Padma Awards: پدم اعزازات غیر معمولی خدمات اور لگن کا اعتراف، اعزاز یافتگان کی زندگی لاکھوں افراد کے لیے مشعل راہ: وزیراعظم مودی

نئی دہلی: وزیراعظم نریندر مودی نے کہا ہے کہ پدم اعزازات مختلف شعبوں میں غیر معمولی خدمات، لگن اور سماج کے لیے بے لوث کام کرنے والوں کے اعتراف کی علامت ہیں، جبکہ اعزاز یافتگان کی زندگی لاکھوں شہریوں کو محنت اور خدمت کے جذبے کی ترغیب دیتی ہے۔ وزیراعظم نے یہ بات راشٹرپتی بھون میں منعقدہ شہری اعزازات تقریب (سول انویسٹیچر سیریمنی-II) میں شرکت کے بعد سوشل میڈیا پلیٹ فارم ’ایکس‘ پر اپنے پیغام میں کہی۔

Attended the Civil Investiture Ceremony-II at Rashtrapati Bhavan, where the Padma Awards were presented. They celebrate exceptional service and dedication across diverse fields. Each awardee represents the best of our commitment to society. Their life journeys inspire countless… pic.twitter.com/XdPipBMMmq

— Narendra Modi (@narendramodi) June 23, 2026

اعزاز یافتگان کی خدمات قوم کے لیے مثال

نریندر مودی نے کہا کہ پدم اعزازات مختلف شعبوں میں نمایاں خدمات اور غیر معمولی وابستگی کا جشن ہیں۔ انہوں نے کہا کہ ہر اعزاز یافتہ شخصیت سماج کے لیے خدمت کے اعلیٰ جذبے کی نمائندگی کرتی ہے اور ان کی زندگی کا سفر بے شمار شہریوں کے لیے مشعلِ راہ ہے، جو یہ یاد دلاتا ہے کہ محنت، عزم اور عوامی خدمت ہی حقیقی کامیابی کا راستہ ہیں۔

65 شخصیات کو پدم اعزازات سے نوازا گیا

تقریب کے دوران دروپدی مرمو نے مجموعی طور پر 65 پدم اعزازات پیش کیے، جن میں دو پدم وبھوشن، سات پدم بھوشن اور 56 پدم شری شامل ہیں۔ پدم وبھوشن سے پی نارائنن اور جسٹس (ریٹائرڈ) کے ٹی تھامس کو سرفراز کیا گیا، جبکہ مختلف شعبوں کی کئی ممتاز شخصیات کو بھی اعزازات سے نوازا گیا۔

کھیل، فن اور فلمی دنیا کی شخصیات بھی شامل

اعزاز یافتگان میں کھیل، فن، فلم اور عوامی زندگی سے تعلق رکھنے والی کئی ممتاز شخصیات شامل تھیں۔ ہاکی کھلاڑی سویتا پنیا اور مرحوم بھگوان داس رائکوار کو کھیل کے میدان میں خدمات پر پدم شری دیا گیا، جبکہ ٹینس کے ممتاز کھلاڑی وجے امرت راج کو پدم بھوشن سے نوازا گیا۔ بھارتی کرکٹ ٹیم کے سابق کپتان روہت شرما کو بھارتی کرکٹ میں نمایاں خدمات اور متعدد آئی سی سی خطابات میں ٹیم کی قیادت کرنے پر پدم شری عطا کیا گیا۔ بھارتی سنیما کے معروف اداکار مموٹی کو فلمی دنیا میں گراں قدر خدمات پر پدم بھوشن سے نوازا گیا، جبکہ معروف گلوکارہ الکا یاگنک کو موسیقی کے شعبے میں خدمات کے اعتراف میں پدم بھوشن دیا گیا۔ اس کے علاوہ اداکار آرمادھون کو پدم شری سے نوازا گیا، جبکہ مرحوم اداکار ستیش شاہ کو سنیما میں ان کی خدمات کے اعتراف میں بعد از مرگ اعزاز سے سرفراز کیا گیا۔

بھارت ایکسپریس اردو۔