PM condoles passing of Shivraj Singh’s Mother: مرکزی وزیر شیوراج سنگھ چوہان کی والدہ کے انتقال پر وزیراعظم مودی کا اظہارِ تعزیت، کہا-’’یہ ایسا خلا ہے جو کبھی پُر نہیں ہوسکتا‘‘

نئی دہلی: وزیراعظم نریندر مودی نے جمعہ کو مرکزی وزیر شیوراج سنگھ چوہان کی والدہ کاشی بائی کے انتقال پر گہرے رنج و غم کا اظہار کیا۔ انہوں نے شیوراج سنگھ چوہان کو خط لکھ کر تعزیت پیش کی اور اس مشکل وقت میں پورے خاندان کے ساتھ اپنی ہمدردی کا اظہار کیا۔ وزیر اعظم نے اپنے پیغام میں لکھا کہ یہ افسوسناک خبر سن کر انہیں گہرا صدمہ پہنچا ہے۔ انہوں نے کہا کہ ماں کی محبت زندگی کی سب سے بڑی طاقت اور اس کی دعائیں سب سے قیمتی وراثت ہوتی ہیں۔ ماں کی محبت، دیکھ بھال اور دعاؤں کا سایہ زندگی کے ہر مرحلے میں انسان کو سہارا دیتا ہے، لیکن ماں کے بچھڑنے سے دل میں ایسا خلا پیدا ہوجاتا ہے جسے کبھی پُر نہیں کیا جاسکتا۔ مودی نے مزید لکھا کہ شیوراج سنگھ چوہان کی عوامی زندگی کے طویل سفر میں ان کے خاندان کی تربیت اور بزرگوں کی دعاؤں کا اہم کردار رہا ہے۔ اگرچہ ان کی والدہ اب جسمانی طور پر ان کے ساتھ نہیں ہیں، لیکن ان کی یادیں اور دیے گئے اقدار ہمیشہ ان کی زندگی کو روشن کرتے رہیں گے۔ وزیر اعظم نے دعا کی کہ خدا سوگوار خاندان اور ان کے خیر خواہوں کو اس غم کو برداشت کرنے کی طاقت عطا کرے۔

بھوپال میں دورانِ علاج انتقال، آبائی گاؤں میں آخری رسومات

کاشی بائی کا جمعہ کی صبح بھوپال میں علاج کے دوران انتقال ہوگیا۔ وہ کچھ عرصے سے علیل تھیں اور بھوپال کے آل انڈیا انسٹی ٹیوٹ آف میڈیکل سائنسز (ایمس) میں زیر علاج تھیں۔ ان کی آخری رسومات اسی روز دوپہر کو مدھیہ پردیش کے ضلع سیہور میں واقع آبائی گاؤں جیت میں ویدک روایات اور رسومات کے مطابق ادا کی گئیں۔ آخری رسومات میں مدھیہ پردیش کے وزیر اعلیٰ موہن یادو، بی جے پی کے ریاستی صدر اور رکن اسمبلی ہیمنت کھنڈیلوال، مدھیہ پردیش اسمبلی کے اسپیکر نریندر سنگھ تومر، ریاستی کابینہ کے کئی وزرا، ارکان پارلیمنٹ، ارکان اسمبلی، اعلیٰ انتظامی افسران اور بڑی تعداد میں مقامی باشندے و معزز شخصیات شریک ہوئیں۔ سبھی نے مرحومہ کو خراج عقیدت پیش کیا اور سوگوار خاندان سے تعزیت کا اظہار کیا۔

ماں کی یاد میں شیوراج سنگھ چوہان نے لگایا پودا

آخری رسومات کے بعد ماحولیات کے تحفظ کے لیے سرگرم شیوراج سنگھ چوہان نے اپنی والدہ کی یاد میں آبائی گاؤں جیت میں ایک پودا لگایا۔ انہوں نے کہا کہ ماں کی محبت زندگی بھر درخت کے ٹھنڈے سائے کی طرح انسان کے ساتھ رہتی ہے۔ چوہان نے اپنے پیغام میں کہا کہ انہوں نے بھاری دل کے ساتھ اپنی قابل احترام والدہ کاشی بائی کی یاد میں پودا لگایا ہے۔ ان کی دعا ہے کہ والدہ کی دعائیں ہمیشہ ان کے خاندان پر سایہ فگن رہیں اور یہ پودے بڑے ہوکر پرندوں، کیڑے مکوڑوں اور دیگر جانداروں کو پناہ فراہم کریں۔ ان کے مطابق، ان درختوں سے پیدا ہونے والی آکسیجن ماحول کو صاف اور خوبصورت بنانے میں مدد دے گی اور ان کی والدہ کی یادیں ان درختوں کے ساتھ ہمیشہ تازہ رہیں گی۔

مختلف سیاسی رہنماؤں نے بھی پیش کی تعزیت

اس سے قبل کاشی بائی کی میت کو بھوپال کے ساکیت نگر میں واقع ان کی رہائش گاہ پر رکھا گیا، جہاں عوامی نمائندوں اور مختلف شعبوں سے تعلق رکھنے والے افراد نے پھول پیش کرکے انہیں خراج عقیدت پیش کیا۔ بعد ازاں میت کو آخری رسومات کے لیے آبائی گاؤں جیت لے جایا گیا۔ مرکزی وزرا، مختلف ریاستوں کے وزرائے اعلیٰ اور حکمراں و اپوزیشن جماعتوں کے سرکردہ سیاسی رہنماؤں نے بھی تعزیتی پیغامات کے ذریعے کاشی بائی کے انتقال پر افسوس کا اظہار کیا اور مرحومہ کو خراج عقیدت پیش کیا۔

بھارت ایکسپریس اردو۔