Swami Vivekananda Death Anniversary: وزیر اعظم مودی سمیت مرکزی وزراء نے سوامی وویکانند کی برسی پر پیش کی خرا ج  عقیدت

نئی دہلی: وزیر اعظم نریندر مودی سمیت مرکزی حکومت کے کئی وزراء نے ہفتہ کے روز عظیم روحانی مفکر، فلسفی اور نوجوانوں کے لیے مشعل  راہ سمجھے جانے والے سوامی وویکانند کی برسی کے موقع پر انہیں خراجِ عقیدت پیش کیا۔ لیڈروں نے سوشل میڈیا پلیٹ فارم ‘ایکس’ پر اپنے پیغامات میں سوامی وویکانند کی تعلیمات، ہندوستانی ثقافت کے فروغ اور قوم کی تعمیر میں ان کے غیر معمولی کردار کو یاد کیا۔وزیراعظم نریندر مودی نے اپنے پیغام میں کہا کہ سوامی وویکانند کی برسی پر انہیں کروڑوں بار پرنام  پیش کرتے ہیں۔ انہوں نے کہا کہ ہندوستانی ثقافت،مذہبی اور قومی شعور کو عالمی سطح پر نئی شناخت دلانے میں سوامی وویکانند کا کردار ناقابلِ فراموش ہے۔ وزیر اعظم کے مطابق ان کی غیر معمولی ذہانت اور فکر انگیز تعلیمات آج بھی کروڑوں نوجوانوں کی رہنمائی کر رہی ہیں، جب کہ ان کے مذہبی  پیغامات ترقی یافتہ بھارت کی تعمیر کے عزم کو نئی توانائی اور سمت فراہم کرتے رہیں گے۔

وزیر دفاع راج ناتھ سنگھ نے بھی سوامی وویکانند کو خراج عقیدت پیش کرتے ہوئے کہا کہ انہوں نے ہندوستانی ثقافت، روحانیت اور سناتن روایات کو عالمی سطح پر وقار بخشا۔ راج ناتھ سنگھ نے کہا کہ سوامی وویکانند نے حب الوطنی، سماجی خدمت، اخلاقی اقدار اور کردار سازی کا پیغام دیا۔ ان کا یقین تھا کہ مضبوط، باکردار اور خوداعتماد شہری ہی کسی بھی قوم کی سب سے بڑی طاقت ہوتے ہیں۔ انہوں نے مزید کہا کہ سوامی وویکانند کے نظریات آج بھی ایک خوشحال، خود کفیل اور ترقی یافتہ بھارت کی تعمیر کے لیے مسلسل تحریک فراہم کرتے ہیں۔

مرکزی وزیر زراعت شیوراج سنگھ چوہان نے بھی اپنے پیغام میں سوامی وویکانند کو ہندوستانی خودداری کو عالمی سطح پر عزت دلانے والا عظیم مذہبی لیڈر اور نوجوانوں کے لیے دائمی مشعلِ راہ قرار دیا۔ انہوں نے کہا کہ سوامی وویکانند بچپن ہی سے ان کے لیے باعثِ تحریک رہے ہیں اور ان کے الفاظ ہمیشہ نئی توانائی عطا کرتے ہیں۔شیوراج سنگھ چوہان نے سوامی وویکانند کے ایک مشہور قول کا بھی ذکر کیا، جس میں انہوں نے انسان کی لامحدود صلاحیتوں پر زور دیتے ہوئے کہا تھا کہ انسان محض جسم نہیں بلکہ خدا کا حصہ، امرت کا فرزند اور بے پناہ طاقتوں کا خزانہ ہے، اس لیے دنیا میں کوئی ایسا کام نہیں جو وہ انجام نہ دے سکے۔انہوں نے مزید کہا کہ سوامی وویکانند ہندوستانی فلسفے، روحانیت اور عالمی شعور کی جیتی جاگتی علامت تھے۔ ان کا مشہور پیغام “اٹھو، جاگو اور اس وقت تک مت رکو جب تک منزل حاصل نہ ہو جائے” ہمیشہ نوجوانوں کی رہنمائی کرتا رہے گا اور قوم و معاشرے کی تعمیر کے لیے نئی نسل کو تحریک دیتا رہے گا۔

مرکزی وزیر صحت جگت پرکاش نڈا نے بھی سوامی وویکانند کو خراج عقیدت پیش کرتے ہوئے کہا کہ انہوں نے اپنے بے مثال علم، پراثر شخصیت اور قومی فکر کے ذریعے ہندوستانی ثقافت اور سناتن روحانی فلسفے کو عالمی سطح پر وقار بخشا۔ ان کے مطابق سوامی وویکانند نے کروڑوں نوجوانوں کے دلوں میں خود اعتمادی، حب الوطنی اور انسانیت کی خدمت کا جذبہ پیدا کیا، جو آج بھی قوم کی تعمیر میں رہنمائی فراہم کر رہا ہے۔

مرکزی وزیر تعلیم دھرمیندر پردھان نے اپنے پیغام میں کہا کہ سوامی وویکانند ایک عظیم فلسفی، روحانی مفکر اور نوجوانوں کے لیے دائمی تحریک کا سرچشمہ تھے۔ انہوں نے کہا کہ سوامی وویکانند نے اپنی پراثر فکر اور تعلیمات کے ذریعے ہندوستانی ثقافت اور روحانی ورثے کو دنیا بھر میں نئی شناخت دلائی، جبکہ ان کی زندگی آج بھی خود اعتمادی، وطن سے محبت اور انسانیت کی خدمت کا عملی سبق دیتی ہے۔

بھارت ایکسپریس اردو