PM Modi Pays Tribute To Bhagat Singh, Sukhdev, Rajguru: شہید دیوس پر  پی ایم مودی نے بھگت سنگھ، راج گرو اور سکھ دیو کو پیش کی خراج عقیدت

نئی دہلی: شہید دیوس کے موقع پر نریندر مودی نے عظیم انقلابی شہداء بھگت سنگھ، راج گرو اور سکھ دیو کو خراجِ عقیدت پیش کیا۔ انہوں نے کہا کہ وطن کے لیے ان کی قربانی ہمیشہ قوم کی اجتماعی یادداشت میں نقش رہے گی۔وزیر اعظم مودی نے پیر کے روز سوشل میڈیا پلیٹ فارم “ایکس” پر اپنے پیغام میں لکھا کہ آج ہم بھارت ماتا کے بہادر سپوت بھگت سنگھ، راج گرو اور سکھ دیو کو عقیدت کے ساتھ یاد کرتے ہیں۔ انہوں نے کہا کہ کم عمری میں ہی ان عظیم مجاہدین نے غیر معمولی جرات اور ہندوستان کی آزادی کے لیے بے مثال عزم کا مظاہرہ کیا۔

مودی نے اپنے پیغام میں مزید کہا کہ انقلابیوں نے نوآبادیاتی حکومت کے جبر کے سامنے کبھی ہمت نہیں ہاری اور ثابت قدمی کے ساتھ قربانی کا راستہ اختیار کیا۔ انہوں نے اپنی جانوں سے بڑھ کر وطن کو اہمیت دی اور تاریخ میں امر ہو گئے۔انہوں نے اس بات پر زور دیا کہ انصاف، حب الوطنی اور بے خوف مزاحمت کے ان کے نظریات آج بھی لاکھوں بھارتیوں کے دلوں میں حوصلہ اور تحریک پیدا کرتے ہیں۔

اس موقع پر وزیر اعظم مودی  نے ایک ویڈیو پیغام بھی جاری کیا، جس میں انہوں نے کہا کہ کئی دہائیوں بعد بھی ان تینوں شہداء کی قربانی کی داستانیں ملک کے ہر بچے کی زبان پر ہیں۔ ان کی جدوجہد آج بھی قوم کو ملک کے لیے دن رات محنت کرنے کی ترغیب دیتی ہے۔

اپنے خطاب میں مودی نے بھگوت گیتا کا حوالہ دیتے ہوئے کہا کہ “نَینَم چھندنتی شاسترانِی، نَینَم دہتی پاواکہ” یعنی نہ تلوار اسے کاٹ سکتی ہے اور نہ آگ جلا سکتی ہے۔ انہوں نے کہا کہ وطن کے لیے جان دینے والے ہمیشہ امر ہو جاتے ہیں اور آنے والی نسلوں کے لیے مشعلِ راہ بنتے ہیں۔

واضح رہے کہ ہر سال 23 مارچ کو ہندوستان میں شہید دیوس منایا جاتا ہے، جس دن ان تینوں عظیم انقلابیوں کو برطانوی حکومت نے پھانسی دے دی تھی۔

بھارت ایکسپریس اردو