PM Modi will attend a programme at Vigyan Bhawan: نوجوانوں کو روزگار اور سماجی تحفظ کی نئی طاقت، پی ایم مودی آج 2400 کروڑ روپے کے مراعاتی فنڈز کریں گے تقسیم

نئی دہلی : وزیراعظم نریندر مودی نے اعلان کیا ہے کہ وہ آج شام 5 بجے نئی دہلی کے وگیان بھون میں منعقد ہونے والے ایک خصوصی پروگرام میں شرکت کریں گے، جہاں وزیراعظم وکست بھارت روزگار یوجنا (PM-VBRY) کے تحت تقریباً 2400 کروڑ روپے کے مراعاتی فنڈز (انسینٹیوز) تقسیم کیے جائیں گے۔ اس اقدام کو ملک میں روزگار کے مواقع بڑھانے اور نوجوانوں کو بااختیار بنانے کی سمت میں ایک اہم قدم قرار دیا جا رہا ہے۔وزیراعظم مودی نے سوشل میڈیا پلیٹ فارم ایکس پر اپنے پیغام میں کہا کہ یہ پروگرام نوجوانوں کو روزگار فراہم کرنے اور سماجی تحفظ کے دائرے کو وسعت دینے کی حکومت کی وسیع حکمت عملی کا حصہ ہے۔ انہوں نے کہا کہ حکومت کی کوشش ہے کہ ملک کے نوجوانوں کو معیاری روزگار کے مواقع میسر آئیں اور وہ باقاعدہ معیشت کا حصہ بن سکیں۔پی ایم وکست بھارت روزگار یوجنا حکومت ہند کی ایک اہم روزگار پر مبنی ترغیبی اسکیم ہے، جس کا مقصد روزگار کے مواقع میں اضافہ، غیر رسمی شعبے کے کارکنوں کو رسمی معیشت میں شامل کرنا، ملازمت کے لیے درکار مہارتوں کو فروغ دینا اور سماجی تحفظ کے نظام کو مزید مضبوط بنانا ہے۔

سرکاری اعداد و شمار کے مطابق اس اسکیم کے ذریعے ملک بھر میں تقریباً 15 لاکھ روزگار کے مواقع پیدا کرنے میں مدد ملی ہے۔ اس منصوبے کو اس انداز میں تیار کیا گیا ہے کہ اس سے ملازمین اور آجرین دونوں کو فائدہ پہنچے اور رسمی روزگار کے نظام کو فروغ ملے۔اس اسکیم کے تحت پہلی مرتبہ ملازمت حاصل کرنے والے نوجوان 15 ہزار روپے تک کے خصوصی انسینٹیو کے مستحق ہوں گے، جس سے انہیں اپنے پیشہ ورانہ سفر کے آغاز میں مالی معاونت ملے گی۔ دوسری جانب ایسے آجرین کو بھی مالی ترغیب دی جائے گی جو نئے روزگار کے مواقع پیدا کریں گے۔ حکومت ہر اضافی ملازم کی بھرتی پر آجر کو ماہانہ 3000 روپے تک فراہم کرے گی۔

حکومت نے مینوفیکچرنگ سیکٹر کی اہمیت کو مدنظر رکھتے ہوئے اس شعبے کے آجرین کے لیے مراعاتی مدت چار سال تک بڑھا دی ہے، جبکہ دیگر شعبوں کے آجرین دو سال تک اس سہولت سے فائدہ اٹھا سکیں گے۔یکم اگست 2025 سے نافذ ہونے والی اس اسکیم کے لیے مجموعی طور پر 99,446 کروڑ روپے مختص کیے گئے ہیں۔ حکومت کا ہدف ہے کہ دو سال کے اندر اس منصوبے کے ذریعے ساڑھے تین کروڑ سے زائد روزگار کے مواقع پیدا کیے جائیں۔ ان میں تقریباً 1.92 کروڑ افراد ایسے ہوں گے جو پہلی بار ورک فورس کا حصہ بنیں گے۔ماہرین کے مطابق یہ منصوبہ نہ صرف نوجوانوں کے لیے نئے مواقع پیدا کرے گا بلکہ ملک میں رسمی روزگار اور سماجی تحفظ کے نظام کو بھی مزید مستحکم بنانے میں اہم کردار ادا کرے گا

بھارت ایکسپریس اردو