Tributes to Mahatma Gandhi: گاندھی جینتی کے موقع پر وزیراعظم مودی نے گاندھی اسمرتی میں بین المذاہب دعائیہ تقریب میں کی شرکت، بابائے قوم کو خراج عقیدت

نئی دہلی: وزیر اعظم نریندر مودی نے جمعہ کو گاندھی جینتی کے موقع پر قومی دارالحکومت واقع گاندھی اسمرتی میں منعقدہ خصوصی بین المذاہب دعائیہ تقریب میں شرکت کی۔ اس موقع پر وزیر اعظم نے مہاتما گاندھی کو پھول پیش کرکے خراج عقیدت پیش کیا اور ان کے سچائی، امن اور عدم تشدد کے دیرپا اصولوں کو یاد کیا۔ تقریب کے دوران اسکولی طلبہ اور فنکاروں نے عقیدتی بھجن بھی پیش کیے۔ نائب صدر سی پی رادھا کرشنن نے بھی گاندھی اسمرتی میں مہاتما گاندھی کو پھول پیش کرکے خراج عقیدت پیش کیا۔ انہوں نے آزادی کی تحریک میں گاندھی کے اہم کردار اور ہم آہنگی و سماجی ترقی کے ان کے عالمگیر پیغام کو یاد کیا۔

2 اکتوبر کو منایا جاتا ہے عدم تشدد کا عالمی دن

مہاتما گاندھی، جنہیں موہن داس کرم چند گاندھی کے نام سے بھی جانا جاتا ہے، 2 اکتوبر 1869 کو گجرات کے پوربندر میں پیدا ہوئے تھے۔ ان کی سالگرہ کے موقع پر ہر سال 2 اکتوبر کو گاندھی جینتی منائی جاتی ہے۔ اقوام متحدہ نے 2 اکتوبر کو گاندھی کے فلسفۂ عدم تشدد سے وابستہ پیغام کو عام کرنے کے لیے ’عدم تشدد کا عالمی دن‘ قرار دیا ہے۔ مہاتما گاندھی ہندوستان کی آزادی کی تحریک کے اہم رہنماؤں میں شامل تھے اور انہوں نے نمک ستیہ گرہ اور ’بھارت چھوڑو تحریک‘ سمیت کئی اہم تحریکوں کی قیادت کی۔

راج گھاٹ پر بھی پی ایم مودی نے گاندھی کو یاد کیا

اس سے قبل وزیر اعظم نریندر مودی نے راج گھاٹ پہنچ کر مہاتما گاندھی کو خراج عقیدت پیش کیا۔ ملک بھر میں رہنماؤں اور شہریوں نے گاندھی جینتی کے موقع پر ان کے امن، عدم تشدد اور صفائی کے پیغام کو یاد کیا۔ وزیر اعظم نے راج گھاٹ پر مہاتما گاندھی کی سمادھی پر منعقدہ سرو دھرم پرارتھنا میں بھی شرکت کی۔ یہ تقریب بابائے قوم کی یوم پیدائش کے موقع پر منعقد کی گئی تھی۔

لال بہادر شاستری کو بھی خراج عقیدت

وزیراعظم نریندر مودی نے سابق وزیر اعظم لال بہادر شاستری کو بھی ان کی یوم پیدائش کے موقع پر وجے گھاٹ پہنچ کر خراج عقیدت پیش کیا۔ ملک میں 2 اکتوبر کو سابق وزیراعظم لال بہادر شاستری کی 122ویں یوم پیدائش بھی منائی جا رہی ہے۔ شاستری 2 اکتوبر 1904 کو اتر پردیش کے مغل سرائے میں پیدا ہوئے تھے اور 1964 سے 1966 تک ہندوستان کے وزیر اعظم رہے۔ لال بہادر شاستری اپنے مشہور نعرے ’جے جوان، جے کسان‘ کے لیے یاد کیے جاتے ہیں۔ 1965 کی ہندوستان-پاکستان جنگ کے دوران ان کے کردار کے ساتھ ساتھ خود انحصاری اور زرعی شعبے کی حمایت پر بھی ان کے زور کو یاد کیا جاتا ہے۔

بھارت ایکسپریس اردو۔