PM Modi departs for home from New Zealand: نیوزی لینڈ کا کامیاب دورہ مکمل، وزیر اعظم مودی وطن روانہ

آکلینڈ: وزیر اعظم نریندر مودی نیوزی لینڈ کا کامیاب اور شاندار دورہ مکمل کرنے کے بعد وطن روانہ ہو گئے۔ انہیں سرکاری اعزاز کے ساتھ رخصت کیا گیا۔ نیوزی لینڈ کے وزیر اعظم کرسٹوفر لکسن نے انہیں گلے لگا کر الوداع کہا اور ہاتھ ہلا کر رخصت کیا۔ چھ روزہ سرکاری غیر ملکی دورے کے آخری مرحلے میں وزیر اعظم مودی دارالحکومت آکلینڈ پہنچے تھے۔ یہ دورہ انتہائی کامیاب رہا، جس کے دوران 18 اہم فیصلے کیے گئے اور 10 مفاہمتی یادداشتوں (ایم او یو) پر دستخط ہوئے۔

2030 تک اسٹریٹجک شراکت داری کا روڈ میپ

بھارت اور نیوزی لینڈ کے درمیان پرانی دوستی، مشترکہ جمہوری اقدار، عوامی روابط اور ہند۔بحرالکاہل خطے میں مشترکہ مفادات کو مدنظر رکھتے ہوئے دونوں وزرائے اعظم نے تعلقات کو اسٹریٹجک شراکت داری تک وسعت دینے کا فیصلہ کیا۔ اسی مقصد کے تحت آئندہ چار برسوں کے لیے ’بھارت۔نیوزی لینڈ اسٹریٹجک پارٹنرشپ: روڈ میپ ٹو 2030‘ کی حمایت کی گئی۔ دونوں ممالک نے اعلیٰ سطحی وفود کے باقاعدہ تبادلوں اور علاقائی و کثیر فریقی پروگراموں کے موقع پر مسلسل ملاقاتوں پر بھی اتفاق کیا۔

دو طرفہ تجارت دوگنی کرنے کا ہدف

فریقین نے 2030 تک اشیا اور خدمات کی دو طرفہ تجارت کو دوگنا کرتے ہوئے 7 ارب نیوزی لینڈ ڈالر، یعنی تقریباً 35 ہزار کروڑ روپے تک پہنچانے کے ہدف پر مل کر کام کرنے پر اتفاق کیا۔ ہفتہ کے روز وزیر اعظم مودی نے کئی اہم تقریبات میں شرکت کی۔ وزیر اعظم کرسٹوفر لکسن نے ان کے اعزاز میں گالا لنچ کا اہتمام کیا، جبکہ شام کو وہ ’کیا اورا مودی‘ پروگرام میں شریک ہوئے۔ بیرونِ ملک مقیم بھارتی برادری کے اعزاز میں منعقدہ یہ تقریب خاصی اہم رہی۔ اس موقع پر وزیر اعظم لکسن نے نیوزی لینڈ میں بھارتی برادری کی محنت، خدمات اور معیشت میں تقریباً 9 فیصد شراکت کو سراہا۔

مودی کی یقین دہانی

وزیر اعظم مودی نے اس موقع کو جذباتی اور حوصلہ افزا قرار دیتے ہوئے کہا کہ اب کسی بھارتی وزیر اعظم کے نیوزی لینڈ آنے کے لیے 40 سال انتظار نہیں کرنا پڑے گا۔ انہوں نے کہا، ’’بھارتی وزیر اعظم کو نیوزی لینڈ آنے میں 40 سال لگے، لیکن اب آپ کو اتنا طویل انتظار نہیں کرنا پڑے گا۔ یہ مودی کی گارنٹی ہے، اور مودی کی گارنٹی یعنی گارنٹی پوری ہونے کی گارنٹی۔‘‘

بھارت ایکسپریس۔