PM Modi Meets Vice President: وزیر اعظم مودی نے نائب صدر جمہوریہ سے کی ملاقات، اہل وطن کو دی دیوالی کی مبارک باد

نئی دہلی: وزیر اعظم نریندر مودی نے ہفتہ کے روز دیوالی سے پہلے اہل وطن کو روشنی کے تہوار کی مبارک باد دی۔ انہوں نے کہا کہ دیوالی کا تہوار پورے ملک کو روشنی سے جگمگا دیتا ہے اور یہ تہوار تاریکی کے خلاف ہمارے عزم کی علامت ہے۔ وزیر اعظم نے بتایا کہ وہ ہر سال کی طرح اس بار بھی ملک کے بہادر دفاعی اہلکاروں کے ساتھ دیوالی منائیں گے۔

وزیر اعظم مودی نے سوشل میڈیا پر ’ہیَو اے گریٹ دیوالی‘ کے عنوان سے ایک ویڈیو پیغام جاری کرکے لوگوں کو مبارک باد دی۔ انہوں نے کہا کہ دیوالی کے موقع پر پورا ملک روشنی سے جگمگا اٹھتا ہے۔ روشنی کا یہ تہوار تاریکی کے خلاف ہمارے عزم کو ظاہر کرتا ہے۔

انہوں نے کہا، ’’یہ تہوار سبھی کی زندگی میں خوشی، فلاح و بہبود اور خوشحالی لے کر آئے۔ آپ سبھی کی طرح میں بھی یہ تہوار پورے جوش و خروش سے مناتا ہوں۔ ہر سال کی طرح اس بار بھی میں اپنے بہادر دفاعی اہلکاروں کے ساتھ دیوالی مناؤں گا۔ ایک بار پھر آپ سبھی کو دیوالی کی دلی مبارک باد۔‘‘

نائب صدر سی پی رادھا کرشنن سے بھی کی ملاقات

اس سے پہلے وزیر اعظم مودی نے نائب صدر سی پی رادھا کرشنن سے ملاقات کی اور انہیں دیوالی کی مبارک باد دی۔ نائب صدر کے دفتر نے سوشل میڈیا پلیٹ فارم ایکس پر اس ملاقات کی اطلاع دیتے ہوئے بتایا کہ نائب صدر نے ہفتہ کے روز نائب صدر بھون میں وزیر اعظم کا گرمجوشی سے استقبال کیا۔ دونوں لیڈران نے ایک دوسرے کو دیوالی کی مبارک باد پیش کی۔

دیپوتسو 2026 میں شرکت کے لیے ایودھیا پہنچے نائب صدر

دوسری جانب نائب صدر جمہوریہ سی پی رادھا کرشنن ہفتہ کے روز دیپوتسو 2026 میں شرکت کے لیے ایودھیا پہنچے۔ ایک سرکاری بیان کے مطابق، اپنے دورے کے دوران وہ شری رام جنم بھومی مندر میں پوجا ارچنا کریں گے اور بھگوان شری رام کی علامتی راجیہ ابھیشیک تقریب میں شرکت کریں گے۔ اس موقع پر وہ سنتوں کو اعزاز سے بھی نوازیں گے۔

ایودھیا میں ہفتہ کے روز منعقد ہونے والا دیپوتسو 2026، دیوالی سے ایک دن پہلے ہونے والی عظیم الشان تقریب کے دسویں سال کی علامت ہے۔ منتظمین کا ہدف رام کی پیڑی اور دریائے سریو کے کناروں سمیت 56 گھاٹوں پر 30 سے 33 لاکھ سے زیادہ مٹی کے دیے روشن کرنے کا ہے۔

بھارت ایکسپریس۔