PM Modi receives warm welcome: بیونس آئرس میں وزیراعظم نریندر مودی کا پرتپاک خیرمقدم، ارجنٹینا کے صدر خاوئیر میلئی نے گلے مل کر کیا شاندار استقبال

بیونس آئرس: وزیراعظم نریندر مودی کا ارجنٹینا کے دارالحکومت بیونس آئرس پہنچنے پر پرتپاک خیرمقدم کیا گیا، جہاں ارجنٹینا کے صدر خاوئیر میلئی نے انہیں گلے لگا کر خوش آمدید کہا۔ دونوں رہنماؤں کی یہ گرمجوشی دونوں ممالک کے بڑھتے ہوئے تعلقات کی علامت بنی۔

سان مارٹن میموریل پر خراج عقیدت، آزادی کے عالمی ہیروز کو خراج

وزیراعظم مودی نے بیونس آئرس میں پہنچنے کے بعد پہلے مرحلے میں سان مارٹن میموریل پر حاضری دی اور ارجنٹینا کے عظیم مجاہد آزادی خوسے دی سان مارٹن کو خراج عقیدت پیش کیا۔ یہ یادگار ارجنٹینا، چلی، اور پیرو کی آزادی کی علامت اور لاطینی امریکہ میں خودمختاری و آزادی کا تاریخی نشان سمجھی جاتی ہے۔ مودی کی یہ حاضری عالمی سطح پر آزادی کے متوالوں کے لیے بھارت کی جانب سے عزت و احترام کا اظہار ہے اور بھارت کی خودمختاری اور مشترکہ اقدار کی عکاسی کرتی ہے۔

پانچ ملکی دورے کا تیسرا مرحلہ: ارجنٹینا میں سرکاری مصروفیات

وزیراعظم مودی ارجنٹینا کے سرکاری دورے پر جمعہ کو ایزیزا انٹرنیشنل ایئرپورٹ پر اترے، جہاں ان کا استقبال صدر خاوئیر میلئی کی دعوت پر کیا گیا۔ یہ دورہ مودی کے پانچ ملکی دورے کا تیسرا مرحلہ ہے۔ ان کی مصروفیات میں دونوں ممالک کے درمیان جاری تعاون کا جائزہ لینا، دفاع، زراعت، کان کنی، تیل و گیس، قابل تجدید توانائی، تجارت و سرمایہ کاری اور عوامی تعلقات جیسے اہم شعبوں میں شراکت داری کو مزید مضبوط بنانے کے طریقوں پر گفتگو شامل ہے۔

ہندوستانی برادری کی محبت اور روایتی رقص

وزیراعظم مودی کے ہوٹل پہنچنے پر ارجنٹینا میں مقیم ہندوستانی برادری نے ان کا پُرجوش خیرمقدم کیا۔ اس موقع پر روایتی بھارتی رقص کا مظاہرہ کیا گیا اور بھارت ماتا کی جے اور مودی-مودی‘ کے نعرے گونجے۔ وزیراعظم نے بھی عوام سے ملاقات کی اور ان کے جذبے کو سراہا۔ مودی نے اپنے سوشل میڈیا پلیٹ فارم ایکس (سابقہ ٹویٹر) پر اظہار تشکر کرتے ہوئے لکھا: فاصلہ ثقافتی ربط میں رکاوٹ نہیں بن سکتا! بیونس آئرس میں ہندوستانی برادری کی محبت بھری میزبانی میرے لیے باعثِ فخر ہے۔ ہزاروں کلومیٹر دور ہو کر بھی بھارت کی روح ان کے ذریعے چمکتی ہے۔ انہوں نے مزید لکھا کہ بیونس آئرس پہنچ چکا ہوں، اس دورے کا مقصد بھارت-ارجنٹینا تعلقات کو فروغ دینا ہے۔ صدر خاویر مائیلے سے ملاقات اور تفصیلی تبادلہ خیال کا منتظر ہوں۔

ثقافتی رابطے اور سفارتی رشتوں کی نئی جہت

وزیراعظم مودی کا یہ دورہ نہ صرف بھارت-ارجنٹینا تعلقات کو نئی توانائی فراہم کرے گا بلکہ ہندوستانی برادری کی وابستگی اور ثقافتی ہم آہنگی کو بھی اجاگر کرتا ہے۔ ان کی آمد کو برادری نے ایک قومی فخر اور تہذیبی جشن کے طور پر منایا، جو ظاہر کرتا ہے کہ بھارت دنیا بھر میں نہ صرف اقتصادی بلکہ ثقافتی طاقت کے طور پر بھی ابھر رہا ہے۔

بھارت ایکسپریس اردو۔