Modi Hails Strong Participation in Har Ghar Tiranga Campaign: پی ایم مودی نے ہر گھر ترنگا مہم میں عوام کی پرجوش شرکت پر کیا خوشی کا اظہار، مزید شرکت کی درخواست کی

وزیر اعظم نریندر مودی نے ’’ہر گھر ترنگا‘‘ مہم میں عوام کی غیرمعمولی شرکت پر خوشی کا اظہار کیا ہے اور اسے بھارت کے لوگوں کے گہرے حب الوطنی جذبے اور قومی پرچم پر ان کے فخر کی علامت قرار دیا ہے۔ انھوں نے شہریوں سے درخواست کی ہے کہ وہ اپنی تصاویر اور سیلفی اس مہم کی ویب سائٹ پر لگاتار شیئر کرتے رہیں تاکہ ملک میں یکجہتی اور قومی جذبہ مزید مضبوط ہو۔

وزارت ثقافت کی جانب سے ’’ہر گھر ترنگا‘‘ مہم میں لوگوں کی شاندار شرکت کی اطلاع پر مبنی ایک پوسٹ شیئر کرتے ہوئے وزیر اعظم مودی نے لکھا کہ ’’میں خوش ہوں کہ ’ہر گھر ترنگا‘ مہم میں پورے بھارت سے غیر معمولی شرکت ہو رہی ہے۔ یہ ہمارے لوگوں کے گہرے حب الوطنی کے جذبے اور قومی پرچم کے تئیں ان کے پائیدار فخر کو ظاہر کرتا ہے۔ براہ کرم اپنی تصاویر اور سیلفیاں harghartiranga.com پر شیئر کرتے رہیں۔‘‘

واضح رہے کہ ’’ہر گھر ترنگا‘‘ مہم پی ایم مودی نے خاص طور پر یومِ آزادی کے موقع سے شروع کی ہے۔ اس مہم کا مقصد نوجوان نسل میں حب الوطنی اور قومی شعور کو فروغ دینا ہے تاکہ وہ ملک کی خوشحالی اور سلامتی کے لیے مثبت کردار ادا کریں۔ اس مہم کے ذریعے عوام کو اپنی روزمرہ زندگی میں قومی اتحاد اور ترقی کے لیے اپنا تعاون دینے کی ترغیب بھی دی جا رہی ہے۔ ملک بھر میں اس مہم کو بے پناہ پذیرائی ملی ہے اور مختلف عمر، طبقوں اور مذاہب کے لوگوں نے بڑھ چڑھ کر اس میں حصہ لیا، جو بھارت کی ثقافتی یکجہتی اور قومی جذبے کی گہرائی کا عکاس ہے۔

بھارت ایکسپریس اردو