھارت ایکسپریس۔