Prime Minister Modi: دہلی میں ماحولیات پر بڑا بین الاقوامی اجلاس، وزیر نریندر اعظم مودی 19 ستمبر کو کریں گے افتتاح

نئی دہلی: وزیر اعظم نریندر مودی کل یعنی 19 ستمبر کو ’ماحولیات اور آب و ہوا کی حرکیات کا مستقبل‘ کے موضوع پر منعقد ہونے والی ایک اہم بین الاقوامی کانفرنس کا افتتاح کریں گے۔ دو روزہ اس کانفرنس کا انعقاد نیشنل گرین ٹریبونل (این جی ٹی) کی جانب سے کیا جا رہا ہے۔ اس کانفرنس کی خاص بات یہ ہے کہ اس میں صرف بھارت ہی نہیں بلکہ 17 ممالک کے جج اور عدالتی نمائندے بھی شرکت کریں گے۔ اس کے علاوہ سپریم کورٹ، ہائی کورٹس اور ضلعی عدالتوں کے جج، ماحولیات سے متعلق ماہرین، مختلف وزارتوں کے سکریٹریز اور کئی سینئر سرکاری افسران بھی اس پروگرام کا حصہ بنیں گے۔ کانفرنس میں بنیادی طور پر اس بات پر زور دیا جائے گا کہ ماحولیات سے متعلق قوانین صرف کاغذوں تک محدود نہ رہیں بلکہ انہیں مؤثر طریقے سے زمینی سطح پر بھی نافذ کیا جائے۔ اکثر دیکھا گیا ہے کہ پالیسیاں تو اچھی بنائی جاتی ہیں، لیکن ان کے نفاذ میں کئی خامیاں رہ جاتی ہیں۔ یہ کانفرنس ان خامیوں کو دور کرنے اور ادارہ جاتی تعاون کو مضبوط بنانے کے لیے ایک اہم پلیٹ فارم فراہم کرے گی۔

صاف ہوا کوئی آسائش نہیں بلکہ بنیادی حق

حال ہی میں ’نیلے آسمان کے لیے صاف ہوا کے عالمی دن‘ کے موقع پر این جی ٹی کے چیئرمین جسٹس پرکاش شریواستو نے کہا تھا کہ صاف ہوا کوئی آسائش یا عیش و آرام کی چیز نہیں بلکہ ہر انسان کا بنیادی حق ہے۔ انہوں نے کہا تھا کہ آلودگی کسی ملک یا شہر کی سرحدوں کو نہیں دیکھتی، اس لیے اس سے نمٹنے کے لیے اجتماعی طور پر سرحدوں سے آگے بڑھ کر سوچنے کی ضرورت ہے۔ جسٹس شریواستو کے مطابق ترقی اور ماحولیات کا تحفظ ایک ساتھ آگے بڑھ سکتے ہیں۔ دونوں ایک دوسرے کے مخالف نہیں ہیں بلکہ بہتر زندگی کے لیے ان کے درمیان توازن ضروری ہے۔ انہوں نے مقامی اداروں اور عام شہریوں سے بھی اپیل کی کہ آلودگی کے خاتمے کے لیے جدید ٹیکنالوجی کا استعمال کیا جائے اور ہر شخص اپنی ذمہ داری کو سمجھے، تاکہ آنے والی نسلیں صاف اور کھلی ہوا میں سانس لے سکیں۔

حکومت کا سائنسی اور مربوط طریقہ کار

اسی سمت میں مرکزی ماحولیات کی وزارت بھی مسلسل اقدامات کر رہی ہے۔ ماحولیات کے سکریٹری تنمے کمار کے مطابق حکومت وزیر اعظم مودی کے وژن کے مطابق آلودگی سے نمٹنے کے لیے سائنسی اور مکمل طور پر مربوط طریقہ کار اختیار کر رہی ہے۔ اس دوران ’نیشنل کلین ایئر پروگرام‘ کے تحت بہتر کارکردگی کا مظاہرہ کرنے والے شہروں اور وارڈز کو اعزاز سے بھی نوازا گیا ہے، تاکہ دیگر علاقوں کو بھی صاف ہوا کے لیے کیے جانے والے اقدامات سے ترغیب مل سکے۔

بھارت ایکسپریس اردو۔