Policy Implementation: وزیراعظم نریندر مودی کی مرکزی سکریٹریوں کو عوامی فلاحی اسکیموں کے عملی اثرات پر توجہ دینے کی ہدایت، محکمہ جاتی رکاوٹیں ختم کرنے پر زور

نئی دہلی: وزیراعظم نریندر مودی نے منگل کو سیوا تیرتھ میں مرکزی حکومت کے سکریٹریوں سے ملاقات کی اور حکمرانی کے لیے پوری حکومت (Whole-of-Government) کے نقطۂ نظر کو اپنانے اور مختلف محکموں کے درمیان موجود رکاوٹوں (Silos) کو ختم کرنے کی ضرورت پر زور دیا۔ وزیراعظم نے مربوط منصوبہ بندی اور بین المحکماتی تال میل کی اہمیت اجاگر کرتے ہوئے سکریٹریوں کو پی ایم گتی شکتی پلیٹ فارم کا زیادہ سے زیادہ استعمال کرنے کی ترغیب دی۔ انہوں نے کہا کہ یہ پلیٹ فارم مختلف محکموں کے درمیان مؤثر ہم آہنگی اور بہتر فیصلوں کے لیے ایک اہم ذریعہ ثابت ہو سکتا ہے۔ واضح رہے کہ پی ایم گتی شکتی نیشنل ماسٹر پلان (PMGS-NMP) کا آغاز 13 اکتوبر 2021 کو ملک کے مختلف اقتصادی خطوں کو کثیر النوع رابطہ جاتی بنیادی ڈھانچے (ملٹی موڈل کنیکٹیویٹی) سے جوڑنے کے مقصد سے کیا گیا تھا۔

عوامی زندگی پر اسکیموں کے عملی اثرات پر توجہ

وزیراعظم مودی نے سکریٹریوں پر زور دیا کہ وہ مختلف سرکاری اسکیموں کے عوام کی زندگی پر پڑنے والے حقیقی اور عملی اثرات کو اپنی ترجیح بنائیں، تاکہ حکومتی اقدامات کا فائدہ براہِ راست شہریوں تک پہنچ سکے۔ اجلاس میں دو اہم موضوعات پر تفصیلی غور کیا گیا جس میں کاروبار میں آسانی (Ease of Doing Business) اور زندگی میں آسانی (Ease of Living) کے لیے ضابطوں میں نرمی اور دیگر اصلاحات اور آتم نربھر بھارت (خود انحصاری) کے فروغ کے اقدامات شامل ہیں۔

وزارتوں کی پیش رفت کا جائزہ

اجلاس کے دوران مختلف وزارتوں اور محکموں کے سکریٹریوں نے ان دونوں موضوعات کے حوالے سے اپنی وزارتوں کی جانب سے کیے جانے والے اقدامات سے آگاہ کیا۔ انہوں نے وزیراعظم کے وژن کو عملی جامہ پہنانے کی کوششوں، شعبہ جاتی چیلنجوں اور حکمرانی و عوامی خدمات کو مزید مؤثر بنانے کے لیے مستقبل کی حکمت عملی پر بھی روشنی ڈالی۔

مسلسل مدتِ کار کا ریکارڈ

واضح رہے کہ وزیراعظم نریندر مودی رواں ماہ ملک کے سب سے طویل عرصے تک مسلسل خدمات انجام دینے والے منتخب وزیراعظم بن گئے ہیں۔ انہوں نے مسلسل 4,399 دن بطور منتخب وزیراعظم خدمات انجام دے کر ملک کے پہلے وزیراعظم جواہر لال نہرو کا 4,398 دن کا ریکارڈ پیچھے چھوڑ دیا۔ اس موقع پر مرکزی کابینہ نے ایک قرارداد منظور کرتے ہوئے کہا تھا کہ یہ کامیابی بھارت کے جمہوری شعور، عوامی اعتماد اور عوامی شراکت کی طاقت کی علامت ہے۔ قرارداد میں یہ بھی کہا گیا کہ یہ سنگ میل ایسے وقت حاصل ہوا ہے جب وزیراعظم مودی کی قیادت میں این ڈی اے حکومت نے اپنے 12 سال مکمل کیے ہیں، جبکہ وہ بطور سربراہِ حکومت مسلسل 25 سال کی خدمات کے سنگ میل کے بھی قریب پہنچ رہے ہیں۔

بھارت ایکسپریس اردو۔