PM Modi Rajkot Visit: راجکوٹ سے کھلے گا خوشحالی کا دروازہ، وزیر اعظم مودی کریں گے ریجنل وائبرنٹ سمٹ کا افتتاح، 22 ممالک کے سرکردہ نمائندے ہوں گے شریک

راجکوٹ: سوراشٹر-کچھ خطے کے صنعتی اور معاشی فروغ کو نئی رفتار دینے کے مقصد سے 11 جنوری سے راجکوٹ میں شاندار ریجنل وائبرنٹ سمٹ کا انعقاد کیا جا رہا ہے۔ اس اہم سمٹ کا افتتاح وزیر اعظم نریندر مودی کریں گے۔ ریاستی کابینہ وزیر جیتو واگھانی نے میڈیا کو بتایا کہ وزیر اعظم کے استقبال کے لیے ایک عظیم الشان روڈ شو کی بھی منصوبہ بندی کی جا رہی ہے۔ وزیر اعظم کے دورے کو لے کر پورے سوراشٹر خطے میں زبردست جوش و خروش پایا جا رہا ہے اور عوام بے صبری سے ان کے استقبال کی تیاریوں میں مصروف ہیں۔ حکومتی ذرائع کے مطابق یہ سمٹ سوراشٹر-کچھ کو سرمایہ کاری اور صنعتی ترقی کے ایک نئے مرکز کے طور پر قائم کرنے کی سمت میں ایک سنگِ میل ثابت ہوگی۔

کابینہ وزیر نے بتایا کہ وزیر اعظم مودی مارواڑی یونیورسٹی میں منعقد ہونے والے ٹریڈ شو کا بھی افتتاح کریں گے۔ اس ریجنل وائبرنٹ سمٹ میں یوکرین، جاپان، جمہوریہ کوریا سمیت 22 ممالک کے نمائندے شرکت کریں گے۔ سمٹ کے دوران مختلف شعبوں میں کروڑوں روپے کے مفاہمتی یادداشتوں (ایم او یوز) پر دستخط کیے جائیں گے، جس سے خطے میں سرمایہ کاری، روزگار کے مواقع اور صنعتی سرگرمیوں کو نمایاں فروغ ملے گا۔

سمٹ کے دوران وزیر اعظم مودی کا استقبال ’’سودیشی‘‘ تھیم کے تحت کیا جائے گا، جس میں بھارت کی ثقافتی وراثت، مقامی مصنوعات اور روایتی ہنر کو خصوصی طور پر اجاگر کیا جائے گا۔ اب تک اس سمٹ کے لیے 6 ہزار سے زائد رجسٹریشن ہو چکے ہیں، جو سرمایہ کاروں اور صنعتکاروں کے بڑھتے اعتماد کی علامت ہے۔

ریجنل وائبرنٹ سمٹ کے دوران مختلف موضوعات پر راؤنڈ ٹیبل اجلاس بھی منعقد ہوں گے، جن میں صنعت، تجارت، اختراع اور سرمایہ کاری سے متعلق اہم امور پر غور و خوض کیا جائے گا۔ اس کے ساتھ ہی نمائش کو مزید پرکشش بنانے کے لیے سیمینارز، فوڈ کورٹ، ’’ایک ضلع-ایک مصنوعات‘‘ کی جھلک اور متنوع ثقافتی پروگراموں کا اہتمام کیا جائے گا۔ اڈانی اور ریلائنس جیسی ملک کی بڑی صنعتی کمپنیاں بھی اس سمٹ میں اپنی شرکت درج کرائیں گی۔ ان سرگرمیوں کے ذریعے سوراشٹر-کچھ خطے کی قومی اور بین الاقوامی سطح پر برانڈنگ کو مضبوط بنانے کی کوشش کی جائے گی۔ مجموعی طور پر یہ سمٹ خطے میں معاشی خوشحالی، صنعتی ترقی اور روزگار کے نئے امکانات کے دروازے کھولنے جا رہی ہے۔

بھارت ایکسپریس اردو