PM Modi to visit Andhra Pradesh and Karnataka today: وزیر اعظم نریندر مودی آج آندھرا پردیش اور کرناٹک کے دورے پر، متعدد ترقیاتی منصوبوں کا افتتاح اور سنگِ بنیاد رکھیں گے

نئی دہلی: وزیر اعظم نریندر مودی ہفتہ کے روز آندھرا پردیش اور کرناٹک کے ایک روزہ دورے پر رہیں گے۔ اس دوران وہ علاقائی اور معاشی ترقی کو رفتار دینے کے مقصد سے بنیادی ڈھانچے، رابطہ کاری، توانائی اور ٹیکنالوجی سے متعلق کئی اہم منصوبوں کا افتتاح کریں گے اور نئے منصوبوں کا سنگِ بنیاد بھی رکھیں گے۔

بھوگاپورم بین الاقوامی ہوائی اڈے کا افتتاح

آندھرا پردیش میں وزیر اعظم بھوگاپورم میں واقع الّوری سیتا رام راجو بین الاقوامی ہوائی اڈے کا افتتاح کریں گے۔ عوامی و نجی شراکت داری کے ماڈل کے تحت پانچ ہزار چھ سو چالیس کروڑ روپے سے زائد کی لاگت سے تعمیر کیے گئے اس گرین فیلڈ ہوائی اڈے کی سالانہ گنجائش 60 لاکھ مسافروں کی ہے۔ توقع ہے کہ اس سے سیاحت، تجارت، سرمایہ کاری اور روزگار کے مواقع میں نمایاں اضافہ ہوگا، جبکہ خطے میں فضائی رابطہ بھی مزید مضبوط ہوگا۔

وزیر اعظم کا پیغام

دورے سے قبل وزیر اعظم مودی نے سماجی رابطے کے پلیٹ فارم ایکس پر اپنے پیغام میں کہا کہ بھوگاپورم میں قائم ہونے والا یہ جدید اور مستقبل کی ضروریات سے ہم آہنگ ہوائی اڈہ رابطے، تجارت اور سیاحت کو فروغ دے گا۔ انہوں نے کہا کہ اس منصوبے میں پائیداری اور توانائی کی بچت کے اصولوں کا بھی خیال رکھا گیا ہے۔

سیمی کنڈکٹر منصوبے کی بنیاد رکھی جائے گی

وزیر اعظم وشاکھاپٹنم میں اے ایس آئی پی سیمی کنڈکٹر منصوبے کا سنگِ بنیاد بھی رکھیں گے۔ یہ آندھرا پردیش کا پہلا سیمی کنڈکٹر مینوفیکچرنگ مرکز ہوگا، جسے انڈیا سیمی کنڈکٹر مشن کے تحت منظوری دی گئی ہے۔ چار سو ساٹھ کروڑ روپے کی سرمایہ کاری سے قائم ہونے والے اس مرکز میں ہر سال تقریباً نو کروڑ ساٹھ لاکھ سیمی کنڈکٹر چپس تیار کیے جانے کی توقع ہے۔ اس منصوبے سے اعلیٰ مہارت والے روزگار کے مواقع پیدا ہوں گے اور ریاست میں سیمی کنڈکٹر صنعت کے لیے مضبوط ماحولیاتی نظام تشکیل پائے گا۔

قابلِ تجدید توانائی کے منصوبوں پر توجہ

قابلِ تجدید توانائی کے شعبے میں وزیر اعظم کرنول چار قابلِ تجدید توانائی زون کے انضمام کے لیے ٹرانسمیشن نظام کے پہلے مرحلے، جس کی گنجائش 4 اعشاریہ 5 گیگاواٹ ہے، کا سنگِ بنیاد رکھیں گے۔ پاور گرڈ کی جانب سے خصوصی مقصدی ادارے کے ذریعے نافذ کیے جانے والے اس منصوبے پر 5 ہزار 5 سو 50 کروڑ روپے کی سرمایہ کاری کی جا رہی ہے۔ اس کے علاوہ وہ کرنول کے ہوا سے بجلی پیدا کرنے والے زون اور آندھرا پردیش کے شمسی توانائی زون کے لیے تین ہزار پانچ سو پچاس کروڑ روپے کی لاگت سے تیار کیے گئے ٹرانسمیشن نظام کے حصہ الف اور حصہ ب کا افتتاح بھی کریں گے۔ اننت پور میں 2 ہزار 5 سو میگاواٹ اور کرنول میں 1 ہزار میگاواٹ شمسی توانائی منصوبوں کے لیے 8 سو 20 کروڑ روپے کی لاگت سے تیار کردہ ٹرانسمیشن اسکیم بھی قوم کے نام وقف کی جائے گی۔ ان منصوبوں سے کرنول اور اننت پور میں پیدا ہونے والی قابلِ تجدید توانائی قومی گرڈ کے ذریعے ملک کے مختلف حصوں تک پہنچائی جا سکے گی۔

قومی شاہراہوں کے منصوبوں کا افتتاح

وزیر اعظم 1 ہزار 880 کروڑ روپے مالیت کے قومی شاہراہ منصوبوں کا افتتاح اور سنگِ بنیاد بھی رکھیں گے۔ ان میں قومی شاہراہ 365 بی جی پر ریچیَرلا سے گرووایا گوڈیم اور گرووایا گوڈیم سے دیوراپلے تک چار رویہ گرین فیلڈ شاہراہ، قومی شاہراہ 67 پر تاڈی پتری بائی پاس، اور قومی شاہراہ 565 پر پنچالاکونا۔ایرپیڈو سیکشن کے لنگا سمودرم علاقے میں بلند سطحی پل شامل ہیں۔ ان منصوبوں سے وجئے واڑہ اور دیگر شہری علاقوں میں ٹریفک کا دباؤ کم ہونے، سڑکوں کی حفاظت بہتر ہونے، وشاکھاپٹنم اور حیدرآباد کے درمیان سفر کا وقت گھٹنے اور علاقائی رابطے کو فروغ ملنے کی امید ہے۔

کرناٹک میں بھی مختلف پروگرام

آندھرا پردیش کے پروگراموں کے بعد وزیر اعظم مودی کرناٹک کے شہر میسورو جائیں گے، جہاں وہ سوامی وویکانند کلچرل یوتھ سینٹر وویک اسمارک کا افتتاح کریں گے اور ایک عوامی جلسے سے خطاب بھی کریں گے۔

بھارت ایکسپریس۔