Historic Milestone: وزیراعظم مودی نے کلپکم میں فاسٹ بریڈر نیوکلیئر ری ایکٹر میں کامیابی حاصل کرنے پر سائنسدانوں کو دی مبارکباد

نئی دہلی: وزیراعظم نریندر مودی نے تمل ناڈو کے کالپکم میں قائم پروٹوٹائپ فاسٹ بریڈر نیوکلیئر ری ایکٹر (PFBR) کے ’’فرسٹ کریٹیکلٹی‘‘ حاصل کرنے پر بھارتی سائنسدانوں کو مبارکباد دی ہے۔ انہوں نے اپنے ریڈیو پروگرام من کی بات کے 133ویں ایپی سوڈ میں اس کامیابی کو ’’تاریخی سنگِ میل‘‘ قرار دیا۔ وزیراعظم نے کہا کہ ’’فرسٹ کریٹیکلٹی‘‘ وہ مرحلہ ہوتا ہے جب ری ایکٹر پہلی بار خودکار طور پر نیوکلیئر ردِعمل کو برقرار رکھنے کے قابل ہو جاتا ہے، جو اس کے آپریشنل مرحلے کے آغاز کی علامت ہے۔

دیسی ٹیکنالوجی اور توانائی خودکفالت

نریندر مودی نے اس بات پر زور دیا کہ یہ نیوکلیئر ری ایکٹر مکمل طور پر مقامی (Indigenous) ٹیکنالوجی سے تیار کیا گیا ہے، جو بھارت کے ’’وکست بھارت‘‘ کے عزم کو نئی توانائی فراہم کرے گا۔ محکمۂ جوہری توانائی کے مطابق، 500 میگاواٹ کا یہ پروٹوٹائپ فاسٹ بریڈر ری ایکٹر 6 اپریل 2026 کو کامیابی کے ساتھ کریٹیکلٹی حاصل کر چکا ہے۔ اس منصوبے کو اندرا گاندھی سینٹر فار ایٹامک ریسرچ نے ڈیزائن کیا، جبکہ بھارتیہ نابھیکیہ ودیوت نگم لمیٹڈ نے اسے تعمیر اور کمیشن کیا۔ یہ ری ایکٹر یورینیم-پلوٹونیم مکسڈ آکسائیڈ (MOX) فیول استعمال کرتا ہے اور اس کی خاصیت یہ ہے کہ یہ جتنا ایندھن استعمال کرتا ہے، اس سے زیادہ پیدا بھی کر سکتا ہے، جس سے توانائی کے وسائل کا مؤثر استعمال ممکن ہوتا ہے۔

مستقبل کی توانائی حکمت عملی میں کلیدی کردار

فاسٹ بریڈر ری ایکٹر بھارت کی طویل مدتی جوہری حکمت عملی کا اہم حصہ ہے، جو موجودہ ری ایکٹروں اور مستقبل کے تھوریم پر مبنی نظام کے درمیان ایک پل کا کام کرتا ہے۔ اس ٹیکنالوجی کے ذریعے یورینیم-238 کو پلوٹونیم-239 میں تبدیل کیا جاتا ہے، جبکہ مستقبل میں تھوریم-232 کو یورینیم-233 میں بدل کر استعمال کرنے کا منصوبہ بھی شامل ہے۔ یہ منفرد صلاحیت بھارت کو محدود یورینیم وسائل کے باوجود زیادہ توانائی حاصل کرنے میں مدد دے گی اور صاف توانائی کے میدان میں ملک کو خودکفیل بنانے کی سمت ایک بڑا قدم ثابت ہوگی۔ اس کامیابی سے یہ بھی ظاہر ہوتا ہے کہ بھارت کا مقامی ڈیزائن، انجینئرنگ اور مینوفیکچرنگ نظام عالمی معیار کا ہے۔ ری ایکٹر میں جدید حفاظتی نظام، مائع سوڈیم کولنگ ٹیکنالوجی اور بند ایندھن سائیکل (Closed Fuel Cycle) جیسی خصوصیات شامل ہیں، جو پائیداری کو بہتر بناتی ہیں اور جوہری فضلہ کو کم کرتی ہیں۔

بھارت ایکسپریس اردو۔