PM Modi conferred Ghana’s highest civilian honour: گھانا کی حکومت نے پی ایم مودی کو  اعلیٰ ترین شہری اعزاز سے نوازا،دونوں ممالک کے مابین ہوئے چار معاہدے

وزیراعظم نریندر مودی اپنے دو روزہ دورے پر گھانا میں ہیں، جہاں ان کا شاندار استقبال کیا گیا۔ گھانا پہنچنے پر پی ایم مودی کو 21 توپوں کی سلامی دی گئی۔ اس موقع پر گھانا کے صدر جان ماہاما نے انہیں اپنے دوسرے اعلیٰ ترین قومی شہری اعزاز ‘آفیسر آف دی آرڈر آف دی اسٹار آف گھانا’ سے نوازا۔گھانا کی جانب سے اعزاز دینے پر پی ایم مودی نے گھانا کی حکومت کا شکریہ ادا کیا۔ انہوں نے کہا، “گھانا کے قومی اعزاز سے نوازا جانا میرے لیے انتہائی فخر اور عزت کی بات ہے۔ میں صدر جان ماہاما، گھانا کی حکومت اور گھانا کے معزز عوام کا شکریہ ادا کرتا ہوں۔ میں یہ اعزاز گھانا کے نوجوانوں کے روشن مستقبل اور گھانا و بھارت کے تاریخی تعلقات کے لیے وقف کرتا ہوں۔قابل ذکر ہے کہ پی ایم مودی کے گھانا پہنچنے پر صدر جان ماہاما خود انہیں لینے ایئرپورٹ پر آئے۔ اس پر شکریہ ادا کرتے ہوئے پی ایم مودی نے کہا کہ صدر ماہاما کا خود ایئرپورٹ پر آنا ان کے لیے بڑی عزت کی بات ہے۔

پی ایم مودی نے گھانا کو مغربی افریقہ کی ایک متحرک جمہوریت اور امید کی کرن قرار دیا۔ وزیراعظم نریندر مودی کے اس گھانا دورے کے دوران دونوں ممالک کے درمیان کئی اہم فیصلے کیے گئے۔ پی ایم مودی نے کہا، “آج ہم نے گھانا کے لیے ITEC اور ICCR اسکالرشپس کو دگنا کرنے کا فیصلہ کیا ہے۔ گھانا کے نوجوانوں کے لیے پیشہ ورانہ تعلیم کے لیے ایک اسکل ڈیولپمنٹ سینٹر قائم کیا جائے گا۔ اس کے علاوہ زرعی شعبے میں صدر ماہاما کے ‘فیڈ گھانا پروگرام’ میں بھی تعاون کیا جائے گا۔اس کے علاوہ دونوں ممالک کے درمیان جن اوشدھی مراکز کے ذریعے گھانا کے شہریوں کو سستی اور بہتر صحت کی خدمات فراہم کرنے کی تجویز پیش کی گئی۔ دونوں ممالک نے ویکسین کی تیاری میں تعاون پر بھی تبادلہ خیال کیا۔

بھارت اور گھانا کے درمیان چار معاہدے

ثقافتی تبادلے پر مفاہمت کی یادداشت: بھارت اور گھانا کے درمیان فنون، موسیقی، رقص، ادب اور ورثے کے شعبوں میں باہمی تعاون پر اتفاق ہوا۔

بھارتی اسٹینڈرڈز بیورو اور گھانا اسٹینڈرڈز اتھارٹی کے درمیان مفاہمت کی یادداشت: دونوں ممالک نے معیاری کاری اور تصدیق کے شعبے میں تعاون پر اتفاق کیا۔

ITAM (گھانا) اور ITRA (بھارت) کے درمیان مفاہمت کی یادداشت: دونوں ممالک نے روایتی طب کی تعلیم، تربیت اور تحقیق میں تعاون پر اتفاق کیا۔

مشترکہ کمیشن کی میٹنگ پر مفاہمت کی یادداشت: دونوں ممالک کے درمیان دو طرفہ تعاون اور اعلیٰ سطحی مکالمے کے جائزے پر اتفاق ہوا۔

دہشت گردی کے خلاف گھانا کی حمایت کی تعریف 

پی ایم مودی نے دہشت گردی کے خلاف گھانا کے تعاون کی تعریف کی۔ انہوں نے کہا کہ دونوں ممالک نے انسداد دہشت گردی میں تعاون کو مزید مضبوط کرنے پر اتفاق کیا ہے۔پی ایم مودی نے گھانا کے صدر کو بھارت آنے کی دعوت دی۔ انہوں نے کہا، “میں کل گھانا میں بھارتی برادری کے ساتھ ملاقات کے لیے بہت پرجوش ہوں۔ صدر ماہاما بھارت کے قریبی دوست ہیں۔ میں انہیں بھارت کا مہمان بننے کی دعوت دیتا ہوں۔

بھارت ایکسپریس۔