PM Modi greets President Murmu on birthday: وزیر اعظم مودی  سمیت ان لیڈروں نے صدرجمہوریہ دروپدی مرمو کو یوم پیدائش پر دی مبارکباد

نئی دہلی :بھارت کی صدرِ جمہوریہ دروپدی مرمو کے یوم پیدائش کے موقع پر ملک بھر سے مبارکبادوں کا سلسلہ جاری ہے۔ وزیر اعظم نریندر مودی سمیت متعدد مرکزی وزراء اور سیاسی لیڈروں نے انہیں مبارکباد پیش کرتے ہوئے ان کی صحت، خوشی اور درازیٔ عمر کے لیے نیک خواہشات کا اظہار کیا۔وزیر اعظم نریندر مودی نے ہفتہ کی صبح سوشل میڈیا پلیٹ فارم ’ایکس‘ پر اپنے پیغام میں لکھا، ’’بھارت کی صدر دروپدی مرمو کو یومِ پیدائش کی دلی مبارکباد۔ ان کی زندگی کا سفر حوصلے، سادگی، انکساری اور عوامی خدمت کے لیے غیر متزلزل عزم سے عبارت ہے، جو ملک بھر کے لوگوں کے لیے باعثِ تحریک ہے۔

انہوں نے کہا کہ صدر مرمو نے عوامی زندگی کے اپنے طویل دور میں ملک کی شاندار خدمت کی ہے اور وہ خاص طور پر محروم اور پسماندہ طبقات کی فلاح و بہبود کے لیے ہمیشہ سرگرم رہی ہیں۔ وزیر اعظم  مودی نے ان کی بہترین صحت اور طویل عمر کے لیےپرارتھنا کرتے ہوئے کہا کہ وہ آج اڈیشہ میں ہونے والی ایک تقریب میں صدر مرمو سے ملاقات کے منتظر ہیں۔

راج ناتھ سنگھ کی مبارکباد

وزیر دفاع راج ناتھ سنگھ نے اپنے پیغام میں کہا کہ صدر دروپدی مرمو نے اپنی پوری زندگی سماج کی خدمت اور عوام کو بااختیار بنانے کے لیے وقف کر رکھی ہے۔ انہوں نے کہا کہ جامع ترقی، سماجی انصاف اور عوامی فلاح کے لیے ان کی وابستگی حقیقی عوامی خدمت کی عکاسی کرتی ہے۔

STORY | PM Modi greets President Murmu on birthday

Prime Minister Narendra Modi on Saturday conveyed his birthday greetings to President Droupadi Murmu and said her journey, marked by courage, simplicity, humility and unwavering commitment to public service, continues to inspire… https://t.co/CHx2lz2MDn

— Press Trust of India (@PTI_News) June 20, 2026

ہردیپ سنگھ پوری کا خراج تحسین

مرکزی وزیر برائے پٹرولیم و قدرتی گیس ہردیپ سنگھ پوری نے صدر مرمو کو ایک مثالی رہنما قرار دیتے ہوئے کہا کہ ان کی زندگی کا سفر حوصلے، استقامت اور قوم کے تئیں غیر معمولی وابستگی کی علامت ہے۔ انہوں نے کہا کہ صدر مرمو کو پورے ملک میں عزت و احترام کی نگاہ سے دیکھا جاتا ہے۔

شیوراج سنگھ چوہان نے کہا: جمہوری اقدار کی بہترین مثال

مرکزی وزیر زراعت شیوراج سنگھ چوہان نے صدر مرمو کی سادہ پس منظر سے ملک کے اعلیٰ ترین آئینی منصب تک پہنچنے کی جدوجہد کو بھارت کی جمہوری طاقت کی علامت قرار دیا۔ انہوں نے کہا کہ ان کی زندگی بالخصوص خواتین اور محروم طبقات کے لیے مشعلِ راہ ہے، جو انہیں بڑے خواب دیکھنے اور سماجی خدمت کے لیے آگے بڑھنے کی ترغیب دیتی ہے۔انہوں نے مزید کہا کہ بھگوان جگن ناتھ کی کرپا صدر مرمو پر ہمیشہ قائم رہے اور وہ قوم کی رہنمائی کرتی رہیں۔

دیگر لیڈروں  کی نیک خواہشات

وزیر مملکت برائے خارجہ کیرتی وردھن سنگھ نے اپنے پیغام میں کہا کہ صدر مرمو کا غیر معمولی سفر، عوامی خدمت کے لیے ان کی لگن اور آئینی اقدار سے وابستگی لاکھوں بھارتیوں کے لیے باعثِ تحریک ہے۔اسی طرح وزیر مملکت برائے اقلیتی امور و ماہی پروری جارج کورین نے بھی صدر دروپدی مرمو کو یومِ پیدائش کی مبارکباد دیتے ہوئے ان کی صحت، خوشی اور کامیابی کے لیے نیک تمناؤں کا اظہار کیا۔صدر دروپدی مرمو کی زندگی اور عوامی خدمت کا سفر آج بھی ملک کے کروڑوں شہریوں کے لیے امید، حوصلے اور عزم کی علامت سمجھا جاتا ہے۔

بھارت ایکسپریس اردو